Ahmedabad Visa Agent Fraud:અમદાવાદ શહેરમાં વિઝા કૌભાંડનો વધુ એક ચોંકાવનારો કિસ્સો સામે આવ્યો છે. નારણપુરા વિસ્તારમાં રહેતા અને ખાનગી કંપનીમાં નોકરી કરતા 37 વર્ષીય ચિંતનભાઈ શાહ સાથે વિઝા એજન્ટે યુરોપ અને દુબઈમાં ઊંચા પગારની નોકરી અપાવવાની લાલચ આપીને રૂપિયા 11.65 લાખની ઠગાઈ આચરી છે. વિઝા એજન્ટ દેવલ હેમંતકુમાર જોષીએ નોર્વેની અતિ જાણીતી સેમસંગ કંપનીમાં નોકરી અપાવવાના ખોટા સપનાં બતાવીને આ છેતરપિંડી આચરી હતી. આ ઘટનાને કારણે નોકરીની આશા રાખતા નોકરીયાત વર્ગમાં ભારે ચિંતા અને રોષ જોવા મળી રહ્યો છે. ભોગ બનનાર યુવકે આ માખલે અંતે પોલીસ સ્ટેશનમાં કાયદેસરની ફરિયાદ નોંધાવતા પોલીસે ઊંડાણપૂર્વકની તપાસ શરૂ કરી છે.
ઓળખાણ અને રૂપિયાની લેવડદેવડનો સિલસિલો
આ સમગ્ર પ્રકરણની શરૂઆત માર્ચ 2024માં થઈ હતી, જ્યારે ચિંતનભાઈની મુલાકાત તેમની દીકરીની સ્કૂલના પ્રિન્સિપાલ દ્વારા દેવલ જોષી સાથે થઈ હતી. આરોપી દેવલે પોતાની ઓળખ વિઝા અને એલઆઈસી એજન્ટ તરીકે આપી હતી અને યુરોપના વિકસિત દેશોમાં સરળતાથી વર્ક પરમિટ અપાવવાનો દાવો કર્યો હતો. આ કામ માટે તેણે કુલ 15 લાખ રૂપિયાની માગણી કરી હતી. વિશ્વાસમાં આવીને ચિંતનભાઈએ અલગ-અલગ હપ્તાઓમાં ઓનલાઈન ટ્રાન્સફર અને રોકડ મળીને કુલ 16.65 લાખ રૂપિયા ચૂકવી દીધા હતા. એજન્ટે શરૂઆતમાં પોલેન્ડ અને ત્યારબાદ નોર્વેની સેમસંગ કંપનીમાં નોકરી અપાવવાની ખાતરી આપી હતી. એટલું જ નહીં, નોર્વેના નામે કંપનીનું નામ બ્લર કરેલો એક નકલી ઓફર લેટર પણ મોકલી આપ્યો હતો. વિદેશમાં નોકરી મળવાની પાકી આશા બંધાઈ જતાં ચિંતનભાઈએ પોતાની ચાલુ નોકરીમાંથી પણ રાજીનામું ધરી દીધું હતું.
મુંબઈ એમ્બેસીમાં શંકાની શરૂઆત અને દુબઈનું કાવતરું
જ્યારે વિઝા પ્રક્રિયા અંગે ચિંતનભાઈ મુંબઈ સ્થિત નોર્વેની એમ્બેસીમાં ગયા, ત્યારે ત્યાં વિઝા કે પ્રોસેસને લગતી કોઈ જ આગળની કાર્યવાહી થઈ નહોતી, જેના કારણે તેમને એજન્ટ ઉપર શંકા ગઈ હતી. આ વાત છુપાવવા માટે દેવલે તેમને યુરોપના બદલે દુબઈમાં ઊંચા પગારની નોકરી અને વર્ક પરમિટ અપાવવાની નવી ખાતરી આપી હતી. ત્યારબાદ, જાન્યુઆરી 2026માં દેવલ તેમને પોતાની સાથે દુબઈ લઈને ગયો હતો. પરંતુ વાસ્તવિકતા સાવ અલગ જ નીકળી; વર્ક વિઝા આપવાના વાયદા વિરુદ્ધ એજન્ટે તેમને માત્ર 60 દિવસના ટુરિસ્ટ વિઝા પર જ દુબઈ મોકલ્યા હતા.
દુબઈ પહોંચ્યા બાદ શારજાહમાં રઝળતો મૂકવાની અમાનવીય ઘટના
દુબઈ પહોંચ્યા બાદ આરોપી દેવલ પોતે તો એક સારી હોટલમાં રોકાઈ ગયો હતો, પરંતુ ચિંતનભાઈને શારજાહ ખાતે એક સ્થાનિક લેબર કોન્ટ્રાક્ટરના નાના ક્વાર્ટરમાં રહેવા માટે મોકલી દીધા હતા. ત્યાં પહોંચ્યા પછી દેવલે તેમને કોઈપણ પ્રકારની મદદ કરવાના બદલે જાતે જ ઇન્ટરવ્યુ આપીને નોકરી શોધી લેવાનું કહીને હાથ ઊંચા કરી દીધા હતા. આ પરિસ્થિતિ જોઈને ચિંતનભાઈને સ્પષ્ટ થઈ ગયું કે તેમની સાથે મોટું વિઝા કૌભાંડ આચરવામાં આવ્યું છે અને તેમની સાથે છેતરપિંડી થઈ છે. તેઓ કોઈક પ્રકારે બહાનું કાઢીને તાત્કાલિક સુરક્ષિત રીતે અમદાવાદ પરત ફર્યા હતા.
નાણાકીય હિસાબ અને પોલીસ ફરિયાદની કડક કાર્યવાહી
અમદાવાદ પરત ફર્યા બાદ ચિંતનભાઈએ પોતાની રીતે સમગ્ર ખર્ચ અને વિઝા પ્રક્રિયાની હિસાબી તપાસ કરી હતી. આ તપાસમાં સામે આવ્યું કે વિઝા પ્રક્રિયા અને દુબઈના સામાન્ય ખર્ચ બાદ પણ આશરે રૂપિયા 11.65 લાખ જેટલી મોટી રકમ એજન્ટ દેવલ જોષીએ પોતાની પાસે જ જમા રાખી લીધી છે અને પરત આપતો નથી. તેમણે આરોપી પાસે પોતાના નાણાં પરત મેળવવા માટે અનેકવાર ઉઘરાણી કરી હતી, પરંતુ એજન્ટે રકમ પરત આપવા સ્પષ્ટ ઈનકાર કરી દીધો હતો. આખરે કંટાળીને ચિંતનભાઈએ અમદાવાદ પોલીસ સ્ટેશનમાં આરોપી વિરુદ્ધ સત્તાવાર ઠગાઈની ફરિયાદ નોંધાવી છે. હાલ પોલીસે આ મામલે ગુનો નોંધીને આરોપી વિઝા એજન્ટને ઝડપી પાડવા માટે કાયદેસરના ચક્રો ગતિમાન કર્યા છે.
