Ahmedabad Naroda Police Constable Suspended: અમદાવાદના નરોડા પોલીસ સ્ટેશનમાં બુટલેગર સાથે કથિત રીતે રૂપિયા 3થી 3.50 લાખમાં કેસનું સેટલમેન્ટ કરવાની વાતચીતનો વીડિયો/ઓડિયો વાયરલ થયા બાદ પોલીસ તંત્રમાં ખળભળાટ મચ્યો છે. સમગ્ર મામલે નરોડા પોલીસ સ્ટેશનના ડી-સ્ટાફમાં ફરજ બજાવતા અનાર્મ્ડ પોલીસ કોન્સ્ટેબલ જનકભાઈ પુંજાભાઈ (બકલ નંબર 4606)ને પોલીસ કમિશનરના આદેશથી તાત્કાલિક અસરથી સસ્પેન્ડ કરવામાં આવ્યા છે. સમગ્ર પ્રકરણની તપાસ ACPને સોંપવામાં આવી છે.
દારૂની રેડ બાદ સામે આવ્યો કથિત સેટલમેન્ટનો મામલો
મળતી માહિતી મુજબ, 24 ઓગસ્ટે નરોડા પોલીસ સ્ટેશનના ડી-સ્ટાફના કર્મચારીઓ પેટ્રોલિંગમાં હતા. આ દરમિયાન નરોડા સિટી સેન્ટર પાછળ આવેલા ખુલ્લા મેદાનમાં વિદેશી દારૂ અંગે રેડ કરવામાં આવી હતી. રેડ દરમિયાન ચિરાગભાઈ ઉર્ફે ઠાકોર ઝાલા નામના વ્યક્તિને ઝડપી લેવામાં આવ્યો હતો, જ્યારે તેની સાથેના અન્ય બે આરોપીઓ ફરાર થઈ ગયા હતા. પોલીસ દ્વારા કાર, વિદેશી દારૂના 43 ક્વાર્ટર અને મોબાઈલ સહિત કુલ ₹5,18,975નો મુદ્દામાલ કબજે કરવામાં આવ્યો હતો.
બુટલેગર સાથે લાખોની વાતચીતનો કથિત વીડિયો વાયરલ
આ કાર્યવાહી બાદ વાયરલ થયેલા વીડિયો/ઓડિયોમાં જનક નામના પોલીસકર્મી અને બુટલેગર વચ્ચે કથિત વાતચીત સાંભળવા મળે છે. તેમાં કેસનું સેટલમેન્ટ કરવા માટે મોટી રકમની ચર્ચા થતી હોવાનો દાવો કરવામાં આવ્યો છે. વાયરલ થયેલી વાતચીતમાં કથિત પોલીસકર્મી દ્વારા ₹3 લાખ સુધીમાં મામલો પતાવવાનો પ્રયાસ કરવાની વાત કરવામાં આવી હોવાનું સામે આવ્યું છે. બીજી તરફ, પોલીસકર્મી કથિત રીતે કોઈ 'સાહેબ' દ્વારા વધુ મોટી રકમની માંગણી કરવામાં આવી હોવાનો પણ ઉલ્લેખ કરે છે. જો, કે વાયરલ ઓડિયો/વીડિયોમાં કરવામાં આવેલા દાવાઓની સત્યતા અને તેમાં અન્ય કોઈ પોલીસ અધિકારીની ભૂમિકા છે કે નહીં તે તપાસ બાદ જ સ્પષ્ટ થશે.
વાયરલ વાતચીતમાં 'સાહેબ'ના નામે મોટી રકમની ચર્ચા
વાયરલ થયેલી વાતચીતમાં એક તરફથી ₹1.50 લાખમાં મામલો પતાવવાની વાત કરવામાં આવે છે, જ્યારે બીજી તરફથી આ રકમ ઓછી હોવાનું કહેવામાં આવે છે. વાતચીત દરમિયાન ₹6થી ₹8 લાખ સુધીની રકમની માંગણીનો પણ કથિત ઉલ્લેખ થયો છે. આ સમગ્ર મામલામાં સૌથી મોટો સવાલ એ છે કે વાતચીતમાં વારંવાર ઉલ્લેખ કરવામાં આવેલા 'સાહેબ' કોણ છે? જોકે, આ અંગે હાલ કોઈ અધિકારી સામે સીધો આરોપ સાબિત થયો નથી અને તપાસ પૂર્ણ થયા બાદ જ હકીકત સામે આવશે.
નવા PIના ધ્યાને વીડિયો આવતા તપાસ શરૂ
નરોડા પોલીસ સ્ટેશનના PI બી.એમ. કાતરિયાએ જણાવ્યું હતું કે વાયરલ વીડિયો તેમના ધ્યાને આવ્યો છે. જનક નામનો પોલીસકર્મી નરોડા પોલીસ સ્ટેશનમાં ફરજ બજાવે છે અને વીડિયો સામે આવ્યા બાદ તેને પૂછપરછ માટે બોલાવવામાં આવ્યો હતો. PIએ સ્પષ્ટ કર્યું કે જો તપાસમાં પોલીસકર્મીની ભૂમિકા સામે આવશે તો તેની સામે શિક્ષાત્મક કાર્યવાહી કરવામાં આવશે અને ઉચ્ચ અધિકારીઓને પણ જાણ કરવામાં આવશે. બીજી તરફ, DCP ઝોન-4 અતુલ બંસલે જણાવ્યું કે આ મામલો તેમના ધ્યાનમાં આવ્યો છે કે નહીં તે અંગે તપાસ ચાલી રહી છે અને સમગ્ર બાબતની તપાસ કરવામાં આવી રહી છે.
સસ્પેન્શન બાદ હવે તપાસનો દોર
કોન્સ્ટેબલ જનકભાઈને સસ્પેન્ડ કર્યા બાદ હવે તપાસમાં વાયરલ ઓડિયો/વીડિયોની સત્યતા, વાતચીતમાં સામેલ વ્યક્તિઓ અને કથિત નાણાકીય સેટલમેન્ટ પાછળ કોઈ અન્ય વ્યક્તિ કે અધિકારીની ભૂમિકા હતી કે નહીં તે અંગે તપાસ થઈ શકે છે. હાલમાં કોન્સ્ટેબલ સામે સસ્પેન્શનની કાર્યવાહી થઈ છે. જોકે, વાયરલ વાતચીતમાં ઉલ્લેખાયેલા અન્ય અધિકારીઓ અથવા વ્યક્તિઓની ભૂમિકા અંગે તપાસ પૂર્ણ થયા પહેલાં કોઈ નિષ્કર્ષ પર પહોંચવું યોગ્ય નહીં ગણાય.
