Chronic Back Pain Health Risks Osteoarthritis Slipped Disc: જો તમે છેલ્લા કેટલાક દિવસોથી સતત પીઠના દુખાવાની સમસ્યાથી ઝઝૂમી રહ્યા હોવ, તો આ સ્થિતિને ક્યારેય સામાન્ય ગણીને નજરઅંદાજ ન કરવી જોઈએ. નવી દિલ્હી સ્થિત પ્રખ્યાત બીએલકે મેક્સ હોસ્પિટલના પ્રિન્સિપલ ડિરેક્ટર અને હેડ તથા ઓર્થો સ્પાઇન સર્જન ડૉ. પુનીત ગિરધરના જણાવ્યા અનુસાર, લાંબા સમય સુધી પીઠનો દુખાવો રહેવો એ શરીરની અંદર ચાલી રહેલી અનેક ગંભીર બીમારીઓ અથવા શારીરિક સમસ્યાઓનો સંકેત હોઈ શકે છે. આ સમસ્યા સમયસર ઓળખીને યોગ્ય ઉપચાર ન કરવાથી તે ગંભીર સ્વરૂપ ધારણ કરી શકે છે.
પીઠના સતત દુખાવા પાછળના મુખ્ય કારણો કયા છે?
તબીબી વિશ્લેષણ મુજબ પીઠના દુખાવા માટે નીચે મુજબના મુખ્ય કારણો જવાબદાર હોઈ શકે છે:
સ્નાયુઓ અથવા લિગામેન્ટમાં ખેંચાણ: ભારે વજન ઉપાડવાથી, અચાનક ખોટી રીતે હલનચલન કરવાથી અથવા પડી જવાથી પીઠના સ્નાયુઓ અને કરોડરજ્જુના લિગામેન્ટમાં તણાવ આવે છે. જો શારીરિક મુદ્રા યોગ્ય ન હોય, તો સ્નાયુઓમાં દુખાવો અને ખેંચાણ વધી જાય છે.
હર્નિએટેડ અથવા ઉભરી આવેલી ડિસ્ક: આપણી કરોડરજ્જુની હાડકાં વચ્ચે ડિસ્ક કુશનનું કામ કરે છે. કેટલીકવાર અંદરનો નરમ પદાર્થ બહાર નીકળી જાય છે અને નસ પર દબાણ કરે છે, જેનાથી અસહ્ય પીડા થાય છે.
ઓસ્ટિયો આર્થરાઈટિસ અને સ્પાઇનલ સ્ટેનોસિસ: આ સમસ્યા પીઠના નીચલા ભાગને પ્રભાવિત કરે છે. સંધિવા (Arthritis) ને કારણે સ્નાઇનલ કોર્ડની આસપાસની જગ્યા ઓછી થઈ જાય છે, જેને મેડિકલ ભાષામાં સ્પાઇનલ સ્ટેનોસિસ કહે છે.
પીઠના દુખાવાથી બચવા અને રાહત મેળવવાના અસરકારક ઉપાયો
વધુ પડતું વજન હોવાને કારણે પીઠના સ્નાયુઓ પર સતત દબાણ રહે છે. જો તમારું વજન વધારે હોય, તો વજન નિયંત્રિત કરીને પીઠના દર્દથી બચી શકાય છે. આ માટે નિયમિત વ્યાયામ અને એરોબિક પ્રવૃત્તિઓ કરવી ખૂબ જ ફાયદાકારક છે. આ કસરતો તમારી પીઠની મજબૂતાઈ વધારે છે અને કોર સ્નાયુઓને સક્ષમ બનાવે છે. આ ઉપરાંત રોજબરોજ ઉઠતા-બેસતી વખતે કરોડરજ્જુ સીધી રાખવાની ટેવ પાડવી જોઈએ.
ક્યારે તુરંત ડૉક્ટરનો સંપર્ક કરવો જરૂરી છે?
જો તમને નીચે જણાવેલા લક્ષણો દેખાય તો સમય બગાડ્યા વગર નિષ્ણાત તબીબ પાસે જવું જોઈએ.
જો પીઠમાં ખૂબ જ તીવ્ર દુખાવો થતો હોય અને આરામ કરવા છતાં તેમાં રાહત ન મળતી હોય.
દુખાવો એક કે બંને પગમાં નીચેની તરફ ફેલાતો હોય, ખાસ કરીને જ્યારે દુખાવો ઘૂંટણની નીચે સુધી જતો હોય.
દુખાવાને કારણે એક કે બંને પગમાં અચાનક નબળાઈ, બહેરાશ અથવા ઝણઝણાટી અનુભવાતી હોય.
પીઠના દર્દની સાથે વગર કોઈ સ્પષ્ટ કારણે વજન ઝડપથી ઘટવા લાગે.
દુખાવાની સાથે પેશાબ કે આંતરડા સંબંધિત નિયંત્રણ ગુમાવવાની સમસ્યાઓ પણ ઉત્પન્ન થાય.
