Ahmedabad Food Safety Action: અમદાવાદમાં તહેવારોને પગલે ખાદ્ય પદાર્થોની માંગ વધતા AMCના ફૂડ વિભાગે શહેરના વિવિધ વિસ્તારોમાં તપાસ હાથ ધરી છે. માધુપુરા, વટવા, વેજલપુર અને ચાંદલોડિયામાં કરાયેલી કાર્યવાહીમાં સબ-સ્ટાન્ડર્ડ ઘી, લાઇસન્સ વગરનું ઉત્પાદન, અસ્વચ્છ પરિસ્થિતિ અને નમકીનમાં પ્રતિબંધિત સિન્થેટિક ફૂડ કલરના ઉપયોગ જેવી ખામીઓ સામે આવી છે. સમગ્ર કાર્યવાહીમાં કુલ 3,806 કિલો ખાદ્ય જથ્થો વેચાણથી અટકાવવામાં આવ્યો છે, જેની કિંમત આશરે ₹9.22 લાખ છે.
માધુપુરામાં 1,140 કિલો ઘીનો જથ્થો સ્થગિત
AMCના ફૂડ વિભાગની તપાસ દરમિયાન માધુપુરા સ્થિત મહાવીર ઘી ભંડારમાંથી 1,140 કિલો ઘીનો જથ્થો સ્થગિત કરવામાં આવ્યો છે. તપાસમાં રામસન્સ અને નોવા ઘીના સેમ્પલ સબ-સ્ટાન્ડર્ડ જાહેર થતાં નિયમ મુજબ કાર્યવાહી કરવામાં આવી છે. તહેવારો દરમિયાન ઘી સહિતની ખાદ્ય સામગ્રીની માંગ વધતી હોવાથી વિભાગ દ્વારા આવા ઉત્પાદનોની ગુણવત્તા ચકાસવામાં આવી રહી છે.
વટવામાં 2,516 કિલો સોસ-ચટણી અને કોર્ન ફ્લોર જપ્ત
વટવા વિસ્તારમાં આવેલા એમ.એમ. ફૂડ પ્રોડક્ટ્સમાં લાઇસન્સ વગર અને અસ્વચ્છ સ્થિતિમાં ખાદ્ય પદાર્થોનું ઉત્પાદન થતું હોવાનું તપાસમાં સામે આવ્યું હતું. અહીંથી 2,516 કિલો સોસ, ચટણી અને કોર્ન ફ્લોરનો જથ્થો વેચાણથી અટકાવવામાં આવ્યો છે. નિયમોના ભંગને પગલે એકમને સીલ કરવાની કાર્યવાહી કરવામાં આવી છે.
વેજલપુરમાં પ્રતિબંધિત ફૂડ કલર, ચાંદલોડિયામાં એકમ સીલ
વેજલપુરના શ્રી માતેશ્વરી ચવાણા એન્ડ સ્વીટ માર્ટમાં નમકીન બનાવવામાં પ્રતિબંધિત સિન્થેટિક ફૂડ કલરનો ઉપયોગ થતો હોવાનું તપાસમાં સામે આવ્યું હતું. AMCએ એકમને સીલ કરીને 150 કિલો નમકીનનો જથ્થો વેચાણથી અટકાવ્યો છે. બીજી તરફ, ચાંદલોડિયા સ્થિત ગુજરાત ફ્રાય સેન્ટરમાં લાઇસન્સ વગર અને અસ્વચ્છ સ્થિતિમાં ખાદ્ય વ્યવસાય કરવામાં આવતો હોવાનું સામે આવતા એકમને સીલ કરવામાં આવ્યું છે.
તહેવારોમાં ફૂડ સેફ્ટીને લઈને AMCની કાર્યવાહી તેજ
તહેવારો દરમિયાન મીઠાઈ, નમકીન, ઘી, સોસ અને ચટણી સહિતની ખાદ્ય સામગ્રીની ખરીદી વધતી હોય છે. આવી સ્થિતિમાં ભેળસેળ અથવા હલકી ગુણવત્તાવાળા ખાદ્ય પદાર્થોનું વેચાણ ન થાય તે માટે AMCના ફૂડ વિભાગે તપાસ વધુ કડક બનાવી છે. તાજેતરની કાર્યવાહીમાં એકમોને સીલ કરવાની સાથે હજારો કિલો ખાદ્ય જથ્થો વેચાણથી અટકાવવામાં આવ્યો છે.
