Theft of Rs 18 Lakh Plastic Raw Material Exposed: અમદાવાદ શહેરના ઔદ્યોગિક વિસ્તાર કઠવાડા GIDCમાંથી એક ચોંકાવનારી ઘટના સામે આવી છે. અહીં આવેલી 'યેશ લેમ પ્રાઇવેટ લિમિટેડ' નામની કંપનીમાં કામ કરતા બે કર્મચારીઓએ જ કંપનીને મોટા પાયે આર્થિક ચૂનો લગાવ્યો છે. સામાન્ય રીતે કંપનીમાં લગાવેલા સીસીટીવી કેમેરા સુરક્ષા માટે હોય છે, પરંતુ જ્યારે આ કેમેરામાં ટેક્નિકલ ખામી સર્જાઈ અને તે બંધ થઈ ગયા, ત્યારે કંપની મેનેજમેન્ટે સમગ્ર પરિસરનું મેન્યુઅલ મોનિટરિંગ હાથ ધર્યું હતું. આ તપાસ દરમિયાન કંપનીના પોતાના જ બે ભરોસાપાત્ર કર્મચારીઓ રૂ. 18 લાખની કિંમતના 10 ટન વજન ધરાવતા પ્લાસ્ટિક રો-મટીરિયલના રોલ ગાયબ કરતા કેમેરાની જૂની રેકોર્ડિંગ તેમજ તપાસમાં ઝડપાઈ ગયા હતા.
‘શેઠના કહેવાથી માલ આપવા જઈએ છીએ’ કહીને રચ્યો ખેલ
બનાવની વિગતો મુજબ, કંપનીમાં એચઆર (HR) મેનેજર તરીકે ફરજ બજાવતા જશવંતસિંહ રાજપૂતે જ્યારે 27 સપ્ટેમ્બરે ટેક્નિકલ ખામી બાદ રેકોર્ડિંગની ઊંડાણપૂર્વક તપાસ કરી, ત્યારે ધર્મેન્દ્રસિંહ ચૌહાણ અને મહેશકુમાર સોલંકી નામના બે કર્મચારીઓની શંકાસ્પદ હિલચાલ નજરે પડી હતી. આ બંને શખ્સો રોજ સવારના સમયે કંપનીની જ બોલેરો ગાડી લઈને આવતા હતા. અન્ય કર્મચારીઓ જ્યારે પૂછપરછ કરે ત્યારે તેઓ ખૂબ જ ચાલાકીથી ખોટું બહાનું બતાવતા કે, ‘શેઠના કહેવાથી આ માલની ડિલિવરી કરવા માટે જઈ રહ્યા છીએ’. આમ, વિશ્વાસનો ગેરફાયદો ઉઠાવીને તેઓ દરરોજ 2 થી 3 પ્લાસ્ટિક રોલ ગાડીમાં ભરીને કંપની બહાર ચોરીછૂપીથી સરકાવી દેતા હતા.
પૂછપરછ કરી તો પાછા આપવાનો વાયદો કરીને બંને રફુચક્કર થઈ ગયા
કંપનીના માલિક પૂર્વીશભાઈ પટેલને જ્યારે આ આખી ઘટનાની જાણ થઈ, ત્યારે તેમણે ધર્મેન્દ્રસિંહ અને મહેશકુમારને બોલાવીને કડક પૂછપરછ કરી હતી. કંપની માલિક સામે આવતાં જ બંને આરોપીઓ ભાંગી પડ્યા હતા અને તેમણે સ્વીકાર્યું હતું કે તેઓ છેલ્લા બે મહિનાથી સતત આ રીતે ચોરી કરી રહ્યા છે. ચોરી પકડાઈ જતાં તેમણે વિનંતી કરી હતી કે તેઓ ચોરી કરેલા માલના તમામ નાણાં ટૂંક સમયમાં પરત ચૂકવી દેશે. જોકે, આ વાયદો કર્યા બાદ તક મળતાં જ બંને ચાલાક કર્મચારીઓ કંપની છોડીને નાસી છૂટ્યા હતા.
સ્ટોક રજિસ્ટર ચકાસતાં 35 રોલ અને 10 ટન માલ ગાયબ મળ્યો
આ ઘટના બાદ કંપની મેનેજમેન્ટે તાત્કાલિક ધોરણે સ્ટોર ઇન્ચાર્જ પાસે સમગ્ર સ્ટોક રજિસ્ટરનું રી-ઓડિટ અને ચકાસણી કરાવ્યું હતું. આ તપાસમાં ચોંકાવનારા આંકડા સામે આવ્યા હતા. છેલ્લા બે મહિનાના સમયગાળા દરમિયાન અલગ-અલગ સાઇઝના કુલ 35 જેટલા પ્લાસ્ટિક રો-મટીરિયલના રોલ ગાયબ હોવાનું સામે આવ્યું હતું. આ તમામ 35 રોલનું કુલ વજન આશરે 10 ટન જેટલું થતું હતું, જેની વર્તમાન બજાર કિંમત ₹18 લાખ જેટલી અંકાય છે.
નિકોલ પોલીસ મથકે ગુનો નોંધાયો
પોતાના કર્મચારીઓએ જ કરેલા આ વિશ્વાસઘાત અને મોટી ચોરી અંગે એચઆર મેનેજર જશવંતસિંહ રાજપૂતે નિકોલ પોલીસ મથકે ફરિયાદ નોંધાવી છે. પોલીસે ઘટના અંગે ગુનો નોંધીને બંને ફરાર આરોપીઓ ધર્મેન્દ્રસિંહ ચૌહાણ અને મહેશકુમાર સોલંકી સામે કાયદેસરની કાર્યવાહી હાથ ધરી છે. આરોપીઓ માલ ક્યાં વેચતા હતા અને આ ચોરીમાં અન્ય કોઈની સંડોવણી છે કે નહીં તે દિશામાં પણ નિકોલ પોલીસે તપાસના ચક્રો ગતિમાન કર્યા છે.
