Ambaji Railway Station Design: પ્રસિદ્ધ શક્તિપીઠ શ્રી અંબાજી ધામ ખાતે દર વર્ષે લાખો ભક્તો દર્શનાર્થે પહોંચે છે. અત્યાર સુધી અંબાજી સીધી રેલવે લાઇનથી જોડાયેલું ન હોવાથી યાત્રાળુઓએ આબુ રોડ અથવા અન્ય રોડ પરિવહન પર નિર્ભર રહેવું પડતું હતું. હવે આ પરિસ્થિતિ બદલવા માટે ભારતીય રેલવે દ્વારા તારંગાહિલ–અંબાજી–આબુ રોડ વચ્ચે 117 કિલોમીટર લાંબી નવી બ્રોડગેજ રેલવે લાઇનનું નિર્માણ કાર્ય ઝડપથી ચલાવવામાં આવી રહ્યું છે. અંદાજે 3,050 કરોડ રૂપિયાના ખર્ચે આકાર લઈ રહેલા આ વિશાળ પ્રોજેક્ટથી યાત્રાળુઓ માટે અંબાજી પહોંચવું ખૂબ જ સુગમ બની જશે.
મંદિર સ્થાપત્યની ભવ્ય થીમ પર સ્ટેશનનું નિર્માણ
અંબાજી રેલવે સ્ટેશન માત્ર સામાન્ય ટ્રેન રોકાણ કેન્દ્ર નહીં, પરંતુ એક ઉત્કૃષ્ટ આધ્યાત્મિક અને સ્થાપત્ય કેન્દ્ર તરીકે વિકસાવવામાં આવી રહ્યું છે. સ્ટેશનની મુખ્ય ઇમારતની બાહ્ય ડિઝાઇન શ્રી અંબાજી માતાજીના પરંપરાગત ભારતીય મંદિર સ્થાપત્યથી પ્રેરિત હશે. સ્ટેશનના થાંભલા, દીવાલો અને વિવિધ ભાગોમાં સ્થાનિક પથ્થરોનો ઉપયોગ, આકર્ષક નકશીકામ, કલાત્મક જાળીદાર રચનાઓ અને દેવી અંબાના ધાર્મિક પ્રસંગોને આવરી લેતા સુંદર વોલ મ્યુરલ્સ કંડારવામાં આવશે.
એરપોર્ટ જેવી સુવિધાઓ અને 100 રૂમની બજેટ હોટેલ
સ્ટેશનનું ઇન્ટિરિયર એરપોર્ટ જેવું આધુનિક અને આકર્ષક બનાવવામાં આવી રહ્યું છે. ગ્રાઉન્ડ ફ્લોર પર વરિષ્ઠ નાગરિકો અને દિવ્યાંગ મુસાફરોની સરળ અવરજવર માટે ખાસ વ્યવસ્થાઓ ગોઠવવામાં આવી રહી છે. આ ઉપરાંત, સ્ટેશન પરિસરમાં પાંચ માળની ઇમારતમાં 100 રૂમની સુવિધાસભર બજેટ હોટેલ તૈયાર કરવામાં આવશે, જેથી દૂરથી આવતા ભક્તોને સ્ટેશન પર જ સલામત અને વ્યાજબી દરે રોકાણની ઉત્તમ સુવિધા મળી રહેશે. સ્ટેશનની બહાર ભવ્ય અરાઇવલ પ્લાઝા, મનોહર લેન્ડસ્કેપિંગ અને વાહનોના સુવ્યવસ્થિત પાર્કિંગની આયોજનબદ્ધ વ્યવસ્થા નિર્માણ પામશે.
પહાડી વિસ્તારમાં ટનલ અને પુલોનું એન્જિનિયરિંગ કૌશલ્ય
તારંગાહિલ–અંબાજી–આબુ રોડ રેલવે માર્ગ દુર્ગમ અને જટિલ પહાડી વિસ્તારોમાંથી પસાર થાય છે, જેના કારણે આ પ્રોજેક્ટમાં અનેક ટનલ અને પુલોનું નિર્માણ કાર્ય સામેલ છે. અંબાજીથી આબુ રોડ વચ્ચેની સૌથી લાંબી ટનલનું ખોદકામ હવે અંતિમ તબક્કામાં પહોંચી ગયું છે, જ્યારે અન્ય મહત્વપૂર્ણ ટનલોની કામગીરી પણ પુરજોશમાં ચાલી રહી છે. ટનલ અને બ્રિજનું નિર્માણ કાર્ય પૂર્ણ થયા બાદ રેલવે ટ્રેક પાથરવાની આગળની પ્રક્રિયાને વેગ મળશે.
ઉત્તર ગુજરાત અને રાજસ્થાન વચ્ચે પ્રવાસન અને આર્થિક વિકાસને વેગ
આ નવી ઇલેક્ટ્રિફાઇડ રેલવે લાઇન ગુજરાતના બનાસકાંઠા, સાબરકાંઠા અને મહેસાણા જિલ્લાઓ તેમજ રાજસ્થાનના સિરોહી પ્રદેશ વચ્ચે કનેક્ટિવિટી ખૂબ મજબૂત બનાવશે. આ પ્રોજેક્ટમાં કુલ 15 સ્ટેશનો, 11 ટનલ, 54 મોટા પુલો અને 151 નાના પુલોનો સમાવેશ થાય છે. જમીન સંપાદનની મોટાભાગની કામગીરી પૂર્ણ થઈ ચૂકી છે. આ રેલ લાઈન પૂર્ણ થવાથી ધાર્મિક પ્રવાસનને મોટો ઉત્સાહ મળશે, સાથે સ્થાનિક સ્તરે રોજગારી અને વેપાર-રોજગારના નવા અવસરો પણ ઊભા થશે.
