AMC sealing drive Ahmedabad: અમદાવાદ મ્યુનિસિપલ કોર્પોરેશન દ્વારા શહેરમાં સ્વચ્છતા જાળવવા માટે કડક વલણ અપનાવવામાં આવ્યું છે. અમદાવાદના પશ્ચિમ ઝોનમાં જાહેરમાં કચરો ફેંકવા અને ગંદકી કરવા બદલ AMCની ટીમે સપાટો બોલાવ્યો છે. તાજેતરમાં હાથ ધરવામાં આવેલી ત્રણ દિવસની એન્ફોર્સમેન્ટ ડ્રાઈવ અંતર્ગત જાણીતા નામો 'છાશવાલા' અને 'જય ભવાની વડાપાંવ' સહિત કુલ 4 કોમર્શિયલ એકમોને સીલ મારી દેવામાં આવ્યા છે, જેના કારણે સ્થાનિક વેપારીઓમાં ફફડાટ વ્યાપી ગયો છે.
જાણીતી બ્રાન્ડ્સ સહિત આ 4 એકમોને કરાયા સીલ
સોલિડ વેસ્ટ મેનેજમેન્ટ વિભાગની કાર્યવાહીમાં કોઈપણ પ્રકારની શેહશરમ રાખવામાં આવી નથી. AMC દ્વારા જે ચાર એકમોને સીલ કરવામાં આવ્યા છે, તેમાં ન્યૂ રાણીપનું 'બર્ગોનોમિક્સ', રાણીપ વિસ્તારમાં ધરતી સંકેત પાસે આવેલું 'છાશવાલા', પાલડીના ભાઠા વિસ્તારમાં આવેલું પ્રખ્યાત 'જય ભવાની વડાપાંવ' અને નારણપુરાનો 'આશાપુરી ટી સ્ટોલ'નો સમાવેશ થાય છે. આ એકમોની આસપાસ ભારે ગંદકી અને કચરો જોવા મળ્યો હતો.
3 દિવસની સઘન ઝુંબેશમાં લાખો રૂપિયાનો દંડ વસૂલાયો
ડેપ્યુટી મ્યુનિસિપલ કમિશનર (વેસ્ટ ઝોન) ના સીધા માર્ગદર્શન હેઠળ વેસ્ટ ઝોન સોલિડ વેસ્ટ મેનેજમેન્ટ વિભાગ દ્વારા આ ઝુંબેશ ચલાવવામાં આવી હતી. આ ઝુંબેશ દિવસ અને રાત બંને સમયે વિવિધ વોર્ડમાં આવેલી કોમર્શિયલ દુકાનો, પાનના ગલ્લાઓ અને ચાની કીટલીઓ પર હાથ ધરવામાં આવી હતી. આ ત્રણ દિવસની કડક ડ્રાઈવમાં વહીવટી ચાર્જ અને દંડ પેટે કુલ ₹2.35 લાખની માતબર રકમ વસૂલ કરવામાં આવી છે.
પ્રતિબંધિત પ્લાસ્ટિક જપ્ત અને 166 દુકાનોને ફટકારાઈ નોટિસ
આ ચેકિંગ દરમિયાન AMCની વિવિધ ટીમોએ 249 જેટલા એકમોનું બારીકાઈથી ચેકિંગ કર્યું હતું. જેમાંથી ગંદકી કરવા અને પ્રતિબંધિત સિંગલ-યુઝ પ્લાસ્ટિકનો ઉપયોગ કરવા બદલ 166 એકમોને કડક નોટિસ ફટકારવામાં આવી છે. ચેકિંગ દરમિયાન અધિકારીઓએ 12.5 કિલોગ્રામ જેટલું પ્રતિબંધિત પ્લાસ્ટિક જપ્ત કર્યું હતું. પ્લાસ્ટિક સંબંધિત નિયમોના ભંગ બદલ ₹95,000 નો દંડ, જ્યારે જાહેર સ્વચ્છતા અને ન્યૂસન્સ ફેલાવવાના નિયમ ભંગ બદલ વધારાના ₹1.40 લાખનો દંડ વસૂલવામાં આવ્યો હતો.
સ્વચ્છતા જાળવવા અને કચરાના વર્ગીકરણ માટે જાગૃતિ અભિયાન
દંડાત્મક કાર્યવાહીની સાથે સાથે મ્યુનિસિપલ કોર્પોરેશન દ્વારા રહેણાંક અને કોમર્શિયલ વિસ્તારોમાં જાગૃતિ અભિયાન પણ ચલાવવામાં આવી રહ્યું છે. AMC દ્વારા નાગરિકો અને વેપારીઓને અપીલ કરવામાં આવી છે કે, તેઓ સૂકો અને ભીનો કચરો અલગ પાડે, કચરો માત્ર મ્યુનિસિપલ કલેક્શન વાહનોમાં જ આપે અને કોઈપણ સંજોગોમાં જાહેર સ્થળોએ કચરો ન ફેંકે. AMCએ સ્પષ્ટ કર્યું છે કે જાહેર આરોગ્યના રક્ષણ માટે આગામી દિવસોમાં પણ આવી ઝુંબેશ અવિરત ચાલુ રહેશે.
સ્વચ્છ સર્વેક્ષણ અને જાહેર આરોગ્ય માટે AMC ની 'ઝીરો ટોલરન્સ' નીતિ
અમદાવાદને ભારતના સૌથી સ્વચ્છ શહેરોની યાદીમાં ટોચ પર લાવવા માટે AMC અત્યારે 'ઝીરો ટોલરન્સ' નીતિ પર કામ કરી રહ્યું છે. ખાસ કરીને ફૂડ જોઈન્ટ્સ અને ખાણીપીણીની બજારોમાં રાત્રિના સમયે ડસ્ટબિન ન રાખવા અને રસ્તા પર એઠવાડ ફેંકવાની ફરિયાદો લાંબા સમયથી ઉઠી રહી હતી. ચોમાસા અને શિયાળાની શરૂઆતમાં મચ્છરજન્ય રોગોનો ઉપદ્રવ વધે છે, જેમાં જાહેરમાં ફેંકાયેલો કચરો અને પ્લાસ્ટિકના કપ મુખ્ય ભાગ ભજવે છે. સિંગલ-યુઝ પ્લાસ્ટિક ડ્રેનેજ લાઈનોને જામ કરી દે છે, જેનાથી શહેરમાં ગટર ઉભરાવવાની સમસ્યા સર્જાય છે. આ કાર્યવાહી દર્શાવે છે કે બ્રાન્ડ ગમે તેટલી મોટી હોય, જો પર્યાવરણ અને લોકોના સ્વાસ્થ્ય સાથે ચેડાં થશે તો AMC તેનું લાયસન્સ રદ્દ કરવા અને સીલિંગ કરવા સુધીના આકરા પગલાં લેતા અચકાશે નહીં. ભવિષ્યમાં પણ એસ.જી. હાઈવે, પ્રહલાદનગર અને સિંધુ ભવન રોડ પરના કાફે અને રેસ્ટોરન્ટ્સ પર પણ આવું સરપ્રાઈઝ ચેકિંગ હાથ ધરવામાં આવી શકે છે.
