Ahmedabad Superstition Crime Case: અમદાવાદ શહેરના કુબેરનગર વિસ્તારમાંથી અંધશ્રદ્ધા અને શારીરિક શોષણનો એક અત્યંત શરમજનક કિસ્સો સામે આવ્યો છે. અહીં રહેતા એક સામાન્ય પરિવારમાં છેલ્લા કેટલાક સમયથી ભારે આર્થિક તંગી ચાલી રહી હતી અને ઘરમાં સાસુ પણ સતત બીમાર રહેતા હતા. આ મુશ્કેલીઓમાંથી બહાર નીકળવા માટે પરિવારે શ્રદ્ધાના નામે અંધશ્રદ્ધાનો માર્ગ અપનાવ્યો હતો. તેમણે આ સમસ્યાઓના ઉકેલ માટે મહાજનવાસ વિસ્તારમાં રહેતા અને મેલડી માતાના ભુવા તરીકે પોતાની ઓળખ આપતા દીપક પરમારનો સંપર્ક કર્યો હતો.
પૂજા અને વિધિના નામે ખતરનાક શરતો
ગત 3 ઓક્ટોબરની સાંજે ઢોંગી ભુવો દીપક પરમાર પીડિત પરિણીતાના ઘરે પહોંચ્યો હતો. તેણે ઘરના મંદિરમાં જઈને સફેદ કપડું બાંધ્યું, માળા જોઈ અને દાણા ફેંકીને પરિવારને ડરાવવાનો ખેલ શરૂ કર્યો હતો. તેણે દાવો કર્યો હતો કે 27 વર્ષીય પરિણીતા પર કોઈ બહારનું વળગણ છે અને તેને દૂર કરવા માટે ઘરના ઉપરના રૂમમાં એકલામાં જઈને ખાસ વિધિ કરવી પડશે. પરિવારના સભ્યો તેના આ ઝાંસામાં આવી ગયા હતા.
શારીરિક અડપલાં અને રૂપિયાની માંગણી
ભુવો પરિણીતાને ઉપરના માળે લઈ ગયો હતો અને ત્યાં પલંગ પર બેસાડી તેના માથે લીંબુ ફેરવી પાણીના છાંટા નાખ્યા હતા. આ દરમિયાન તેણે મહિલા સાથે શારીરિક અડપલાં કર્યા હતા. ત્યારબાદ નદીએ જઈ સ્નાન કરાવવાની વિધિ માટે તેણે 25 હજાર રૂપિયાની માંગણી કરી હતી, પરંતુ અંતે 17 હજાર રૂપિયા નક્કી કરવામાં આવ્યા હતા. દંપતીને નદી કિનારે લઈ જઈ સ્નાન કરાવ્યા બાદ તે રાત્રે ફરી તેમના ઘરે પહોંચ્યો હતો.
પતિને બહાર મોકલી આચર્યું જઘન્ય કૃત્ય
ઘરે આવીને ભુવાએ રાત્રિના સમયે ફરીથી પરિણીતાને ઉપરના રૂમમાં બેસાડી હતી. તે સમયે તેણે પરિણીતાના પતિના હાથમાં એક લીંબુ આપ્યું અને 'આને તરત જ ચાર રસ્તા પર મૂકી આવો' તેમ કહીને ઘરની બહાર મોકલી દીધો હતો. પતિ જેવો જ બહાર ગયો કે તરત જ એકલતાનો ગેરલાભ ઉઠાવીને ઢોંગી ભુવા દીપક પરમારે પરિણીતા સાથે દુષ્કર્મ આચર્યું હતું.
ધમકીઓ અને પોલીસ ફરિયાદ
દુષ્કર્મ આચર્યા બાદ હવસખોર ભુવાએ મહિલાને ધમકી આપી હતી કે જો આ અંગે કોઈને વાત કરીશ તો તારા પરિવાર પર 'મેલી વિદ્યા કરી નાખીશ'. આ ઘટના બાદ ડરેલા પરિવારે શરૂઆતમાં સામાજિક બદનામીના ડરે સમાજના પંચમાં રજૂઆત કરી હતી. પરંતુ ત્યાંથી કોઈ યોગ્ય ઉકેલ ન મળતાં આખરે ભોગ બનનાર પરિણીતાએ સરદારનગર પોલીસ સ્ટેશનમાં ગુનો નોંધાવ્યો હતો. પોલીસે આરોપી સામે કાયદેસરની કાર્યવાહી હાથ ધરી તપાસ તેજ કરી છે.
