Ahmedabad Porsche Overspeeding Case: અમદાવાદ શહેરના રસ્તાઓ પર અવારનવાર પૂરપાટ ઝડપે વાહનો ચલાવી લોકોના જીવ જોખમમાં મૂકવાની ઘટનાઓ સામે આવતી રહે છે. તાજેતરમાં શહેરના પોશ ગણાતા લો ગાર્ડન વિસ્તારમાં ચોંકાવનારો કિસ્સો સામે આવ્યો છે, જ્યાં એક પાયલટ યુવકે પોતાની મોંઘીદાટ પોર્શે (Porsche) કાર 100થી 110 કિ.મી. પ્રતિ કલાકથી પણ વધુની ઝડપે દોડાવી હતી. આંખના પલકારામાં લક્ઝુરિયસ કાર વાયુવેગે પસાર થતાં અન્ય વાહનચાલકો અને રાહદારીઓ ફફડી ઊઠ્યા હતા. આ ઘટનામાં નવરંગપુરા પોલીસે ગુનો નોંધી કાર જપ્ત કરી ચાલકની ધરપકડ કરી છે.
ડેશકેમમાં કેદ થયો પૂરઝડપે જતી પોર્શે કારનો વીડિયો
ઘટનાની વિગતો મુજબ HCG હોસ્પિટલથી લો ગાર્ડન તરફ જવાના રસ્તા પર શ્રેયાંશ નામનો યુવક પોતાનું કામ પતાવીને ગાડીમાં જઈ રહ્યો હતો. આ સમયે પાછળથી અત્યંત પૂરઝડપે એક લક્ઝુરિયસ પોર્શે કાર આવી પહોંચી હતી. કારની સ્પીડ એટલી હતી કે, શ્રેયાંશ અને તેની ગાડીમાં બેઠેલા અન્ય યુવકનો જીવ માંડ બચ્યો હતો. શ્રેયાંશની ગાડીના ડેશકેમ (Dashcam) માં આ આખી ઘટના અને પૂરઝડપે જતી પોર્શે કાર કેદ થઈ ગઈ હતી.
પોલીસ સ્ટેશનમાં અરજી અને વાયરલ વીડિયોથી મચ્યો હોબાળો
ડેશકેમ વીડિયોના પુરાવા સાથે શ્રેયાંશ નામના યુવકે નવરંગપુરા પોલીસ સ્ટેશનમાં અરજી આપી હતી. અરજી આપ્યાના બે દિવસ બાદ જ્યારે આ વીડિયો સોશિયલ મીડિયા પર વાયરલ થયો ત્યારે પોલીસે ત્વરિત હરકતમાં આવી કારના નંબરના આધારે તપાસ શરૂ કરી હતી. પોલીસે કાર માલિક અને ચાલક અરકાન તિરમિઝીને પોલીસ સ્ટેશન બોલાવીને કાર જપ્ત કરી હતી અને તેની સામે ગુનાહિત બેદરકારી અને લોકોના જીવ જોખમમાં મૂકવા બદલ ગુનો નોંધી તેની ધરપકડ કરી હતી.
અરજી પરત ખેંચવા પાયલટે કર્યા ધમપછાડા
પોલીસ ફરિયાદ અને અરજીની જાણ થતાં જ કારચાલક અરકાન તિરમિઝીએ અરજી કરનાર યુવક શ્રેયાંશનો સંપર્ક કર્યો હતો. તેણે પોતાની ઓળખ એક કમર્શિયલ પાયલટ તરીકે આપી હતી અને કબૂલાત કરી હતી કે ઘટના સમયે કારની સ્પીડ ૧૧૦ કિમી/કલાકની હતી. પાયલટે શ્રેયાંશ પર અરજી પરત ખેંચવા માટે ભારે સેટલમેન્ટ અને ધમપછાડા કર્યા હતા, પરંતુ યુવકે કાયદાકીય માર્ગ અપનાવવાનું ચાલુ રાખ્યું હતું. પોલીસ હાલમાં ૩૦૦ કિમી/કલાકની સ્પીડે કાર ચલાવતા અન્ય વાયરલ વિડિયો અંગે પણ ઊંડાણપૂર્વક તપાસ કરી રહી છે.
અમદાવાદમાં સ્ટંટ અને ઓવરસ્પીડિંગ સામે પોલીસનું કડક વલણ
ડેશકેમ ટેકનોલોજીની મદદ: આ કિસ્સાએ સાબિત કર્યું છે કે, વાહનોમાં લગાડેલા ડેશકેમ કેમેરા ગુનાઓ અને રસ્તા પરના સ્ટંટબાજોને પકડવામાં કેટલા ઉપયોગી સાબિત થાય છે.
સિટી સર્વેલન્સ અને CCTV: અમદાવાદ ટ્રાફિક પોલીસ હવે સ્માર્ટ સિટીના સીસીટીવી (CCTV) અને એઆઈ (AI) કેમેરાની મદદથી રસ્તા પર રફ ડ્રાઈવિંગ કરતા ચાલકો સામે ઈ-મેમો અને સીધા કાનૂની પગલાં ભરી રહી છે.
મોટર વાહન કાયદો (Motor Vehicles Act): બેદરકારીપૂર્વક વાહન ચલાવવા (Reckless Driving) બદલ ભારે દંડ ઉપરાંત ડ્રાઈવિંગ લાયસન્સ રદ કરવા સુધીની જોગવાઈઓ કાયદામાં કરવામાં આવી છે.
