Ahmedabad Tax Evasion Scam: અમદાવાદ શહેર ફરી એકવાર મોટા આર્થિક કૌભાંડથી ધ્રૂજી ઊઠ્યું છે. ગુજરાતની આર્થિક રાજધાની ગણાતા અમદાવાદમાં 'આમ જનમત પાર્ટી' નામના એક માત્ર કાગળ પર ચાલતા રાજકીય પક્ષ દ્વારા કરોડો રૂપિયાનું બોગસ ડોનેશન કૌભાંડ આચરવામાં આવ્યું છે. ઇન્કમ ટેક્સ (IT) વિભાગ દ્વારા કરવામાં આવેલી ઊંડાણપૂર્વકની તપાસમાં ખુલાસો થયો છે કે આ પક્ષે દેશના મોટા કરદાતાઓ, ચાર્ટર્ડ એકાઉન્ટન્ટ્સ (CA) અને પોતાના હોદ્દેદારો સાથે મળીને સરકારી તિજોરીને આશરે ₹250 કરોડથી વધુનું મોટું આર્થિક નુકસાન પહોંચાડ્યું છે. પક્ષના નોંધણી નંબર 56/246/2019/PPS-1 હેઠળ ચાલતી આ પાર્ટીએ આયોજનબદ્ધ રીતે આખું કૌભાંડ રચ્યું હતું, જેમાં કોઈ પણ સાચા બિલ કે વાઉચર વગર જ બોગસ ઓડિટ રિપોર્ટ તૈયાર કરીને સરકારી પોર્ટલ પર અપલોડ કરી દેવામાં આવ્યા હતા.
₹843 કરોડથી વધુના શંકાસ્પદ વ્યવહારો
ઇન્કમ ટેક્સ વિભાગની પ્રાથમિક તપાસ દરમિયાન સામે આવ્યું છે કે નાણાકીય વર્ષ 2022-23 અને 2023-24 દરમિયાન આમ જનમત પાર્ટીના બેંક ખાતાઓમાં કુલ ₹843,97,43,793 (₹843 કરોડથી વધુ)ના શંકાસ્પદ આર્થિક વ્યવહારો થયા હતા. આ કૌભાંડ ખૂબ જ ચાલાકી અને હોશિયારીથી ઘડવામાં આવ્યું હતું. દેશના મોટા ટેક્સપેયર્સ (કરદાતાઓ) બેંકિંગ ચેનલ મારફતે પાર્ટીને ડોનેશન આપતા હતા, જેના આધારે તેઓ ઇન્કમ ટેક્સ એક્ટ હેઠળ 100% ટેક્સ કપાતનો લાભ મેળવતા હતા. આ રીતે મોટા કરદાતાઓ પોતાનો કરોડો રૂપિયાનો આવકવેરો બચાવી લેતા હતા.
બોગસ કંપનીઓ અને આંગડિયા પેઢીઓ દ્વારા રોકડનું નેટવર્ક
કરદાતાઓ પાસેથી મળેલું ડોનેશન પાર્ટીના બેંક ખાતામાં જમા થયા બાદ તેને કાયદેસર બતાવવા માટે ખોટા ખર્ચાઓ દર્શાવવામાં આવતા હતા. ચૂંટણી પ્રચાર, મોટી રેલીઓ અને જાહેરાતો પાછળ કરોડો રૂપિયાનો ખર્ચ થયો હોવાનું કાગળ પર દર્શાવીને આ નાણાં પ્રેનિત કોર્પોરેશન, હેશાઝ કોર્પોરેશન, આયાન એન્ટરપ્રાઇઝ અને શ્રી રામદેવ એન્ટરપ્રાઇઝ જેવી શેલ (બોગસ) કંપનીઓમાં ટ્રાન્સફર કરવામાં આવતા હતા. ત્યારબાદ આ રકમ આંગડિયા પેઢીઓ મારફતે રોકડમાં ઉપાડી લેવાતી હતી. પક્ષના હોદ્દેદારો અને સીએ પોતાનું નિશ્ચિત કમિશન કાપીને બાકીની મોટી રકમ મૂળ દાતાઓને રોકડમાં પરત કરી દેતા હતા.
રાષ્ટ્રીય અધ્યક્ષ, સીએ સહિત 7 શખસો સામે કાયદેસરની ફરિયાદ
સરકારી તિજોરીને અંદાજે ₹250 કરોડનું સીધું નુકસાન પહોંચાડનારા આ રેકેટનો પર્દાફાશ થતાં જ આસિસ્ટન્ટ કમિશનર ઓફ ઇન્કમ ટેક્સ (કેન્દ્રીય વર્તુળ) દ્વારા કાયદેસરની કાર્યવાહી શરૂ કરવામાં આવી છે. આ કૌભાંડમાં સામેલ આમ જનમત પાર્ટીના રાષ્ટ્રીય અધ્યક્ષ ગૌરવ વાય. મિશ્રા, ખજાનચી ધર્મેન્દ્ર વૈષ્ણવ, વ્યવસ્થાપક દિનેશકુમાર જૈન તેમજ ચાર્ટર્ડ એકાઉન્ટન્ટ્સ મયૂરસિંહ રાઠોડ, પ્રણવ શાહ અને આકાશ સોની સહિત કુલ 7 લોકો સામે છેતરપિંડી અને ખોટા દસ્તાવેજો બનાવવા બદલ ગુનો દાખલ કરવામાં આવ્યો છે.
રાજકીય ડોનેશનના નામે ચાલતી ટેક્સ ચોરી સામે આકરા પગલાંની શક્યતા
આ કૌભાંડ બહાર આવ્યા બાદ આઇટી વિભાગ અને અન્ય તપાસ એજન્સીઓ વધુ સક્રિય બની છે. તપાસ અધિકારીઓના મતે, આ કૌભાંડ માત્ર એક પાર્ટી પૂરતું સીમિત ન હોઈ શકે અને તેમાં અન્ય કાગળ પર ચાલતી રાજકીય પાર્ટીઓ કે મોટી આંગડિયા પેઢીઓની સંડોવણી હોવાની પણ શક્યતા છે. આ કેસમાં આગામી દિવસોમાં મોટા નામો સામે આવવાની અને મુખ્ય સૂત્રધારોની ધરપકડ થવાની પૂરેપૂરી શક્યતા છે. સરકાર સાથે કાવતરું રચીને કરોડોની ટેક્સ ચોરી કરનારાઓ સામે આકરી કાર્યવાહી કરવા માટે તંત્રએ ચક્ર ગતિમાન કર્યા છે.
