Ahmedabad Chhath Puja 2026:‘મિની ભારત’ તરીકે ઓળખાતા અમદાવાદ શહેરમાં દરેક તહેવારની ઉજવણી ભારે ઉમંગ અને ઉત્સાહ સાથે કરવામાં આવે છે. દિવાળીના પર્વની રોનક બાદ હવે શહેરમાં વસતા ઉત્તર ભારતીય સમાજના સૌથી મોટા અને પવિત્ર તહેવાર ‘છઠ પૂજા’ની ભવ્ય ઉજવણી માટે તડામાર તૈયારીઓ શરૂ કરી દેવામાં આવી છે. આગામી રવિવારે આવતા આ મહાપર્વને લઈને શહેરના સાબરમતી રિવરફ્રન્ટ પર ખાસ આયોજન કરવામાં આવ્યું છે. ખાસ કરીને ઈન્દિરા બ્રિજ નીચે આવેલા છઠ ઘાટ પર વહીવટી તંત્ર દ્વારા પૂરજોશમાં કામગીરી હાથ ધરવામાં આવી છે, જ્યાં શ્રદ્ધાળુઓ સરળતાથી પૂજા-અર્ચના કરી શકે તે માટે સમગ્ર ઘાટમાં પાણી ભરી દેવામાં આવ્યું છે.
વતનથી દૂર રહેતા હજારો પરિવારો માટે આસ્થાનું મુખ્ય કેન્દ્ર
રોજગારી, નોકરી-ધંધા કે અન્ય વ્યવસાયિક કારણોસર અમદાવાદમાં સ્થાયી થયેલા બિહાર, ઉત્તર પ્રદેશ અને ઝારખંડના હજારો પરિવારો તહેવારોમાં પોતાના વતન જઈ શકતા નથી. આવા પરિવારો માટે વર્ષોથી અમદાવાદના ઈન્દિરા બ્રિજ નીચેનો સાબરમતી ઘાટ આસ્થા અને શ્રદ્ધાનું સૌથી મોટું કેન્દ્ર બની રહ્યો છે. છઠ પૂજાના દિવસે હજારોની સંખ્યામાં શ્રદ્ધાળુઓ પરિવાર સાથે અહીં ઉમટી પડે છે. પરંપરાગત ગીતો અને ભક્તિમય માહોલ વચ્ચે વ્રતીઓ પાણીમાં ઊભા રહીને અસ્ત થતા અને ત્યારબાદ ઉગતા સૂર્યદેવને અર્ઘ્ય અર્પણ કરીને પરિવારની સુખ-સમૃદ્ધિ માટે પ્રાર્થના કરે છે.
ઘાટની સજાવટ વચ્ચે નદીમાં જળકુંભીની સમસ્યા યથાવત
એક તરફ તંત્ર દ્વારા છઠ ઘાટને સ્વચ્છ કરીને નવા રંગરૂપ સાથે સજાવવાની કામગીરી તેજ ગતિએ કરવામાં આવી રહી છે, ત્યારે બીજી તરફ નદીના પટમાં જોવા મળતી ગંદકીએ ચિંતા વધારી છે. સાબરમતી નદીના ઘણા ભાગોમાં હજુ પણ જળકુંભીનું સામ્રાજ્ય યથાવત જોવા મળી રહ્યું છે. જે જગ્યાએ શ્રદ્ધાળુઓ પાણીમાં ઊતરીને સૂર્ય ઉપાસના અને અર્ઘ્ય વિધિ કરવાના છે, બરાબર તે જ વિસ્તારની આસપાસ જળકુંભી ફેલાયેલી હોવાથી ભક્તોની મુશ્કેલી વધી શકે તેમ છે.
શ્રદ્ધાળુઓની હાલાકી ટાળવા તાત્કાલિક સફાઈની લોકમાગ
છઠ પૂજામાં સ્વચ્છતા અને પવિત્રતાનું ખૂબ જ વિશેષ મહત્ત્વ હોય છે. નદીમાં જળકુંભી હોવાને કારણે પૂજા સમયે શ્રદ્ધાળુઓને પાણીમાં ઊભા રહેવામાં અગવડતા પડવાની તેમજ તેમની ધાર્મિક લાગણી દુભાવાની પૂરી શક્યતા છે. આ પરિસ્થિતિને ધ્યાનમાં રાખીને શ્રદ્ધાળુઓ અને સ્થાનિક આગેવાનોમાં ચિંતાનો માહોલ જોવા મળી રહ્યો છે. લોકોની આસ્થા જળવાઈ રહે અને સૌ કોઈ નિર્મળ તથા સ્વચ્છ પાણીમાં સૂર્યદેવની પૂજા કરી શકે, તે માટે તંત્ર દ્વારા તહેવાર પહેલાં યુદ્ધના ધોરણે નદીમાંથી જળકુંભી દૂર કરવામાં આવે તેવી પ્રબળ લોકમાગ ઉઠી છે.
સુરક્ષા અને સુવિધાઓ પર પણ રહેશે સૌની નજર
છઠ મહાપર્વ નિમિત્તે ઈન્દિરા બ્રિજ ઘાટ પર મોટી સંખ્યામાં માનવ મહેરામણ ઉમટતું હોવાથી માત્ર સફાઈ જ નહીં, પરંતુ સુરક્ષા અને પ્રાથમિક સુવિધાઓ પણ એટલી જ જરૂરી બની રહે છે. શ્રદ્ધાળુઓ અપેક્ષા રાખી રહ્યા છે કે તંત્ર જળકુંભી હટાવવાની સાથે સાથે ઘાટ પર યોગ્ય લાઇટિંગ, પીવાના પાણી, ફાયર બ્રિગેડની તૈનાતી અને ટ્રાફિક નિયમન જેવી તમામ વ્યવસ્થાઓ સમયસર પૂર્ણ કરે, જેથી ભક્તિમય વાતાવરણમાં કોઈ પણ વિઘ્ન વિના મહાપર્વની ઉજવણી સંપન્ન થઈ શકે.
