Ahmedabad Canal Suicide Case: અમદાવાદમાં પત્નીના અફેર અને દગાથી ત્રસ્ત થઈને એક 30 વર્ષીય યુવકે પોતાના 7 વર્ષના માસૂમ પુત્ર સાથે ગાંધીનગર નજીક આવેલી અડાલજ નર્મદા કેનાલમાં ઝંપલાવીને જીવન ટૂંકાવી લીધું હોવાની અત્યંત આઘાતજનક ઘટના સામે આવી છે. 30 વર્ષીય શોએબ નામના યુવકે કેનાલમાં કૂદતા પહેલાં 44 સેકન્ડનો એક અંતિમ વીડિયો બનાવ્યો હતો. જેમાં તેણે પોતાની પત્ની મુસ્કાન અને તેના બોયફ્રેન્ડ મહેન્દ્ર દ્વારા મળેલા દગાનો ઉલ્લેખ કર્યો હતો. આ કરુણ ઘટનાના 12 દિવસ બાદ મૃતકના પિતાની ફરિયાદના આધારે કલોલ તાલુકા પોલીસે મૃતકની પત્ની, તેના પ્રેમી અને અન્ય મદદગારો સહિત કુલ છ લોકો વિરુદ્ધ આપઘાતની દુષ્પ્રેરણાનો ગુનો નોંધી વધુ તપાસ હાથ ધરી છે.
લગ્નજીવનમાં કંકાશ અને પત્નીનું પિયર જતા રહેવું
પ્રાપ્ત વિગતો અનુસાર સુલેમાનભાઈ જાદવના પુત્ર સોએબના લગ્ન આશરે આઠ વર્ષ પહેલાં શેહલા ગામ ખાતે રહેતા યાશીનભાઈની પુત્રી મુસ્કાન સાથે થયા હતા. સોએબ વ્યવસાયે ડ્રાઇવિંગ કરતો હતો અને લગ્નજીવન દરમિયાન તેમને સંતાનમાં ઉજેર નામનો 7 વર્ષનો પુત્ર થયો હતો. જોકે, લગ્નના થોડા સમય બાદ જ દંપતી વચ્ચે અવારનવાર ઘર કંકાશ શરૂ થયો હતો. છેલ્લા છ મહિનાથી મુસ્કાન પોતાના પતિથી રિસાઈને પિયર જતી રહી હતી. પત્નીના ઘર છોડીને જતા રહેવાના કારણે સોએબ ભારે માનસિક તણાવમાં રહેતો હતો અને પોતાના પિતાના ઘરની પાછળ ભાડેથી રહેતો હોવાથી તે પિતા સાથે રહેવા આવી ગયો હતો.
30 ઓગસ્ટે પુત્રને ફેરવવાના નામે નીકળ્યો અને કેનાલ પર પહોંચ્યો
ગત 30 ઓગસ્ટના રોજ રાત્રે આશરે અગિયાર વાગ્યે સોએબે પોતાના પિતા પાસે બાઇકની ચાવી માગી હતી અને પુત્ર ઉજેરને બાઇક પર ચક્કર મરાવીને પાછો આવું છું તેમ કહીને ઘરથી નીકળ્યો હતો. મોડી રાત સુધી પિતા-પુત્ર પરત ન ફરતાં પરિવારજનો ચિંતામાં મુકાયા હતા. પરિવારજનોએ સોએબની પત્ની મુસ્કાનને ફોન કરીને પૂછપરછ કરી હતી, પરંતુ તેણે સોએબ ત્યાં ન આવ્યો હોવાનું જણાવ્યું હતું. ત્યારબાદ મુસ્કાને સોએબના નંબર પર ફોન કરતાં અડાલજ પોલીસ સ્ટેશનના કર્મચારીએ ફોન ઉપાડ્યો હતો અને અડાલજ કેનાલ પાસેથી સોએબનું બાઇક તથા મોબાઇલ ફોન મળી આવ્યા હોવાની માહિતી આપી હતી.
