Bharuch News: ભરૂચ જિલ્લા પંચાયતના વહીવટદારોએ સરકારી નાણાંનો કેવો વેડફાટ થઈ શકે છે તેનું જીવતું-જાગતું ઉદાહરણ પૂરું પાડ્યું છે. રેલવે સ્ટેશન જેવા પ્રાઇમ લોકેશન પર કરોડોના ખર્ચે તૈયાર કરવામાં આવેલી 45 દુકાનોને વહીવટી નિષ્ફળતાના કારણે 40 વર્ષ સુધી ધૂળ ખાતી રાખ્યા બાદ હવે તેને તોડી પાડવાનો નિર્ણય લેવામાં આવ્યો છે. જનતાની પરસેવાની કમાણીના 4 કરોડ રૂપિયાનું આંધણ કર્યા પછી હવે ત્યાં નવેસરથી કોમ્પ્લેક્સ કમ રેસ્ટ હાઉસ બનાવવાની હિલચાલ તેજ કરવામાં આવી છે. તંત્રના આ અણઘડ નિર્ણયથી જિલ્લાના વિકાસકામો માટે આવતા ફંડનો સરેઆમ દુરુપયોગ થયો હોવાની ચર્ચાએ જોર પકડ્યું છે.
ત્રણ વાર હરાજી કરી પણ કોઈ ખરીદદાર ન મળ્યો
ભરૂચ રેલવે સ્ટેશન પાસે જિલ્લા પંચાયતે પોતાની માલિકીની જગ્યામાં 'હરી રત્ન કોમ્પ્લેક્સ' ઊભું કર્યું હતું. આ કોમ્પ્લેક્સમાં 45 જેટલી આધુનિક દુકાનો બનાવવામાં આવી હતી જેથી પંચાયતની આવકમાં વધારો થઈ શકે. જોકે, વહીવટી તંત્રની આયોજન વગરની નીતિઓને કારણે છેલ્લા 10 વર્ષથી આ દુકાનો લેવા માટે કોઈ વેપારી આગળ આવ્યો નથી. પંચાયતે ત્રણ વખત ઓનલાઈન હરાજી પ્રક્રિયા હાથ ધરી હોવા છતાં એક પણ દુકાન ભાડે કે વેચાણથી આપી શકાઈ નહોતી. અંતે વહીવટમાં સુધારો કરવાને બદલે આખું કોમ્પ્લેક્સ તોડી પાડવાનો શોર્ટકટ અપનાવવામાં આવ્યો છે.
નવી નક્કોર દુકાનો પર બુલડોઝર ફેરવાયું
આશ્ચર્યની વાત એ છે કે, જે દુકાનોને થોડા સમારકામ સાથે ઉપયોગમાં લઈ શકાતી હતી, તેના પર બુલડોઝર ફેરવી દેવામાં આવ્યું છે. નવી નક્કોર દેખાતી આ દુકાનો તોડી પાડવાથી પંચાયતને સીધો આર્થિક ફટકો પડ્યો છે. નિષ્ણાતોના મતે, જો યોગ્ય પ્રમોશન અને વાજબી કિંમત નક્કી કરવામાં આવી હોત તો આ દુકાનો વેચાઈ શકી હોત. પરંતુ તંત્રએ આ ગંભીર ભૂલ સુધારવાને બદલે કરોડોનું નુકસાન કરીને બાંધકામ તોડી નાખ્યું છે. હવે પ્રશ્ન એ ઉઠે છે કે શું આ તોડફોડ માટે જવાબદાર અધિકારીઓ સામે કોઈ તપાસ થશે?
'અરજી આવતી નહોતી એટલે નિર્ણય લીધો'
જિલ્લા પંચાયત પ્રમુખ મહેન્દ્ર વાસદીયાએ આ મામલે સ્પષ્ટતા કરતા જણાવ્યું હતું કે, "છેલ્લા 10 વર્ષથી એક પણ વ્યક્તિએ ઓનલાઈન હરાજીમાં દુકાન લેવા માટે રસ દાખવ્યો નહોતો કે અરજી કરી નહોતી." પ્રમુખનો આ બચાવ લૂલો સાબિત થઈ રહ્યો છે, કારણ કે જો લોકેશન સારું હોય અને છતાં લેવાલ ન મળતા હોય તો તેનો અર્થ એ છે કે પંચાયતના નિયમો અથવા કિંમતમાં ક્ષતિ છે. હવે સવાલ એ છે કે જો જૂની દુકાનો કોઈએ ન લીધી, તો નવેસરથી લાખોના ખર્ચે જે કોમ્પ્લેક્સ બનશે તેની દુકાનો લેવા માટે કોઈ આગળ આવશે ખરું? કે ફરીથી સરકારી નાણાંનો વ્યય થશે?
જૂનું તોડીને નવું બનાવવા પાછળ કયું 'ગણિત' કામ કરી રહ્યું છે?
પંચાયતે હવે જાહેરાત કરી છે કે હરી રત્ન કોમ્પ્લેક્સની જગ્યાએ હાઈટેક રેસ્ટ હાઉસ અને કોમ્પ્લેક્સ બનાવવામાં આવશે. વિપક્ષ અને સ્થાનિક નાગરિકોમાં એવી ચર્ચા છે કે જૂનું બાંધકામ તોડીને નવું ટેન્ડર બહાર પાડવા પાછળ કોઈ ચોક્કસ 'ગણિત' કામ કરી રહ્યું છે. જ્યારે જૂની મિલકતમાંથી આવક ઉભી કરવામાં તંત્ર નિષ્ફળ ગયું હોય, ત્યારે નવેસરથી મોટું રોકાણ કરવું એ જોખમી સાબિત થઈ શકે છે. પંચાયતે હજુ સુધી એ સ્પષ્ટ નથી કર્યું કે નવા પ્રોજેક્ટમાં કેટલો ખર્ચ થશે અને તેની સફળતાની ગેરંટી શું છે?
જનતાના ટેક્સના પૈસાનું પાણી, જવાબદારી કોની?
ભરૂચના જાગૃત નાગરિકો આ ઘટનાને વહીવટી અણઘડતાની પરાકાષ્ઠા ગણાવી રહ્યા છે. 40 વર્ષ સુધી મિલકતને એમને એમ પડી રહેવા દેવી અને પછી તેને તોડી પાડીને નવું બનાવવું એ કોઈ પણ રીતે તર્કબદ્ધ લાગતું નથી. સરકારી તિજોરીને નુકસાન પહોંચાડનારા આ 'તઘલખી' નિર્ણયોને કારણે જિલ્લા પંચાયતની છબી ખરડાઈ છે. શું રાજ્યનું પંચાયત વિભાગ આ મામલે કોઈ હસ્તક્ષેપ કરશે કે પછી ભ્રષ્ટાચાર અને બેદરકારીની આ ફાઈલ પણ ધૂળ ખાતી રહેશે?
