Chaitar Vasava Brother News: આમ આદમી પાર્ટી (AAP)ના ધારાસભ્ય ચૈતર વસાવાના નાના ભાઈ શાંતિલાલ વસાવાએ ઝેરી દવા પીને આપઘાતનો પ્રયાસ કર્યો હોવાની ઘટના સામે આવી છે. 35 વર્ષીય શાંતિલાલને પહેલાં ખાનગી હોસ્પિટલમાં સારવાર માટે ખસેડવામાં આવ્યા હતા. ત્યારબાદ વધુ સારવાર માટે તેમને સુરતની નવી સિવિલ હોસ્પિટલમાં લાવવામાં આવ્યા હતા. હાલ તેમની ICUમાં સારવાર ચાલી રહી છે.
ચૈતર વસાવાને સાત વર્ષની સજા બાદ તણાવમાં હોવાનો દાવો
મળતી માહિતી મુજબ, ચૈતર વસાવાને સાત વર્ષની જેલની સજા ફટકારવામાં આવ્યા બાદ તેમના નાના ભાઈ શાંતિલાલ વસાવા લાંબા સમયથી માનસિક તણાવમાં રહેતા હોવાનો દાવો કરવામાં આવી રહ્યો છે. આ તણાવને કારણે તેમણે ઝેરી દવા પી લીધી હોવાની પ્રાથમિક માહિતી સામે આવી છે.
વધુ સારવાર માટે નવી સિવિલ હોસ્પિટલમાં ખસેડાયા
ઝેરી દવા પીવાના બનાવ બાદ શાંતિલાલ વસાવાને શરૂઆતમાં ખાનગી હોસ્પિટલમાં લઈ જવામાં આવ્યા હતા. જોકે, ત્યારબાદ તેમને વધુ સારવાર માટે સુરતની નવી સિવિલ હોસ્પિટલમાં ખસેડવામાં આવ્યા હતા. હાલ તબીબી દેખરેખ હેઠળ તેમની ICUમાં સારવાર ચાલી રહી છે.
પરિવારજનો હોસ્પિટલ દોડી પહોંચ્યા
શાંતિલાલ વસાવાએ ઝેરી દવા પી આપઘાતનો પ્રયાસ કર્યો હોવાની જાણ થતાં પરિવારજનો હોસ્પિટલ દોડી પહોંચ્યા હતા. હાલ તેઓ હોસ્પિટલમાં સારવાર હેઠળ છે. ઘટનાને પગલે પરિવારજનોમાં ચિંતા જોવા મળી રહી છે. આપઘાતના પ્રયાસ પાછળનાં ચોક્કસ કારણો અને શાંતિલાલ વસાવાની તબિયત અંગે વધુ સત્તાવાર વિગતો સામે આવે તે પછી જ સ્થિતિ સ્પષ્ટ થઈ શકશે.
