Ahmedabad antibegging drive: અમદાવાદ શહેરને ભિક્ષાવૃત્તિ મુક્ત બનાવવાના આયોજનના ભાગરૂપે અમદાવાદ મ્યુનિસિપલ કોર્પોરેશનના UCD વિભાગ, પોલીસ વિભાગના એન્ટી હ્યુમન ટ્રાફિકિંગ યુનિટ (AHTU) અને ગુજરાત સરકારના સમાજ સુરક્ષા વિભાગ દ્વારા સંયુક્ત રીતે વિશેષ ‘એન્ટી બેગિંગ ડ્રાઇવ’ હાથ ધરવામાં આવી હતી. 9 સપ્ટેમ્બરે શહેરના તમામ ઝોનમાં ચાલેલી આ ઝુંબેશ દરમિયાન ટ્રાફિક સિગ્નલ અને ભિક્ષાવૃત્તિના હોટસ્પોટ્સ પર સઘન ચેકિંગ કરી કાર્યવાહી કરવામાં આવી હતી. આ દરમિયાન 72 બાળકો અને 89 વયસ્કો સહિત કુલ 161 લોકોને રેસ્ક્યુ કરવામાં આવ્યા હતા.
ભિક્ષુકગૃહમાં ખસેડવાની કામગીરી હાથ ધરાઈ
રેસ્ક્યુ કરાયેલા તમામ લોકોને તંત્ર દ્વારા નિર્ધારિત સ્થળે લઈ જઈ પ્રાથમિક મેડિકલ ચેક-અપ કરાવવામાં આવ્યું હતું. આ પૈકી 17 પુરુષોને ઘીકાંટા ખાતેની કોર્ટ સમક્ષ રજૂ કરવામાં આવ્યા હતા અને નિયમ મુજબ તેમને ભિક્ષુકગૃહમાં ખસેડવાની કામગીરી હાથ ધરાઈ હતી. બીજી તરફ, રેસ્ક્યુ કરાયેલા બાળકોને તેમના કલ્યાણ અને સુરક્ષાને ધ્યાનમાં રાખીને ચાઇલ્ડ વેલ્ફેર કમિટી (CWC) સમક્ષ રજૂ કરવામાં આવ્યા હતા. જેમાંથી 10 બાળકોને બાળ સંરક્ષણ ગૃહમાં મોકલવામાં આવ્યા છે, જ્યારે બાકીના 62 બાળકોને તેમના માતા-પિતા અથવા વાલીઓને કડક ચેતવણી સાથે સોંપવામાં આવ્યા હતા.
બળજબરી કરાવનારા લોકો સામે પણ કડક પગલાં લેવામાં આવ્યા
તંત્રની કાર્યવાહી દરમિયાન બાળકોને સાથે રાખીને ટ્રાફિક વચ્ચે ભીખ મંગાવનારા, બાળકો પાસે મજૂરી અથવા જોખમી ખેલ કરાવનારા તેમજ વાહનોના કાચ સાફ કરવા માટે બળજબરી કરાવનારા લોકો સામે પણ કડક પગલાં લેવામાં આવ્યા છે. આવા કુલ 24 શખ્સોને રાઉન્ડ અપ કરવામાં આવ્યા છે. તેમની સામે જુવેનાઇલ જસ્ટિસ એક્ટની કલમ 75 અને 76 તેમજ ગુજરાત પોલીસ એક્ટની કલમ 111 અને 117 હેઠળ ગુનો નોંધવાની કાર્યવાહી હાલ પ્રગતિમાં છે.
બાળકોને ભિક્ષાવૃત્તિ અને શોષણથી બચાવવાનો
AMC અને પોલીસ સહિતના વિભાગોની આ સંયુક્ત ઝુંબેશનો મુખ્ય હેતુ માત્ર રસ્તાઓ પરથી ભિક્ષુકોને દૂર કરવાનો નહીં, પરંતુ બાળકોને ભિક્ષાવૃત્તિ અને શોષણથી બચાવવાનો પણ છે. ખાસ કરીને ટ્રાફિક સિગ્નલ પર બાળકોને ભીખ મંગાવવાના કિસ્સાઓને ગંભીરતાથી લેવામાં આવી રહ્યા છે. તંત્રએ સ્પષ્ટ કર્યું છે કે અમદાવાદને ભિક્ષાવૃત્તિ મુક્ત બનાવવાના પ્રયાસો અંતર્ગત આગામી દિવસોમાં પણ આવી સંયુક્ત ડ્રાઇવ વધુ સઘન રીતે ચાલુ રાખવામાં આવશે.
