Ahmedabad Liquor Party Video: ગુજરાતમાં દારૂબંધી હોવા છતાં અમદાવાદમાં દારૂ અને બિયરની ખુલ્લેઆમ મહેફિલ યોજાઈ હોવાનો વીડિયો સોશિયલ મીડિયા પર વાઈરલ થયો છે. વીડિયોમાં કેટલાક લોકો મોટી પવાલીમાં બરફ, લીંબુ, ફ્રૂટ, દારૂ અને કોલ્ડ્રિંક મિક્સ કરીને પીણું તૈયાર કરતા જોવા મળે છે. ત્યારબાદ યુવક-યુવતીઓ એકસાથે ચિયર્સ કરીને દારૂ પીતા નજરે પડે છે. એટલું જ નહીં, એક મહિલા હાથમાં બિયરનું ટીન લઈને ગીત પર ડાન્સ કરતી પણ જોવા મળે છે.
સરદારનગર પોલીસ સ્ટેશનની હદનો હોવાનો દાવો
વાઈરલ વીડિયો અમદાવાદના સરદારનગર પોલીસ સ્ટેશનની હદમાં આવેલી નંદીગ્રામ સોસાયટી નજીકના શિવ બંગ્લોઝનો હોવાનું જાણવા મળ્યું છે. જોકે, આ વીડિયો અંગે હજુ સુધી કોઈ સ્પષ્ટતા કરવામાં આવી નથી.

મોટી પવાલીમાં બરફ, લીંબુ અને ફ્રૂટ નાખી દારૂ તૈયાર કર્યો
સોશિયલ મીડિયા પર વાઈરલ થયેલા વીડિયોમાં પ્રસંગ દરમિયાન મોટી પવાલીમાં બરફ, લીંબુ અને કાપેલાં ફ્રૂટ નાખવામાં આવે છે. ત્યારબાદ તેમાં દારૂની બોટલો અને અન્ય કોલ્ડ્રિંક ઠાલવવામાં આવે છે. આ રીતે પીણું તૈયાર થયા બાદ યુવક-યુવતીઓ ભેગા થઈને ચિયર્સ કરતા અને દારૂ પીતા જોવા મળે છે. વીડિયોમાં વોડકા પ્રકારનું પીણું તૈયાર કરીને મહેફિલ માણવામાં આવી હોવાનું જણાય છે. દારૂ બનાવવાની તૈયારીથી લઈને પીવા સુધીની સમગ્ર પ્રક્રિયાના વીડિયો સોશિયલ મીડિયા પર પોસ્ટ કરવામાં આવ્યા હતા.

'તેરે પ્યાર મેં' ગીત પર બિયર સાથે મહિલાનો ડાન્સ
આ ઘટનાનો બીજો વીડિયો પણ સોશિયલ મીડિયા પર વાઈરલ થયો છે. જેમાં એક મહિલા હાથમાં બિયરનું ટીન લઈને લોકોની વચ્ચે ડાન્સ કરતી જોવા મળે છે. 'તેરે પ્યાર મેં' અને 'દિલ ચાહતા હૈ' ગીતો પર મહિલાનો ડાન્સ જોવા મળી રહ્યો છે. આ ઉપરાંત, એક મહિલા સહિત કેટલાક લોકો દારૂ ચાખતા હોવાના દૃશ્યો પણ વીડિયોમાં કેદ થયા છે. આ વીડિયો ઈન્સ્ટાગ્રામ પર પોસ્ટ કરવામાં આવ્યા હોવાનું સામે આવ્યું છે.

દારૂબંધી વચ્ચે સોશિયલ મીડિયા પર વીડિયો વાયરલ
ગુજરાતમાં દારૂબંધી અમલમાં હોવા છતાં અમદાવાદમાં આ પ્રકારના વીડિયો સામે આવતાં પોલીસની કામગીરી સામે સવાલો ઊભા થયા છે. દારૂની મહેફિલ અને બિયર સાથે ડાન્સના વીડિયો સોશિયલ મીડિયા પર પોસ્ટ કરીને જાણે પોલીસને ખુલ્લો પડકાર આપવામાં આવ્યો હોય તેવાં દૃશ્યો જોવા મળ્યાં છે. શહેરના અલગ-અલગ પોલીસ સ્ટેશન વિસ્તારોમાં દારૂના વેચાણ અને મહેફિલના વીડિયો વારંવાર સામે આવતા હોવાની ચર્ચા છે. એક તરફ પોલીસ ડ્રગ્સના વેચાણ સામે કાર્યવાહી કરી રહી છે, ત્યારે બીજી તરફ દારૂના આવા વીડિયો સામે આવતાં સ્થાનિક પોલીસ અને સંબંધિત એજન્સીઓની કામગીરી સામે પણ સવાલો ઊભા થયા છે.








