Ahmedabad sola STP plant accident: અમદાવાદના સોલા વિસ્તારમાં આવેલા મ્યુનિસિપલ કોર્પોરેશનના સીવેજ ટ્રીટમેન્ટ પ્લાન્ટ (STP)માં વેલ્ડિંગની કામગીરી દરમિયાન ગંભીર દુર્ઘટના સર્જાઈ હોવાના અહેવાલ છે. સુપરવાઈઝર સહિત ચાર કર્મચારીઓ પ્લાન્ટની અંદર ખાબકી ગયા હતા. ઘટનાની જાણ થતાં ફાયર બ્રિગેડની ટીમ તાત્કાલિક સ્થળ પર પહોંચી હતી. રેસ્ક્યૂ ટીમે બે લોકોને બેભાન હાલતમાં બહાર કાઢીને સારવાર માટે સોલા સિવિલ હોસ્પિટલ ખસેડ્યા હતા, જ્યારે અન્ય બે લોકોની શોધખોળ ચાલુ છે.
વેલ્ડિંગ દરમિયાન દુર્ઘટના સર્જાઈ
પ્રાથમિક માહિતી મુજબ, સોલા STP પ્લાન્ટમાં HNB એજન્સીના ચાર કર્મચારીઓ વેલ્ડિંગનું કામ કરી રહ્યા હતા. કામગીરી દરમિયાન ગેસ બનવાના કારણે એક કર્મચારી બેભાન થઈ અંદર ખાબક્યો હોવાની માહિતી સામે આવી છે. ત્યારબાદ અન્ય ત્રણ લોકો પણ પ્લાન્ટની અંદર પડ્યા હોવાનું જણાવાયું છે. જોકે, દુર્ઘટનાનું ચોક્કસ કારણ જાણવા તપાસ જરૂરી છે.
ફાયર બ્રિગેડે બે લોકોને બચાવ્યા
ઘટનાની જાણ થતાં જ ફાયર બ્રિગેડની ટીમે બચાવ કામગીરી શરૂ કરી હતી. ટીમે બે કર્મચારીઓને બેભાન હાલતમાં બહાર કાઢ્યા અને તાત્કાલિક સારવાર માટે સોલા સિવિલ હોસ્પિટલ મોકલ્યા હતા. બાકીના બે કર્મચારીઓનો પત્તો મેળવવા માટે રેસ્ક્યૂ ઓપરેશન ચાલુ રાખવામાં આવ્યું હતું.
ચારેય કર્મચારીઓની ઓળખ સામે આવી
આ ઘટનામાં પ્લાન્ટની અંદર ખાબકેલા ચાર કર્મચારીઓની ઓળખ નીચે મુજબ જણાવવામાં આવી છે:
- મનોજ: સાઇડ ઇન્ચાર્જ
- અભિષેક: વેલ્ડિંગ વર્કર
- રૂપેશ: સાઇડ PM
- નિલેશ: ગાડી ડ્રાઇવર
દુર્ઘટનાનું કારણ જાણવા તપાસ જરૂરી
STP પ્લાન્ટમાં ગેસ બનવાથી કર્મચારી બેભાન થયા હોવાની પ્રાથમિક માહિતી સામે આવી છે. જોકે, કયા પ્રકારનો ગેસ હતો, સલામતીનાં જરૂરી સાધનો ઉપલબ્ધ હતાં કે નહીં અને દુર્ઘટના કઈ પરિસ્થિતિમાં સર્જાઈ તે અંગે સત્તાવાર તપાસ બાદ જ સ્પષ્ટતા થઈ શકશે.
