અમદાવાદના શહેર કોટડા પોલીસ સ્ટેશનમાં યુવકે કર્યો આપઘાત: સુરક્ષા સામે મોટા સવાલ!

Ahmedabad City Kotda Police Station Suicide Case: અમદાવાદ શહેરના કોટડા પોલીસ સ્ટેશન પરિસરમાંથી એક અત્યંત ચોંકાવનારી અને દુઃખદ ઘટના સામે આવી છે. જ્યાં સામાન્ય નાગરિકો પોતાની સુરક્ષા અને મદદ માટે આશા લઈને પહોંચે છે, તે જ પોલીસ સ્ટેશનના ઇલેક્ટ્રિક રૂમમાં એક 38 વર્ષીય પરપ્રાંતીય યુવકે ગળે ફાંસો ખાઈને પોતાની જીવનલીલા સંકેલી લીધી છે. રાત્રિના સમયે પોલીસ સ્ટેશનના જ નીચેના ભાગે આવેલા ઇલેક્ટ્રિક રૂમમાં બનેલી આ ઘટનાને પગલે સમગ્ર પોલીસ બેડામાં ભારે દોડધામ મચી ગઈ છે અને સુરક્ષા વ્યવસ્થાને લઈને અનેક ગંભીર પ્રશ્નો ઊભા થયા છે.

અમદાવાદમાં નાણાં વગર અટવાયો
મૃતક યુવકની ઓળખ ઉત્તર પ્રદેશના મૂળ નિવાસી 38 વર્ષીય રાજુ રામનક્ષત્રા જાટવ તરીકે થઈ છે. પ્રાથમિક માહિતી અનુસાર, રાજુ જાટવ જામનગરમાં રોજીરોટી અર્થે મજૂરી કામ કરતો હતો અને ત્યાંથી પોતાના વતન ઉત્તર પ્રદેશ જવા માટે ટ્રેન મારફતે નીકળ્યો હતો. મુસાફરી દરમિયાન તે અમદાવાદના અસારવા રેલવે સ્ટેશન પર ઉતરી ગયો હતો. પરંતુ આગળની મુસાફરી કરવા માટે તેની પાસે પૂરતા નાણાં નહોતા અને પગારની રકમને લઈને પણ તે ભારે માનસિક તણાવ તેમજ આર્થિક સંકડામણમાં ઘેરાયેલો હતો.

પોલીસે આપી હતી સલામત જગ્યા
પોતાની આર્થિક મૂંઝવણ અને મદદ માટે રાજુએ પોલીસ કંટ્રોલ રૂમમાં સંપર્ક કર્યો હતો. કંટ્રોલ રૂમના સંદેશા બાદ શહેર કોટડા પોલીસની ટીમે માનવતા દાખવી તેને અસારવા સ્ટેશનથી સલામત રીતે પોલીસ સ્ટેશને લાવ્યા હતા. પોલીસે તરત જ તેના ઉત્તર પ્રદેશ સ્થિત પરિવારજનો અને સગા-સંબંધીઓનો સંપર્ક કર્યો હતો. પરિવારે સવારે નાણાં મોકલી આપવાની ખાતરી આપી હતી. મોડી રાત્રે શહેરમાં ભારે વરસાદ પડી રહ્યો હોવાથી પોલીસે પણ માનવતાના ધોરણે યુવકને સવાર સુધી પોલીસ મથકમાં જ રોકાઈને આરામ કરવા સલાહ આપી હતી.

મોડી રાત્રે ખેલાયો આપઘાતનો ખેલ
જે પોલીસ સ્ટેશનમાં રાજુએ સુરક્ષાનો શ્વાસ લીધો હતો, તે જ જગ્યાએ મોડી રાત્રે કાળ નોતરાઈ આવ્યો. પોલીસ કર્મચારીઓ પોતાની કામગીરીમાં વ્યસ્ત હતા અને મોડી રાતનો સમય હોવાથી રાજુ કોઈની પણ નજરે ન પડે તે રીતે સ્ટેશનના ઇલેક્ટ્રિક રૂમ તરફ સરકી ગયો હતો. ત્યાં જઈને તેણે ગળે ફાંસો ખાઈ આપઘાત કરી લીધો હતો. સવારે જ્યારે સમગ્ર ઘટના પ્રકાશમાં આવી ત્યારે પોલીસ સ્ટેશનમાં હાજર કર્મચારીઓના પણ હોશ ઊડી ગયા હતા.

સુરક્ષા વ્યવસ્થા પર ગંભીર સવાલો: રહસ્ય અકબંધ કેમ?
આ ઘટના સામે આવ્યા બાદ ઉચ્ચ પોલીસ અધિકારીઓ તાબડતોબ ઘટનાસ્થળે દોડી આવ્યા હતા. મૃતદેહને પોસ્ટમોર્ટમ અર્થે ખસેડીને પરિવારજનોને જાણ કરવામાં આવી છે. જોકે, આ ઘટનાએ પોલીસ તંત્રની જાગૃતિ અને સુરક્ષા બાબતે અનેક અનુત્તર પ્રશ્નો ઊભા કર્યા છે. જો કોઈ નાગરિક પોલીસ સ્ટેશનમાં સુરક્ષિત નથી અને ત્યાં જ આપઘાત કરી લે છે, તો નાઈટ પેટ્રોલિંગ અને વોચ રાખનાર કર્મચારીઓ શું કરી રહ્યા હતા? હાલમાં પોલીસ આ મામલે કાયદેસરની તપાસ ચલાવી રહી છે અને યુવકના તણાવનું સાચું કારણ જાણવા પ્રયાસ કરી રહી છે.