Gujarat Gas CNG price hike November 2026: ગુજરાતના લાખો CNG વાહનચાલકો અને સામાન્ય જનતા પર મોંઘવારીનો વધુ એક મોટો ફટકો પડ્યો છે. અદાણી ગેસ બાદ હવે ગુજરાત એનર્જી (ગુજરાત ગેસ) દ્વારા પણ CNG ગેસના ભાવમાં પ્રતિ કિલોએ ₹5નો તોતિંગ વધારો કરવામાં આવ્યો છે. એક જ દિવસમાં ₹5નો ભાવ વધારો લાગુ કરવામાં આવતા હવે ગુજરાત એનર્જીના CNG ગેસનો ભાવ પ્રતિ કિલો ₹88.76થી વધીને સીધો ₹93.76 પર પહોંચી ગયો છે. આ નવો ભાવ વધારો મધ્યરાત્રિએ 12 વાગ્યા બાદથી સમગ્ર રાજ્યમાં લાગુ કરી દેવામાં આવ્યો છે.
અંદાજે ચાર મહિના બાદ ફરી ભાવ વધારો
ઉલ્લેખનીય છે કે, અગાઉ ગુજરાત એનર્જી ગેસ દ્વારા 18 ઓગસ્ટના રોજ CNG ના ભાવમાં ફેરફાર કરવામાં આવ્યો હતો. તે સમયે પ્રતિ કિલો ₹3.75નો વધારો ઝીંકવામાં આવતા CNGનો ભાવ ₹85.01થી વધીને ₹88.76 થયો હતો. હવે અંદાજે ચાર મહિનાના સમયગાળા બાદ ફરી એકવાર કંપનીએ ₹5નો મોટો વધારો કરતાં મધ્યમવર્ગીય પરિવારોનું માસિક બજેટ ખોરવાઈ ગયું છે.
CNGના ભાવ પેટ્રોલ-ડીઝલની સમકક્ષ પહોંચતા રિક્ષા અને ટેક્સી ચાલકોની મુશ્કેલી વધી
દિવાળીના તહેવારો બાદ મોંઘવારીના માર વચ્ચે CNG ના ભાવમાં થયેલા આ વધારાથી વાહનચાલકોને ભારે આર્થિક નુકસાન વેઠવું પડશે. CNGથી ચાલતી કાર, ઓટોરિક્ષા અને ટેક્સીનો ઉપયોગ કરતા લાખો લોકોને હવે ઈંધણ માટે અગાઉ કરતાં ઘણા વધુ નાણાં ખર્ચવા પડશે. સતત થઈ રહેલા ભાવ વધારાને કારણે હવે CNG અને પેટ્રોલ-ડીઝલના ભાવ લગભગ સમકક્ષ પહોંચી ગયા છે, જેનાથી પરિવહન ખર્ચ વધવાની ભીતિ સેવાઈ રહી છે. આ અગાઉ અદાણી ગેસે પણ 13 દિવસમાં બે વાર (23 ઓક્ટોબરે ₹4.45 અને 5 નવેમ્બરે ₹2.03) ભાવ વધારતા અદાણી CNGનો ભાવ ₹100ને પાર કરીને ₹100.77 પર પહોંચી ચૂક્યો છે.
CNGના ભાવ વધારા પાછળના મુખ્ય 5 કારણો
કંપનીના સૂત્રો અને ઉદ્યોગ નિષ્ણાતોના જણાવ્યા અનુસાર, CNGના ભાવ વધારા પાછળ નીચે મુજબના મુખ્ય પરિબળો જવાબદાર છે:
ગેસ ખરીદી ખર્ચમાં વધારો: નવા કૂવાના ગેસ અને હાઈ-પ્રેશર હાઈ-ટેમ્પરેચર (HPHT) ગેસની ઓછી પ્રાપ્તિ તેમજ હાજર બજારમાં LNG ના ઊંચા ભાવોને કારણે ગેસ ખરીદવાનો સરેરાશ ખર્ચ ખૂબ વધી ગયો છે.
નવા કૂવાના ગેસની અછત: સસ્તા દરે મળતા સ્થાનિક કુદરતી ગેસ (NWG) ની ફાળવણી ઘટતા ઓછા ખર્ચે ગેસ મેળવવાની ઉપલબ્ધતા ઘટી છે.
HPHT ગેસ ક્વોટામાં ઘટાડો: 19 ઓક્ટોબર, 2026ના HPHT ઓફિસ મેમોરેન્ડમ મુજબ, પ્રાથમિકતા ધરાવતા ક્ષેત્રો માટે ગેસના ક્વોટામાં ઘટાડો થતા સ્થાનિક ગેસની અછત સર્જાઈ છે.
આંતરરાષ્ટ્રીય બજારમાં ઉછાળો: વૈશ્વિક બજારમાં સ્પોટ LNGના ભાવ ફેબ્રુઆરી ૨૦૨૬ ના $10-12 MMBtuથી વધીને અંદાજે $30 MMBtu સુધી પહોંચી ગયા છે.
પુરવઠાની મર્યાદા અને ખર્ચ સરભર: મુખ્ય ગેસ ઉત્પાદકો તરફથી પુરવઠામાં કાપ મુકાતા મોંઘા વૈકલ્પિક સ્રોતો પર નિર્ભર રહેવું પડ્યું છે, જેથી અવિરત પુરવઠો જાળવી રાખવા કંપનીએ આ ભાવ સુધારો કરવો પડ્યો છે.
વિશેષ અને વધારાની માહિતી
ગુજરાતમાં CNG વાહનોની સંખ્યા: ગુજરાત દેશનું સૌથી મોટું CNG નેટવર્ક ધરાવતું રાજ્ય છે, જ્યાં અંદાજે 15 લાખથી વધુ CNG વાહનો અને 1,000થી વધુ CNG પંપ કાર્યરત છે. ભાવ વધારાની સીધી અસર સૌરાષ્ટ્ર, દક્ષિણ ગુજરાત અને મધ્ય ગુજરાતના લાખો વાહનચાલકો પર પડશે.
સરભર કરવાનો પ્રયાસ: કંપનીના જણાવ્યા મુજબ ખરીદી ખર્ચમાં થયેલા અસાધારણ વધારાનો મોટો હિસ્સો કંપનીએ પોતે સહન કર્યો છે અને ગ્રાહકો પર ઓછો બોજ પડે તે માટે મર્યાદિત ભાવ વધારો લાગુ કરાયો છે.








