Ahmedabad Mumbai Bullet Train: અમદાવાદ અને મુંબઈ વચ્ચે દોડનારી બુલેટ ટ્રેનમાં મુસાફરોની સુરક્ષા માટે જાપાનની શિંકાનસેન હાઈસ્પીડ રેલ ટેક્નોલોજી આધારિત ભૂકંપ સુરક્ષા વ્યવસ્થા લાગુ કરવામાં આવી રહી છે. 508 કિલોમીટર લાંબા હાઈસ્પીડ રેલ કોરિડોર પર કુલ 28 સિસ્મોમીટર લગાવવામાં આવશે. આ ઉપકરણો ભૂકંપની શરૂઆતમાં જમીનમાં ઉત્પન્ન થતી પ્રાથમિક ‘પી’ વેવને ઝડપથી ઓળખી શકે છે.
ભૂકંપના સંકેત મળતાં જ ટ્રેન રોકાઈ જશે
સિસ્મોમીટર દ્વારા ભૂકંપના સંકેતો મળતાં જ અર્લી અર્થક્વેક ડિટેક્શન સિસ્ટમ સક્રિય થઈ જશે. ત્યારબાદ અસરગ્રસ્ત રેલવે વિભાગમાં બુલેટ ટ્રેનનો વીજ પુરવઠો આપોઆપ બંધ કરવાની પ્રક્રિયા શરૂ થશે. વીજ પુરવઠો બંધ થતાં તે વિસ્તારમાં દોડી રહેલી 320 કિમી પ્રતિ કલાકની ઝડપવાળી ટ્રેનને ઇમરજન્સી બ્રેકિંગ સિસ્ટમ દ્વારા રોકવામાં આવશે. આ સમગ્ર વ્યવસ્થાનો હેતુ ભૂકંપની ગંભીર અસર શરૂ થાય તે પહેલાં ટ્રેનને સુરક્ષિત રીતે અટકાવવાનો છે.
ગુજરાત અને મહારાષ્ટ્રમાં 6 સિસ્મોમીટર
કુલ 28 સિસ્મોમીટરમાંથી 6 સિસ્મોમીટર ગુજરાત અને મહારાષ્ટ્રના ભૂકંપ સંવેદનશીલ વિસ્તારોમાં સ્થાપિત કરવામાં આવશે. ભૂકંપની હિલચાલ અંગે શરૂઆતમાં જ સંકેત મળી જાય તે માટે આ સિસ્મિક મોનિટરિંગ સિસ્ટમ મહત્વપૂર્ણ ભૂમિકા ભજવશે. અમદાવાદ-મુંબઈ હાઈસ્પીડ રેલ પ્રોજેક્ટમાં જાપાનની શિંકાનસેન ટેક્નોલોજી અને સુરક્ષા પદ્ધતિઓનો ઉપયોગ કરવામાં આવી રહ્યો છે. આ વ્યવસ્થાથી હાઈસ્પીડ ટ્રેન સેવા દરમિયાન ભૂકંપ જેવી કુદરતી આપત્તિ સામે મુસાફરોની સુરક્ષા વધુ મજબૂત બનાવવાનો પ્રયાસ કરવામાં આવી રહ્યો છે.
