Ahmedabad Gym Lounge Owner Cheated of Rs 1.66 Crore: અમદાવાદ શહેરની જાણીતી 'જિમ લોન્જ'ના માલિક વિજય સેંગર (રહે. સુઘડ, ગાંધીનગર) સાથે તેમના જ વિશ્વાસુ કર્મચારીઓએ ₹1.66 કરોડની મોટી ઠગાઈ આચરી હોવાની ચોંકાવનારી વિગત સામે આવી છે. સમગ્ર મામલાની વિગત મુજબ, જિમ લોન્જના 10 વર્ષ પૂર્ણ થવાના અવસરે ગ્રાહકો માટે 1 જુલાઈથી 10 જુલાઈ દરમિયાન એક આકર્ષક ઓફર લોન્ચ કરવામાં આવી હતી. આ સ્કીમ હેઠળ ગ્રાહકોને માત્ર ₹10,000માં 10 વર્ષ માટેની જિમ મેમ્બરશિપ આપવામાં આવતી હતી. આ નિયત સમયમર્યાદામાં ઘણી મેમ્બરશિપ વેચાઈ હતી અને 10 જુલાઈએ સ્કીમ વિધિવત રીતે બંધ કરી દેવામાં આવી હતી.
માલિકની ગેરહાજરીનો મેનેજરોએ ખોટો લાભ ઉઠાવ્યો
આ સ્કીમ પૂર્ણ થયા બાદ જિમના માલિક વિજય સેંગર પોતાના બીજા એક નવા બિઝનેસ પ્રોજેક્ટના અગત્યના કામકાજ અર્થે બે મહિના માટે અમદાવાદ બહાર ગયા હતા. જિમના દૈનિક વહીવટમાં કોઈ તકલીફ ન પડે તે માટે તેમણે જિમના સેન્ટર હેડ જૈનિશ શુક્લા અને બ્રાન્ચ મેનેજર મનીષ શર્માને સમગ્ર સંચાલન સોંપ્યું હતું. જોકે, માલિકની ગેરહાજરીનો આ બંને કર્મચારીઓએ ગેરફાયદો ઉઠાવવાનું શરૂ કર્યું હતું. તેમણે માલિકને અંધારામાં રાખીને બંધ થઈ ગયેલી 10 વર્ષ વાળી ઓફરને ગેરકાયદેસર રીતે ચાલુ જ રાખી હતી.
ગ્રાહકો પાસેથી રોકડા અને UPIથી કરોડો રૂપિયા પડાવ્યા
મેનેજર મનીષ શર્માએ એજન્ટ તરીકે કામ કરીને અનેક જુના અને નવા ગ્રાહકોનો સંપર્ક કર્યો હતો અને તેમને આકર્ષક ઓફર સમજાવીને સસ્તા ભાવે મેમ્બરશિપ વહેંચવાનું શરૂ કર્યું હતું. આ મેમ્બરશિપના બદલામાં ગ્રાહકો પાસેથી મોટા પ્રમાણમાં રોકડ રકમ તેમજ UPI દ્વારા નાણાં મેળવી લેવામાં આવ્યા હતા. આ મામલે સ્ટાફના અન્ય કર્મચારીઓને પણ શંકા ન જાય તે રીતે ગેરમાર્ગે દોરવામાં આવ્યા હતા. ગ્રાહકોને નાણાં ચૂકવ્યા બદલ પહોંચ પણ આપવામાં આવતી હતી, પરંતુ તે રકમ જિમના અધિકૃત બેન્ક ખાતામાં જમા કરવામાં આવતી નહોતી.
નકલી ભાગીદારી એગ્રીમેન્ટ બનાવી અલગ બેન્ક ખાતું ખોલાવ્યું
કૌભાંડને વધુ મોટું રૂપ આપવા અને ગ્રાહકોનો વિશ્વાસ જીતવા માટે જૈનિશ શુક્લાએ પોતાની પત્ની ભારતી શુક્લા સાથે મળીને એક નવો પ્લાન રચ્યો હતો. તેમણે જિમ લોન્જમાં પોતે ભાગીદાર હોવાનો એક બોગસ એગ્રીમેન્ટ તૈયાર કરાવ્યો હતો. આ બોગસ કાગળોના આધારે તેમણે જિમ લોન્જના નામને મળતું આવતું એક અલગ જ બેન્ક એકાઉન્ટ ખોલાવી લીધું હતું. ગ્રાહકો પાસેથી મેળવેલા તમામ રોકડા અને UPI નાણાં આ નકલી ખાતામાં જમા કરાવીને ત્રણેય જણાએ ભેગા મળીને ₹1.66 કરોડ સગેવગે કરી લીધા હતા.
માલિક પરત ફરતા કૌભાંડનો પર્દાફાશ થયો
જ્યારે વિજય સેંગર 10મી સપ્ટેમ્બરના રોજ પોતાના કામ પરથી પરત ફર્યા, ત્યારે તેમણે જિમમાં એવા અનેક લોકોને વર્કઆઉટ કરતા જોયા જેમના નામ જિમના કાયદેસરના સત્તાવાર રજિસ્ટરમાં નહોતા. માલિકે કડકાઈથી તપાસ હાથ ધરતા અને ગ્રાહકોની પહોંચ ચકાસતા આખા કૌભાંડનો પર્દાફાશ થયો હતો. પોતાના જ કર્મચારીઓ દ્વારા આચરવામાં આવેલા આ વિશ્વાસઘાત અને નાણાકીય ગેરરીતિ સામે વિજય સેંગરે અમદાવાદ ક્રાઈમ બ્રાન્ચના આર્થિક ગુના નિવારણ શાખા (EOW) માં ફરિયાદ નોંધાવી છે, જેના આધારે પોલીસે કાયદેસરની તપાસ શરૂ કરી છે.
