Ahmedabad Land Dispute: અમદાવાદના બહેરામપુરા વિસ્તારમાં જમીનના જૂના વિવાદને લઈને એક જ કોમના બે જૂથો સામસામે આવી જતાં મોડી રાત્રે તંગદિલીનો માહોલ સર્જાયો હતો. બહેરામપુરા પોલીસ ચોકીની પાછળના ભાગે જ બંને જૂથો વચ્ચે ઉગ્ર બોલાચાલી બાદ મામલો વણસ્યો અને સામસામે પથ્થરમારો થયો હતો. ઘટનાને પગલે આસપાસના વિસ્તારમાં દોડધામ મચી ગઈ હતી અને સ્થાનિક રહીશોમાં ભય ફેલાયો હતો.
જૂના જમીન વિવાદે ફરી પકડ્યું ઉગ્ર સ્વરૂપ
પ્રાપ્ત માહિતી મુજબ, બંને જૂથો વચ્ચે પ્રોપર્ટીની માલિકી અને જમીનને લગતા મુદ્દે લાંબા સમયથી વિવાદ ચાલી રહ્યો હતો. મોડી રાત્રે આ જૂનો વિવાદ ફરી ઉગ્ર બન્યો હતો અને બંને પક્ષના લોકો મોટી સંખ્યામાં સામસામે આવી ગયા હતા. શરૂઆતમાં બંને પક્ષો વચ્ચે ઉગ્ર બોલાચાલી થઈ હતી. ત્યારબાદ અચાનક મામલો બિચકતાં બંને તરફથી પથ્થરમારો શરૂ થયો હતો.
પોલીસ ચોકીની પાછળ જ પથ્થરમારાથી અફરાતફરી
પોલીસ ચોકીની પાછળ જ પથ્થરમારો થતાં આસપાસના લોકોમાં પણ ગભરાટ ફેલાયો હતો. ઘટનાને કારણે કેટલાક સમય માટે વિસ્તારમાં અફરાતફરીનો માહોલ સર્જાયો હતો. ઘટનાની જાણ થતાં પોલીસ કાફલો તાત્કાલિક સ્થળ પર પહોંચ્યો હતો અને સ્થિતિને કાબૂમાં લીધી હતી. પોલીસની દરમિયાનગીરી બાદ બંને પક્ષોને વિખેરી મામલો થાળે પાડવામાં આવ્યો હતો.
પોલીસે તપાસ શરૂ કરી
સમગ્ર મામલે પોલીસે ગુનો નોંધીને પથ્થરમારો કરનારા લોકોની ઓળખ કરવાની કાર્યવાહી શરૂ કરી છે. ઘટનાના કારણો, બંને પક્ષ વચ્ચેનો જૂનો વિવાદ અને પથ્થરમારામાં કોણ-કોણ સામેલ હતું તે અંગે પોલીસ તપાસ કરી રહી છે. પોલીસની કાર્યવાહી બાદ જ ઘટનાની સંપૂર્ણ હકીકત અને જવાબદારો સામે કઈ કલમો હેઠળ કાર્યવાહી કરવામાં આવી છે તે સ્પષ્ટ થશે.
