Lion entered a house: અમરેલી જિલ્લાના ખાંભા તાલુકાના જૂના માલકનેસ ગામમાં વહેલી સવારે સિંહ રહેણાક મકાનમાં ઘૂસી જતાં ગ્રામજનોમાં અફરાતફરી મચી ગઈ હતી. ગામમાં એક પશુનું મારણ કર્યા બાદ એક સિંહ નજીક આવેલા અમરૂભાઈ વરુના ઘરમાં ઘૂસી ગયો હતો. સિંહ ઘરના ઓરડામાં કલાકો સુધી બેસી રહેતાં સ્થાનિકોમાં ભયનો માહોલ ફેલાયો હતો. ઘટનાની જાણ થતાં વન વિભાગની ટીમ સ્થળ પર પહોંચી હતી અને સિંહને ટ્રંક્યુલાઇઝ કરીને સુરક્ષિત રીતે રેસ્ક્યૂ કર્યો હતો.
પશુનું મારણ કર્યા બાદ મકાનમાં ઘૂસ્યો સિંહ
મળતી માહિતી મુજબ, જૂના માલકનેસ ગામમાં વહેલી સવારે સિંહોએ એક પશુનું મારણ કર્યું હતું. ત્યારબાદ એક સિંહ નજીક આવેલા અમરૂભાઈ વરુના રહેણાક મકાનમાં ઘૂસી ગયો હતો. સિંહ ઘરના એક ઓરડામાં બેસી રહેતાં પરિવારજનો અને આસપાસના લોકોમાં ગભરાટ ફેલાયો હતો. સિંહ બહાર ન નીકળતાં ગ્રામજનોમાં દોડધામ મચી ગઈ હતી.
ગ્રામજનોએ ઓરડાનો દરવાજો બંધ કરી વન વિભાગને જાણ કરી
સિંહની હાજરીને કારણે કોઈ જાનહાનિ ન થાય તે માટે ગ્રામજનોએ સાવચેતીપૂર્વક પગલાં લીધાં હતાં. તેમણે સિંહ જે ઓરડામાં હતો તેનો દરવાજો બંધ કરી દીધો હતો અને તાત્કાલિક વન વિભાગને જાણ કરી હતી. ઘટનાની ગંભીરતાને ધ્યાનમાં રાખીને વન વિભાગની ટીમ તાત્કાલિક ઘટનાસ્થળે પહોંચી હતી.
ટ્રંક્યુલાઇઝ કરીને સિંહનું સફળ રેસ્ક્યૂ
વન વિભાગના RFO નીપુલ લકુમની ટીમ અને વેટરનરી તબીબે સ્થળ પર પહોંચીને રેસ્ક્યૂ ઓપરેશન હાથ ધર્યું હતું. સિંહને ટ્રંક્યુલાઇઝ કર્યા બાદ સુરક્ષિત રીતે પાંજરામાં પૂરવામાં આવ્યો હતો. ત્યારબાદ તેને વધુ દેખરેખ અને સંભાળ માટે જસાધાર એનિમલ કેર સેન્ટર ખાતે ખસેડવામાં આવ્યો હતો.
વન વિભાગની કામગીરીથી ગ્રામજનોએ રાહત અનુભવી
સિંહ રહેણાક મકાનમાં ઘૂસી જવાની ઘટનાથી જૂના માલકનેસ ગામમાં ભયનો માહોલ સર્જાયો હતો. જોકે, વન વિભાગની ટીમે સમયસર પહોંચીને રેસ્ક્યૂ ઓપરેશન પૂર્ણ કરતાં ગ્રામજનોએ રાહત અનુભવી હતી. ગીર વિસ્તારની આસપાસ માનવ વસાહતોમાં વન્યજીવોની અવરજવર થતી હોવાથી આવી પરિસ્થિતિમાં સાવચેતી રાખવી અને વન વિભાગને તાત્કાલિક જાણ કરવી જરૂરી છે.
