Court Sentences Life Imprisonment in Cow Slaughter Case: ગુજરાતના ગાંધીનગર જિલ્લા હેઠળ આવતી કલોલની એડિશનલ સેશન્સ કોર્ટે ગૌહત્યાના એક ચર્ચિત કેસમાં કાયદાકીય ઇતિહાસનો અત્યંત આકરો અને મહત્વપૂર્ણ ચૂકાદો આપ્યો છે. કોર્ટે ગૌહત્યા અને ગૌમાંસના વેચાણ સાથે જોડાયેલા ત્રણ મુખ્ય આરોપીઓને આજીવન કેદની કારાવાસની સજા સંભળાવી છે. કાયદા મુજબ ગૌહત્યા જેવા ગંભીર ગુનાઓ પ્રત્યે ઝીરો ટોલરન્સ દાખવતાં અદાલતે સ્પષ્ટ કર્યું છે કે સમાજમાં આવા ગુનાઓને કોઈ પણ સંજોગોમાં ચલાવી લેવામાં આવશે નહીં.
₹3-3 લાખનો દંડ અને દોષિતોની ઓળખ
અધિક સેશન્સ જજ બી. આર. રાજપૂતની અદાલતે સજાની ઘોષણા કરતી વખતે ત્રણેય આરોપીઓ પર ભારે આર્થિક દંડ પણ લાદ્યો છે. કોર્ટે દરેક દોષિતને રૂ.3-3 લાખનો રોકડ દંડ ભરવાનો આદેશ આપ્યો છે. દોષિત ઠરેલા શખ્સોમાં અમદાવાદના જુહાપુરા વિસ્તારનો વસીમ કુરેશી, બહેરામપુરાનો મહમદ રફીક કુરેશી અને ફતેહવાડી વિસ્તારનો અસફાક બહેલિમ સામેલ છે. આ ત્રણેય ગુનેગારોને 'ગુજરાત પશુ સંરક્ષણ (સુધારા) અધિનિયમ' અને 'પ્રાણીઓ પ્રત્યે ક્રૂરતા નિવારણ અધિનિયમ'ની વિવિધ કડક કલમો હેઠળ દોષિત જાહેર કરવામાં આવ્યા છે.
277 કિલો ગૌમાંસ સાથે દરોડો અને પોલીસ કાર્યવાહી
આ સમગ્ર ઘટના 22 ઓગસ્ટ, 2024ના રોજ સામે આવી હતી, જ્યારે પોલીસે ચોક્કસ બાતમીના આધારે જામલા ગામમાં આવેલા લાલાભાઈ સેનમાના નિવાસસ્થાને દરોડો પાડ્યો હતો. પોલીસ તપાસ દરમિયાન ત્યાંથી રૂ.55,000ની અંદાજિત કિંમત ધરાવતું 277 કિલોગ્રામ ગૌમાંસ જપ્ત કરવામાં આવ્યું હતું. આ ઉપરાંત, ઘટનાસ્થળેથી ગૌહત્યા માટે ઉપયોગમાં લેવાયેલાં તીક્ષ્ણ હથિયારો તથા માંસની ગેરકાયદે હેરફેર માટે વપરાતું વાહન પણ કબજે લેવાયું હતું. સઘન તપાસમાં ખૂલ્યું હતું કે આરોપીઓ આ જથ્થો ગુલામ મોઈન કુરેશી નામના શખ્સને વેચવાની પેરવીમાં હતા. કેસની સુનાવણી દરમિયાન એક આરોપીનું અવસાન થયું હતું, જ્યારે અન્ય બે આરોપીઓને પુરાવાના અભાવે છોડી મુકાયા હતા અને મુખ્ય 3 આરોપીઓ પર વાંક સાબિત થયો હતો.
"ગાય સમગ્ર વિશ્વની માતા છે": અદાલતે વેદો અને શ્લોકોનો કર્યો ઉલ્લેખ
ચૂકાદો આપતી વખતે સેશન્સ જજે પ્રાચીન સંસ્કૃત શ્લોકો, વેદો અને હિન્દુ શાસ્ત્રોનો સવિશેષ ઉલ્લેખ કર્યો હતો. કોર્ટે ભાવુક અને તાત્વિક ટિપ્પણી કરતાં જણાવ્યું હતું કે, "ગાય માત્ર એક પ્રાણી નથી, પરંતુ તેને સમગ્ર બ્રહ્માંડની માતા (વિશ્વમાતા) માનવામાં આવે છે. તે માનવ જીવન, પર્યાવરણ અને સમાજના કલ્યાણ માટે અનિવાર્ય છે. ગૌરક્ષા એ માત્ર કાયદાકીય ફરજ નથી પણ ધર્મ અને કરુણા સાથે જોડાયેલું પવિત્ર કાર્ય છે." જજે ઉમેર્યું કે ગૌહત્યા જેવા કિસ્સાઓમાં જો કાયદા મુજબ કડકમાં કડક સજા નહીં આપવામાં આવે, તો પૃથ્વી પરથી ગાયોના અસ્તિત્વ સામે મોટું જોખમ ઊભું થઈ શકે છે.
સમાજમાં દાખલો બેસાડતો ઐતિહાસિક નિર્ણય
અદાલતે નોંધ્યું હતું કે આરોપીઓ ગાયના ધાર્મિક અને સાંસ્કૃતિક મહત્વથી પૂરેપૂરા વાકેફ હોવા છતાં તેમણે આ નિષ્ઠુર કૃત્ય આચર્યું હતું. ગૌમાંસનો વેપાર કરીને કમાણી કરવાના હેતુથી કરાયેલી આ ક્રૂરતા સાંસ્કૃતિક મૂલ્યો પર પ્રહાર સમાન છે. આ પ્રકારના ગુનાઓ અટકાવવા અને ગુનેગારોમાં કાયદાનો ભય સ્થાપિત કરવા માટે મહત્તમ સજા આપવી અનિવાર્ય હતી. કલોલ કોર્ટનો આ ચૂકાદો રાજ્યમાં ગૌસંવર્ધન અને ગૌરક્ષા માટે કાયદાકીય રીતે એક નવો દાખલો બેસાડે છે.
