Ahmedabad Air Pollution After Diwali 2026: દિવાળીના તહેવારની ઉજવણી બાદ અમદાવાદમાં હવા પ્રદૂષણનું સ્તર વધ્યું છે. ફટાકડાના ધુમાડા, વાહનોના ઉત્સર્જન, બાંધકામની પ્રવૃત્તિઓ અને હવામાનમાં ફેરફાર સહિતનાં પરિબળોને કારણે શહેરની હવાની ગુણવત્તા પર અસર જોવા મળી રહી છે. શહેરના વિવિધ વિસ્તારોમાં હવા પ્રદૂષણનું પ્રમાણ વધતાં નાગરિકોના આરોગ્ય સામે ચિંતા ઊભી થઈ છે. તાજેતરના આંકડા મુજબ, અમદાવાદના 17 જેટલા વિસ્તારોમાં એર ક્વોલિટી ઇન્ડેક્સ (AQI) 200ને પાર પહોંચ્યો છે.
થલતેજમાં સૌથી વધુ 276 AQI નોંધાયો
શહેરના પ્રદૂષણ મોનિટરિંગ આંકડા મુજબ, થલતેજમાં સૌથી વધુ 276 AQI નોંધાયો છે. જ્યારે હેબતપુરમાં 264 અને સોલા સ્ટેશન-2માં 262 AQI નોંધાતાં આ વિસ્તારોમાં હવાની ગુણવત્તા ખરાબ શ્રેણીમાં પહોંચી છે. આ ઉપરાંત સાઉથ બોપલ સ્ટેશન-1માં 240, શિવાલિક લેકવ્યૂમાં 234, વસંતનગરમાં 228, બોપલમાં 220 અને ઘુમામાં 217 AQI નોંધાયો છે.
આ વિસ્તારોમાં પણ 200ને પાર પહોંચ્યો AQI
અમદાવાદના અન્ય વિસ્તારોમાં પણ પ્રદૂષણનું પ્રમાણ વધ્યું છે. સરખેજમાં 201, ચાંદખેડામાં 203, નિગમનગરમાં 203 અને રામનગરમાં 202 AQI નોંધાયો છે. આ ઉપરાંત સાઉથ બોપલના અન્ય મોનિટરિંગ સ્ટેશનો પર પણ AQI 200થી વધુ રહ્યો છે. શહેરના અનેક વિસ્તારોમાં હવાની ગુણવત્તા ખરાબ શ્રેણીમાં પહોંચતાં પ્રદૂષણનો વ્યાપ વધ્યો હોવાનું સામે આવ્યું છે.
બાળકો, વૃદ્ધો અને અસ્થમાના દર્દીઓએ રાખવી ખાસ કાળજી
વધતા પ્રદૂષણની સૌથી વધુ અસર બાળકો, વૃદ્ધો અને શ્વાસ સંબંધિત બીમારીઓ ધરાવતા લોકો પર થઈ શકે છે. લાંબા સમય સુધી પ્રદૂષિત હવામાં રહેવાથી શ્વાસ લેવામાં તકલીફ, ઉધરસ અને આંખોમાં બળતરા જેવી સમસ્યાઓ થઈ શકે છે. આરોગ્ય નિષ્ણાતોની સલાહ મુજબ, આવા લોકોએ પ્રદૂષણનું પ્રમાણ વધુ હોય ત્યારે બહારની શારીરિક પ્રવૃત્તિઓ ટાળવી જોઈએ અને જરૂરી હોય ત્યારે જ બહાર નીકળવું જોઈએ.
AQI 200ને પાર એટલે હવાની ગુણવત્તા ખરાબ
સેન્ટ્રલ પોલ્યુશન કંટ્રોલ બોર્ડ (CPCB)ના માપદંડ મુજબ AQI 201થી 300 વચ્ચે હોય તો હવાની ગુણવત્તાને 'ખરાબ' (Poor) શ્રેણીમાં ગણવામાં આવે છે. આવી સ્થિતિમાં લાંબા સમય સુધી પ્રદૂષિત હવાના સંપર્કમાં રહેવાથી સ્વાસ્થ્ય પર અસર થઈ શકે છે. દિવાળી બાદ અમદાવાદના અનેક વિસ્તારોમાં નોંધાયેલા આ આંકડા શહેરમાં હવાની ગુણવત્તા સુધારવા માટે સતત દેખરેખ અને પ્રદૂષણ નિયંત્રણનાં પગલાંની જરૂરિયાત દર્શાવે છે.
