Ahmedabad Gandhinagar Metro schedule Diwali: ગુજરાત મેટ્રો રેલ કોર્પોરેશન દ્વારા આગામી દિવાળીના તહેવારને ધ્યાનમાં રાખીને અમદાવાદ-ગાંધીનગર મેટ્રો ટ્રેન સેવાઓના સમયમાં આંશિક ફેરફાર કરવામાં આવ્યો છે. 8 નવેમ્બર, 2026ના રોજ દિવાળીના પાવન પર્વે મેટ્રો ટ્રેનો તેના ટર્મિનલ સ્ટેશનો પરથી નિયમિત સમય કરતાં વહેલી ઉપડશે અને રાત્રિના સમયે મેટ્રો સેવા બંધ રહેશે.
હાલનો સમય અને ફેરફાર પાછળનું મુખ્ય કારણ
હાલમાં, અમદાવાદમાં સવારે 6:20થી રાત્રે 11:00 વાગ્યા સુધી અને ગાંધીનગરમાં સવારે 6:20થી રાત્રે 9:00 વાગ્યા સુધી મેટ્રો સેવાઓ કાર્યરત છે પરંતુ, દિવાળીની રાત્રે શહેરમાં મોટા પાયે ફટાકડા ફોડવામાં આવે છે. ફટાકડાની આતશબાજી વચ્ચે મુસાફરોની સુરક્ષા અને ઓપરેશનલ સિક્યોરિટી જળવાઈ રહે તે હેતુથી GMRC દ્વારા 8 નવેમ્બર પૂરતો સેવાઓ વહેલી સમેટી લેવાનો નિર્ણય લેવાયો છે. દેશના અન્ય મોટા શહેરોના મેટ્રો રેલ નેટવર્કમાં પણ દિવાળીના દિવસે આ જ પ્રકારની સાવચેતીના પગલાં લેવામાં આવે છે.
અમદાવાદ કોરિડોર માટે દિવાળીનો વિશેષ સમય
નવા સમયપત્રક મુજબ, અમદાવાદ કોરિડોર પર વસ્ત્રાલ ગામથી થલતેજ ગામ અને APMCથી કોટેશ્વર રોડ વચ્ચે મેટ્રો ટ્રેન સેવાઓ સવારે 6:20થી સાંજે 7:00 વાગ્યા સુધી જ ચાલશે. જે મુસાફરો રાત્રે ખરીદી કરવા કે સગા-સંબંધીઓને મળવા જવાના હોય, તેમણે પોતાની મુસાફરી સાંજના 7 વાગ્યા પહેલા પૂર્ણ કરી લેવી પડશે.
ગાંધીનગર કોરિડોર માટેનો બદલાયેલો સમય
અમદાવાદની સરખામણીમાં ગાંધીનગર કોરિડોર પર ટ્રેનો હજુ થોડી વધુ વહેલી બંધ થઈ જશે. APMCથી મહાત્મા મંદિર અને APMCથી ગિફ્ટ સિટી વચ્ચેની મેટ્રો ટ્રેન સેવાઓ સવારે 6:20થી સાંજે 6:00 વાગ્યા સુધી જ કાર્યરત રહેશે.
8 નવેમ્બર માટે છેલ્લી મેટ્રો ટ્રેનનું સત્તાવાર ટાઈમટેબલ
આગામી 8 નવેમ્બર માટે ટર્મિનલ સ્ટેશનો પરથી ઉપડનારી છેલ્લી મેટ્રો ટ્રેનનું સત્તાવાર ટાઈમટેબલ જાહેર કરવામાં આવ્યું છે. નવા સમયપત્રક મુજબ, વસ્ત્રાલ ગામથી થલતેજ ગામ કોરિડોર પર મેટ્રો સવારે 6:20થી સાંજે 7:00 વાગ્યા સુધી દોડશે, જેમાં વસ્ત્રાલથી થલતેજ માટેની છેલ્લી ટ્રેન સાંજે 7:00 વાગ્યે અને થલતેજથી વસ્ત્રાલ માટેની છેલ્લી ટ્રેન સાંજે 7:05 વાગ્યે ઉપડશે. તેવી જ રીતે, APMCથી કોટેશ્વર રોડ રૂટ પર પણ ટ્રેનો સવારે 6:20થી સાંજે 7:00 વાગ્યા સુધી ઓપરેટ થશે, જેમાં APMCથી કોટેશ્વર માટેની છેલ્લી ટ્રેન સાંજે 7:08 વાગ્યે અને કોટેશ્વરથી APMC માટે સાંજે 7:05 વાગ્યે રવાના થશે. આ ઉપરાંત, APMCથી મહાત્મા મંદિર કોરિડોર પર મેટ્રોનો સમય સવારે 6:20થી સાંજે 6:00 વાગ્યા સુધીનો રહેશે, જેમાં APMCથી મહાત્મા મંદિર જવા માટે છેલ્લી ટ્રેન સાંજે 5:30 વાગ્યે અને ત્યાંથી પરત APMC આવવા માટે સાંજે 6:08 વાગ્યે મળશે. જ્યારે APMCથી ગિફ્ટ સિટી રૂટ પર પણ સેવાઓ સવારે 6:20થી સાંજે 6:00 વાગ્યા સુધી જ ચાલુ રહેશે, જેમાં APMCથી ગિફ્ટ સિટી માટેની છેલ્લી મેટ્રો સાંજે 5:16 વાગ્યે અને ગિફ્ટ સિટીથી APMC આવવા માટેની છેલ્લી ટ્રેન સાંજે 6:21 વાગ્યે ઉપડશે.
બીજા દિવસથી સેવાઓ રાબેતા મુજબ કાર્યરત થશે
GMRCના સત્તાવાર નિવેદન અનુસાર આ ફેરફાર માત્ર દિવાળીના એક દિવસ પૂરતો જ મર્યાદિત છે. દિવાળીના બીજા દિવસ એટલે કે નૂતન વર્ષ થી મેટ્રો સેવાઓ તેના નિયમિત અને રેગ્યુલર સમયપત્રક મુજબ ફરીથી રાબેતા મુજબ દોડવા લાગશે. મુસાફરોને અપીલ કરવામાં આવી છે કે, તેઓ મેટ્રો સ્ટેશન પર પહોંચતા પહેલા સમયપત્રક ચકાસી લે.
તહેવારોની ભીડમાં મેટ્રો બની છે જીવાદોરી
તાજેતરમાં જ અમદાવાદ-ગાંધીનગર મેટ્રો ફેઝ-2ની શરૂઆત થયા બાદ બંને ટ્વીન સિટીઝ વચ્ચે મુસાફરી સરળ બની ગઈ છે. દિવાળી જેવા મોટા તહેવારોમાં એસ.જી. હાઈ-વે, આશ્રમ રોડ અને ગાંધીનગર હાઈવે પર ભારે ટ્રાફિક જામની સમસ્યા રહે છે. આ સમયગાળા દરમિયાન મેટ્રો ટ્રેન નાગરિકો માટે સૌથી સલામત, ઝડપી અને ટ્રાફિક મુક્ત મુસાફરીનો ઉત્તમ વિકલ્પ સાબિત થઈ રહી છે. ગત વર્ષે પણ તહેવારોમાં મેટ્રોમાં રેકોર્ડબ્રેક મુસાફરો નોંધાયા હતા, જેને જોતા આ વર્ષે પણ દિવાળી પહેલા બજારોમાં જવા માટે હજારો લોકો મેટ્રોનો ઉપયોગ કરી રહ્યા છે.
