Ahmedabad News: અમદાવાદના સાઉથ બોપલ વિસ્તારમાં લગ્નના એક મહિના પહેલાં જ એક ચોંકાવનારી ઘટના સામે આવી છે. 26 વર્ષીય યુવતી નાઇટ ડ્યુટીનું બહાનું આપીને પોતાના પ્રેમી સાથે હોટલમાં પહોંચી હતી. યુવતીનો ફોન બંધ આવતાં શંકા જતાં તેના ફિયોન્સે અને પરિવારજનોએ લોકેશન ટ્રેસ કર્યું હતું. લોકેશન હોટલનું નીકળતાં જ તેઓ ત્યાં પહોંચી ગયા હતા, જેના કારણે ભારે હોબાળો થયો હતો. ડરના માર્યા યુવતીએ વહેલી સવારે 181 અભયમ મહિલા હેલ્પલાઇન પર ફોન કરીને મદદ માગી હતી. આખરે અભયમની ટીમની સમજાવટ અને કાઉન્સેલિંગ બાદ બંને પક્ષોની સંમતિથી સગાઈ તોડવાનો નિર્ણય લેવાયો હતો.
લોકેશન ટ્રેસ કરતાં હોટલ સુધી પહોંચ્યો ફિયોન્સે
મળતી માહિતી મુજબ, યુવતી અને તેના ફિયોન્સેની સગાઈને છ મહિના થઈ ગયા હતા અને આવતા મહિને લગ્ન થવાના હોવાથી તૈયારીઓ પણ પૂર્ણ થઈ ગઈ હતી. જોકે, યુવતી ફિયોન્સેને મળવા જતી નહોતી અને ફોન પર પણ તેની સાથે સરખી રીતે વાત કરતી નહોતી. ઘટનાની રાત્રે યુવતીએ ફિયોન્સેને કહ્યું હતું કે તે નાઇટ ડ્યુટી પર જવાની હોવાથી રાત્રે વાત કરી શકશે નહીં. ત્યારબાદ તેનો ફોન બંધ આવતાં ફિયોન્સેને શંકા ગઈ હતી. તેણે યુવતીનું લોકેશન ટ્રેસ કર્યું તો તે સાઉથ બોપલની એક હોટલનું હોવાનું જાણવા મળ્યું હતું. ત્યારબાદ ફિયોન્સે અને તેના માતા-પિતા હોટલ પહોંચ્યા હતા અને આખી રાત ત્યાં જ રહ્યા હતા.
ડરના કારણે રૂમમાંથી બહાર ન નીકળી યુવતી
વહેલી સવારે યુવતીએ 181 અભયમ મહિલા હેલ્પલાઇન પર ફોન કરીને મદદ માગી હતી. તેણે જણાવ્યું હતું કે તે પોતાના પ્રેમી સાથે હોટલમાં છે અને તેનો ફિયોન્સે તથા પરિવારજનો તેને નુકસાન પહોંચાડવા માટે બહાર ઊભા છે. ફરિયાદ મળતાં જ અભયમની ટીમ ઘટનાસ્થળે પહોંચી હતી. યુવતી ડરના કારણે રૂમમાંથી બહાર આવતી નહોતી. ટીમે બંને પક્ષો સાથે વાતચીત કરી અને યુવતી તથા તેના પ્રેમીને સુરક્ષિત રીતે હોટલની બહાર લાવ્યાં હતાં.
પિતાના ત્રાસથી માતાને બચાવવા મજબૂરીમાં કરી હતી સગાઈ
કાઉન્સેલિંગ દરમિયાન યુવતીએ જણાવ્યું હતું કે તે છેલ્લા પાંચ વર્ષથી એક યુવકને પ્રેમ કરે છે. તેના જણાવ્યા મુજબ, તેના પિતા અવારનવાર તેની માતા સાથે ઘરેલુ હિંસા કરતા હતા. જો તે પોતાની મરજીથી પ્રેમી સાથે લગ્ન કરે તો પિતા માતા પર વધુ અત્યાચાર ગુજારશે, તેવા ડરથી તેણે અનિચ્છાએ બીજી જગ્યાએ સગાઈ સ્વીકારી હતી. યુવતીના જણાવ્યા અનુસાર, અગાઉ પણ તેનો લગ્નસંબંધ નક્કી થયો હતો, પરંતુ પ્રેમસંબંધને કારણે પહેલી સગાઈ તૂટી ગઈ હતી. પિતાના ગુસ્સાથી માતાને બચાવવાની ચિંતામાં તેણે બીજી સગાઈ કરી હતી. જોકે, લગ્નની તારીખ નજીક આવતાં પ્રેમીથી અલગ થવાની મજબૂરી તેને અસહ્ય લાગવા લાગી હતી. આથી તે છેલ્લી વાર પ્રેમીને મળવા હોટલમાં પહોંચી હતી.
અભયમની સમજાવટ બાદ સગાઈ તોડવાનો નિર્ણય
અભયમની ટીમે યુવતીને સમજાવ્યું હતું કે માતા પર ઘરેલુ હિંસા થતી હોય તો મદદ માટે મહિલા હેલ્પલાઇન, પોલીસ અને કાયદાકીય માર્ગ ઉપલબ્ધ છે. માતાને બચાવવા માટે પોતાની ઇચ્છા વિરુદ્ધ લગ્ન કરવા જરૂરી નથી. ટીમે ફિયોન્સે અને તેના પરિવાર સાથે પણ વાતચીત કરી હતી. કાઉન્સેલિંગ દરમિયાન ફિયોન્સેએ યુવતીની પરિસ્થિતિ સમજવાનો પ્રયાસ કર્યો હતો. આખરે બંને પક્ષોએ પરસ્પર સંમતિથી સગાઈ તોડવાનો નિર્ણય લીધો હતો. યુવતીએ પોતાના પ્રેમી સાથે લગ્ન કરવાની ઇચ્છા વ્યક્ત કરી હતી. સાથે જ ભવિષ્યમાં પિતા તેની માતાને ત્રાસ આપશે તો માતાને પોતાની સાથે રાખશે તેવી ખાતરી પણ આપી હતી. આ રીતે 181 અભયમની ટીમના હસ્તક્ષેપ અને કલાકો સુધી ચાલેલા કાઉન્સેલિંગ બાદ મામલો શાંત પડ્યો હતો.
પાંચ વર્ષનો પ્રેમ, બે સગાઈ અને માતાની ચિંતા
આ ઘટનામાં યુવતીની સામે એક તરફ પાંચ વર્ષનો પ્રેમસંબંધ હતો, તો બીજી તરફ માતાની સુરક્ષાની ચિંતા અને પરિવારનું દબાણ હતું. માતાને વધુ ત્રાસ સહન કરવો ન પડે તેવા ડરથી તેણે પોતાની લાગણીઓ દબાવીને સગાઈ સ્વીકારી હતી. જોકે, લગ્ન નજીક આવતાં જ તેણે મદદ માગવાનો નિર્ણય લીધો હતો. આ ઘટના ઘરેલુ હિંસાની સ્થિતિમાં મહિલાઓ માટે ઉપલબ્ધ સહાય વ્યવસ્થાની મહત્ત્વતા પણ દર્શાવે છે. જો કોઈ મહિલા દબાણ, હિંસા કે અસુરક્ષાની સ્થિતિમાં હોય, તો તે 181 અભયમ મહિલા હેલ્પલાઇન અથવા પોલીસની મદદ લઈ શકે છે.
