Ahmedabad News: શહેરના દાણીલીમડા વિસ્તારમાં મોડીરાતે એક દિવ્યાંગ યુવતી પર દુષ્કર્મ આચરવાની ઘૃણાસ્પદ ઘટનાના ચાર દિવસમાં જ અમદાવાદ ક્રાઈમ બ્રાંચે માનસિક વિકૃત અને ગુનાહિત ઇતિહાસ ધરાવતા આરોપીની ધરપકડ કરીને કેસ ઉકેલી કાઢ્યો છે. આરોપીની ધરપકડ કરવા માટે પોલીસે 30થી વધુ સીસીટીવી કેમેરાના ફૂટેજ ચેક કરવા પડ્યા હતા. આ આરોપી વિરુદ્ધ અગાઉ પણ 16થી વધુ ગંભીર ગુનાઓ નોંધાયેલા છે.
26 નવેમ્બરની રાત્રે બની હતી ઘટના
આ ગંભીર ઘટના 26 નવેમ્બરની મોડી રાત્રે દાણીલીમડા વિસ્તારમાં બની હતી. વિસ્તારના એક મકાનમાં રહેતી દિવ્યાંગ યુવતી, જેની માનસિક સ્થિતિ સારી નહોતી, તે રાત્રે પોતાના મકાનમાંથી નીચે ઉતરીને રોડ પર આવી ગઈ હતી. યુવતી જ્યારે એકલી રોડ પર ચાલતી હતી, ત્યારે જમાલપુર વિસ્તારના રહેવાસી મોઈનુદ્દીન બાદશાહ નામના યુવકની નજર તેના પર પડી. દિવ્યાંગ યુવતીને એકલી જોઈને મોઈનુદ્દીનની નિયત બગડી હતી અને તેણે આ તકનો ફાયદો ઉઠાવવાનું નક્કી કર્યું.
દવાખાને લઈ જવાની લાલચ આપી દુષ્કર્મ આચર્યું
આરોપી મોઈનુદ્દીન યુવતી પાસે ગયો અને તેને પૂછ્યું કે તે ક્યાં જઈ રહી છે. યુવતીએ માનસિક સ્થિતિ નબળી હોવાને કારણે જવાબ આપ્યો કે તેને દવાખાને જવું છે. મોઈનુદ્દીને યુવતીને દવાખાને લઈ જવાની લાલચ આપી અને તેને પોતાની સાથે આવવા માટે રાજી કરી લીધી.
અંધારામાં એક અવાવરું જગ્યાએ લઈ ગયો
ત્યારબાદ મોઈનુદ્દીન આ દિવ્યાંગ યુવતીને અંધારામાં એક અવાવરું જગ્યાએ લઈ ગયો હતો. ત્યાં તેણે માનવતા નેવે મૂકીને યુવતી પર દુષ્કર્મ આચર્યું હતું. દુષ્કર્મ આચર્યા બાદ નરાધમ મોઈનુદ્દીન ત્યાંથી નાસી ગયો હતો અને યુવતી એકલી પોતાના ઘરે પરત ફરી હતી.
પીડિતાએ પરિવારને જણાવી આપવીતી
યુવતી મોડીરાતે એક કલાક પછી આપોઆપ ઘરે પાછી આવતા તેના પરિવારજનોએ રાહતનો શ્વાસ લીધો હતો, કેમ કે તેઓ યુવતી ઘરેથી ગુમ થતાં તેની શોધખોળ કરી રહ્યા હતા. ઘરે આવ્યા બાદ જ્યારે યુવતીને પેટમાં દુખાવો થયો, ત્યારે તેની માતાએ પૂછપરછ કરી. દિવ્યાંગ યુવતીએ પોતાની માતાને જે જવાબ આપ્યો તે સાંભળીને પરિવાર આઘાતમાં સરી પડ્યો હતો. યુવતીએ કહ્યું કે, "મારા પતિ જે મારી સાથે કરતા તે યુવક કરીને જતો રહ્યો." નોંધનીય છે કે યુવતી પરિણીત હતી પરંતુ માનસિક સ્થિતિ સારી ન હોવાને કારણે તેના છૂટાછેડા થઈ ગયા હતા. યુવતીના આ નિવેદન પરથી તેની માતાને સ્પષ્ટ અંદાજ આવી ગયો કે કોઈએ તેની સાથે દુષ્કર્મ કર્યું છે.
