Ahmedabad News: અમદાવાદમાં ક્રિસમસ અને નવા વર્ષની ઉજવણી દરમિયાન હવાનું પ્રદૂષણ ન વધે અને આગની કોઈ દુર્ઘટના ન સર્જાય તે માટે પોલીસ કમિશ્નરે જાહેરનામું બહાર પાડ્યું છે. શહેરની શાંતિ અને સલામતી જળવાઈ રહે તે હેતુથી ફટાકડાના ઉપયોગ, વેચાણ અને ઉત્પાદન પર કડક નિયંત્રણો લાદવામાં આવ્યા છે. પોલીસના આદેશ મુજબ, આ વર્ષે અમદાવાદીઓએ માત્ર 'ગ્રીન ફટાકડા' સાથે જ ઉજવણી કરવી પડશે. નિયમોનું ઉલ્લંઘન કરનારા સામે કાયદેસરની કાર્યવાહી કરવાની ચીમકી પણ આપવામાં આવી છે.
રાત્રે 11:55 થી 12:30 સુધી જ આતશબાજીની મંજૂરી
નવા વર્ષને આવકારવા માટે આતુર અમદાવાદીઓ માટે સમયની મર્યાદા નક્કી કરવામાં આવી છે. નાતાલ અને નવા વર્ષની પૂર્વ સંધ્યાએ એટલે કે 31મી ડિસેમ્બરની મધરાત્રે માત્ર 35 મિનિટ (રાત્રે 11:55 થી 12:30 વાગ્યા સુધી) માટે જ ફટાકડા ફોડવાની છૂટ આપવામાં આવી છે. નિર્ધારિત સમય બાદ ફટાકડા ફોડનાર સામે જાહેરનામા ભંગનો ગુનો નોંધવામાં આવશે. આ નિર્ણય પાછળનો મુખ્ય ઉદ્દેશ્ય મોડી રાત્રે થતા અવાજના પ્રદૂષણને રોકવાનો અને નાગરિકોની ઊંઘમાં ખલેલ ન પહોંચે તે જોવાનો છે.
ઓનલાઇન ફટાકડા વેચાણ પર પ્રતિબંધ
સુપ્રીમ કોર્ટના આદેશોને ટાંકીને પોલીસ કમિશનરે સ્પષ્ટ કર્યું છે કે, સ્વાસ્થ્ય માટે અત્યંત હાનિકારક એવા બેરીયમયુક્ત ફટાકડા અને અવાજનું પ્રદૂષણ ફેલાવતી 'ફટાકડાની લડી' પર સંપૂર્ણ પ્રતિબંધ રહેશે. આ ઉપરાંત, ઈ-કોમર્સ વેબસાઈટ દ્વારા ફટાકડાના ઓનલાઇન વેચાણ પર પણ રોક લગાવી દેવામાં આવી છે. શહેરમાં માત્ર લાયસન્સ ધરાવતા વેપારીઓ જ PESO (Petroleum and Explosives Safety Organization) દ્વારા માન્યતા પ્રાપ્ત ગ્રીન ફટાકડા વેચી શકશે. વિદેશી અને ખાસ કરીને ચાઈનીઝ ફટાકડાના વેપાર પર પણ લાલ આંખ કરવામાં આવી છે.
હોસ્પિટલ અને શાળાઓ પાસે આતશબાજી પર મનાઈ
શહેરમાં જાહેર સ્વાસ્થ્યને પ્રાધાન્ય આપતા હોસ્પિટલ, નર્સિંગ હોમ, શૈક્ષણિક સંસ્થાઓ, અદાલતો અને ધાર્મિક સ્થળોની આસપાસના 100 મીટરના વિસ્તારને 'સાયલન્ટ ઝોન' જાહેર કરવામાં આવ્યો છે. આ વિસ્તારોમાં કોઈપણ પ્રકારના ફટાકડા ફોડવાની સખત મનાઈ રહેશે. દર્દીઓ અને વૃદ્ધોને ફટાકડાના અવાજથી તકલીફ ન પડે તે માટે પોલીસ દ્વારા આ વિસ્તારોમાં ખાસ પેટ્રોલિંગ પણ રાખવામાં આવશે.
સંવેદનશીલ સ્થળો પર બાજ નજર
શહેરમાં આગની દુર્ઘટનાઓ રોકવા માટે પેટ્રોલ પંપ, ગેસ સ્ટોરેજ ડેપો અને ગીચ બજારો જેવા સંવેદનશીલ વિસ્તારોમાં આતશબાજી કરવા પર પ્રતિબંધ મુકાયો છે. ખાસ કરીને હવામાં ઉડતા 'ચાઈનીઝ તુક્કલ' ના ઉત્પાદન અને વેચાણ પર સંપૂર્ણ પ્રતિબંધ છે. આ તુક્કલના કારણે અગાઉ અનેક જગ્યાએ આગ લાગવાના કિસ્સાઓ બન્યા હોવાથી, આ વર્ષે તેના ઉપયોગ પર પોલીસ સખત છે. જો કોઈ વ્યક્તિ તુક્કલ ઉડાડતા પકડાશે, તો તેની સામે કડક કાયદેસરની કાર્યવાહી કરવામાં આવશે.
સુરક્ષિત ઉજવણી કરી વહીવટી તંત્રને સહકાર આપો
અમદાવાદ પોલીસ દ્વારા નાગરિકોને અપીલ કરવામાં આવી છે કે તેઓ આ નિયમોનું ચુસ્તપણે પાલન કરે અને પર્યાવરણને નુકસાન ન પહોંચે તે રીતે તહેવારોની ઉજવણી કરે. પોલીસ કંટ્રોલ રૂમ અને સ્થાનિક પોલીસ સ્ટેશનોને જાહેરનામાના અમલીકરણ માટે એલર્ટ કરી દેવામાં આવ્યા છે. શહેરના મુખ્ય માર્ગો અને ઉજવણીના સ્થળો પર સીસીટીવી કેમેરા દ્વારા પણ મોનિટરિંગ કરવામાં આવશે. આપણી એક નાની ભૂલ કે બેદરકારી કોઈ મોટી જાનહાનિનું કારણ ન બને તે માટે જાગૃત રહેવા જણાવાયું છે.