કેનાલમાંથી માસૂમ પુત્ર અને પિતાના મૃતદેહ મળી આવ્યા
પોલીસ પાસેથી માહિતી મળતાં જ પરિવારજનો અડાલજ કેનાલ પર દોડી ગયા હતા અને ફાયર બ્રિગેડની મદદથી બંનેની શોધખોળ શરૂ કરી હતી. 31 ઓગસ્ટના રોજ કડી નજીક આવેલી કેનાલમાંથી 7 વર્ષના માસૂમ ઉજેરનો મૃતદેહ મળી આવ્યો હતો, જ્યારે 1 સપ્ટેમ્બરના રોજ પિયજ નર્મદા કેનાલમાંથી સોએબનો મૃતદેહ મળી આવ્યો હતો. પોલીસે અકસ્માતે મોતનો ગુનો નોંધી કાર્યવાહી હાથ ધરી હતી પરંતુ, આ કેસમાં સાચો વળાંક ત્યારે આવ્યો જ્યારે પરિવારજનોએ પોલીસ સ્ટેશનમાં જમા થયેલો સોએબનો મોબાઈલ ફોન મેળવીને તેની તપાસ કરી હતી.
અંતિમ વીડિયો અને વોટ્સએપ ચેટ્સથી ફૂટ્યો ભાંડો
સોએબના મોબાઈલમાંથી એક 44 સેકન્ડનો રેકોર્ડ કરેલો વીડિયો મળી આવ્યો હતો. કેનાલમાં પડતાં પહેલાં અંધારામાં બનાવેલા આ વીડિયોમાં સોએબનો અવાજ સ્પષ્ટ સંભળાતો હતો. વીડિયોમાં સોએબે કહ્યું હતું કે, "અમે અડાલજની કેનાલમાં મરવા આવ્યા છીએ. અમારા મરવાનું કારણ મુસ્કાન અને તેના બોયફ્રેન્ડ મહેન્દ્રએ આપેલો ધોકો છે. આ સિવાય તેમને સાથ આપનારી નિકિતા, જયેશ, તેની મોટી બહેન પરી અને ગોતાની આરતી જવાબદાર છે. આ પહેલાં પણ તેણે મને દગો આપ્યો હતો પરંતુ, મેં તેને માફ કરી રાખી લીધી હતી પરંતુ, બીજી વારનો દગો સહન ન થતાં મેં આ કદમ ઉઠાવ્યું છે." આ ઉપરાંત તેના ફોનમાંથી મુસ્કાન અને તેના બોયફ્રેન્ડના ફોટા તથા ચેટ્સ પણ મળી આવ્યા હતા. જેના આધારે પોલીસે છ લોકો સામે ગુનો નોંધ્યો છે.
દાંપત્ય જીવનમાં તણાવ અને ડિપ્રેશન વખતે કાઉન્સેલિંગનું મહત્વ
સામાજિક અને મનોવૈજ્ઞાનિક નિષ્ણાતોના મતે, હાલના સમયમાં પતિ-પત્ની વચ્ચેના અવિશ્વાસ, આડા સંબંધો અને ડિજિટલ યુગમાં સોશિયલ મીડિયાના કારણે કૌટુંબિક સંબંધોમાં ભારે તિરાડ પડી રહી છે. જ્યારે દાંપત્ય જીવનમાં આ પ્રકારનો તણાવ ઊભો થાય છે ત્યારે વ્યક્તિ તીવ્ર માનસિક આઘાત અને ડિપ્રેશનનો શિકાર બને છે. આવી સ્થિતિમાં આવેગમાં આવીને કોઈ અનિચ્છનીય પગલું ભરવાને બદલે અથવા માસૂમ બાળકોને તેનો ભોગ બનાવવાને બદલે કાનૂની માર્ગ અપનાવવો અથવા મેરેજ કાઉન્સેલર અને માનસિક આરોગ્ય નિષ્ણાતોની મદદ લેવી ખૂબ જ જરૂરી છે.
