Ahmedabad News: અમદાવાદના વટવામાં ગામડી તરફ જવાના રોડ પરથી ચાલુ વરસાદ વચ્ચે બે યુવકોના મૃતદેહ મળી આવતા ચકચાર મચી ગઈ છે. બંને મિત્રો 17 સપ્ટેમ્બરે AC રિપેરિંગના કામે જવાનું કહીને ઘરેથી બાઈક પર નીકળ્યા હતા. ત્યારબાદ 18 સપ્ટેમ્બરની સવારે બંનેના મૃતદેહ મળી આવ્યા હતા. મૃતદેહો પર ઈજાના કોઈ નિશાન મળ્યા નથી. પ્રાથમિક રીતે કરંટ લાગવાથી મોત થયાની શંકા વ્યક્ત કરવામાં આવી રહી છે, જોકે ઘટનાસ્થળેથી કોઈ જીવતો વીજ વાયર મળી આવ્યો નથી.
ગામડી નજીક કરંટ લાગ્યાની શંકા, PM રિપોર્ટ બાદ કારણ સ્પષ્ટ થશે
મળતી માહિતી મુજબ, શાહવાડી-નારોલ વિસ્તારમાં રહેતા 27 વર્ષીય રજનીકાંત ચૌહાણ અને જમાલપુરમાં રહેતા 37 વર્ષીય દિપક પરમાર બંને મિત્રો હતા. 17 સપ્ટેમ્બરે તેઓ AC રિપેરિંગનું કામ કરવા જવાનું કહીને બાઈક પર ઘરેથી નીકળ્યા હતા. દરમિયાન 18 સપ્ટેમ્બરની સવારે વટવા પોલીસને ગામડી ગામ તરફ જવાના માર્ગ પર બે યુવકોના મૃતદેહ પડ્યા હોવાની જાણ થઈ હતી. પોલીસે ઘટનાસ્થળે પહોંચી તપાસ કરતાં બંને યુવકોના શરીર પર ઈજાના કોઈ નિશાન મળ્યા નહોતા. મોતનું ચોક્કસ કારણ જાણવા માટે મૃતદેહોને પોસ્ટમોર્ટમ માટે મોકલવામાં આવ્યા છે. PM અને FSL રિપોર્ટ આવ્યા બાદ જ મોતનું સાચું કારણ સ્પષ્ટ થશે. બીજી તરફ, વટવા પોલીસે CCTV ફૂટેજ તેમજ બંને યુવકોના મોબાઈલ લોકેશનના આધારે તપાસ શરૂ કરી છે.