પરિવારે પોલીસ ફરિયાદ નોંધાવી
તાત્કાલિક અસરથી પરિવારે દાણીલીમડા પોલીસ સ્ટેશનમાં સમગ્ર મામલે ફરિયાદ નોંધાવી હતી. કેસની ગંભીરતા અને આરોપીને ઝડપવાની તાત્કાલિક જરૂરિયાતને ધ્યાને લઈને કેસની તપાસ અમદાવાદ ક્રાઈમ બ્રાંચને સોંપવામાં આવી હતી.
CCTVના પડછાયા પરથી આરોપી સુધી પહોંચી ક્રાઈમ બ્રાંચ
દાણીલીમડા પોલીસ સ્ટેશનમાં ગુનો દાખલ થયા બાદ, માનસિક વિકૃત અને ગુનાહિત ઇતિહાસ ધરાવતા આરોપીને શોધવો ક્રાઈમ બ્રાંચ માટે એક પડકાર હતો. ક્રાઈમ બ્રાંચની ટીમે આરોપીને ઝડપી લેવા માટે બનાવના દિવસના અને વિસ્તારના 30થી વધુ સીસીટીવી કેમેરાના ફૂટેજ ચેક કર્યા હતા. જોકે, જ્યાં દુષ્કર્મ થયું હતું તે સ્થળે કોઈ સીસીટીવી કેમેરા નહોતા.
ગણતરીના દિવસોમાં જ ક્રાઈમ બ્રાંચે આરોપીની ધરપકડ કરી
સઘન તપાસ દરમિયાન ક્રાઈમ બ્રાંચની ટીમને એક સીસીટીવી ફૂટેજમાં એક પડછાયો દેખાયો, જે શંકાસ્પદ હતો. આ પડછાયાની દિશામાં તપાસ આગળ વધારતા અને હ્યુમન સોર્સિસ (માનવ બાતમીદારો)ની મદદ લેતા પોલીસ મોઈનુદ્દીન બાદશાહ સુધી પહોંચવામાં સફળ રહી હતી. પીડિતાએ આપેલા વર્ણનના આધારે પણ આરોપીની ઓળખ થઈ હતી. ગણતરીના દિવસોમાં જ ક્રાઈમ બ્રાંચે આ વિકૃત આરોપીની ધરપકડ કરી લીધી.
માનસિક વિકૃત, નશાનો આદી અને 16થી વધુ ગુનાઓનો આરોપી
આરોપી મોઈનુદ્દીન બાદશાહનો ગુનાહિત ઇતિહાસ અત્યંત ખતરનાક છે. તે એક રીઢો ગુનેગાર છે અને ગંભીર વિકૃત માનસિકતા ધરાવે છે. મોઈનુદ્દીન સામે અત્યાર સુધીમાં 16થી વધુ ગંભીર ગુનાઓ નોંધાયેલા છે. અગાઉ તે બે વખત પાસા હેઠળ અન્ય જેલમાં મોકલાઈ ચૂક્યો છે. તેને તડીપાર પણ કરવામાં આવ્યો હતો. મોઈનુદ્દીન નશાનો આદી છે અને યુવતી પર દુષ્કર્મ પણ તેણે નશાની હાલતમાં આચર્યું હતું. તેની મનોવૈજ્ઞાનિક પ્રોફાઇલ દર્શાવે છે કે તે અત્યંત ગુસ્સાવાળો સ્વભાવ ધરાવે છે અને સ્વ-નુકસાન પણ કરી રહ્યો છે.
કોર્ટે આરોપીના 6 દિવસના પોલીસ રિમાન્ડ મંજૂર કર્યા
ક્રાઈમ બ્રાંચ દ્વારા મોઈનુદ્દીનની ધરપકડ બાદ તેને કોર્ટમાં રજૂ કરવામાં આવ્યો હતો. કોર્ટે આરોપીના 6 દિવસના પોલીસ રિમાન્ડ મંજૂર કર્યા છે, જેથી આ ઘૃણાસ્પદ ગુના અંગે વધુ તપાસ કરી શકાય અને તેના ગુનાહિત ઈતિહાસ તથા અન્ય સંડોવણીઓ અંગે પણ માહિતી મેળવી શકાય. આ સફળતા બદલ ક્રાઈમ બ્રાંચની કામગીરીની પ્રશંસા થઈ રહી છે.
