Ayushman card: કેન્દ્ર સરકારની આયુષ્માન ભારત પ્રધાનમંત્રી જન આરોગ્ય યોજના જરૂરિયાતમંદ પરિવારો માટે મોટી રાહત સમાન છે. બીમારી દરમિયાન હોસ્પિટલમાં દાખલ થવા અને સારવારનો ખર્ચ ઉઠાવવો ઘણા પરિવારો માટે મુશ્કેલ બને છે, ત્યારે આ યોજના હેઠળ પાત્ર પરિવારોને વાર્ષિક રૂ. 5 લાખ સુધીની કેશલેસ સારવારની સુવિધા મળે છે. જોકે, આ યોજનાનો લાભ મેળવવા માટે નિર્ધારિત પાત્રતા શરતો નક્કી કરવામાં આવી છે અને સૌથી પહેલા પરિવારનું નામ યોજનાની પાત્રતા યાદીમાં સામેલ હોવું જરૂરી છે.
કોનું આયુષ્માન કાર્ડ બની શકે નહીં?
આયુષ્માન કાર્ડ મેળવવા માટે પરિવાર યોજનાના લાભાર્થી તરીકે સૂચિબદ્ધ હોવો એ મુખ્ય આધાર છે. સામાન્ય પાત્રતા નિયમો મુજબ કેટલાક કિસ્સાઓમાં પરિવાર યોજનામાંથી બહાર રહી શકે છે:
સરકારી કર્મચારી: જો પરિવારનો કોઈ સભ્ય સરકારી કર્મચારી હોય, તો સામાન્ય પાત્રતા નિયમો હેઠળ પરિવારને યોજનામાંથી બહાર રાખવામાં આવી શકે છે.
આર્થિક રીતે સંપન્ન પરિવારો: આર્થિક રીતે સંપન્ન પરિવારોને સામાન્ય પાત્રતા યાદીમાં સામેલ કરવામાં આવતા નથી.
કયા લોકોને મળી શકે છે યોજનાનો લાભ?
નિર્ધારિત ધોરણો અને પાત્રતા યાદીના આધારે વિવિધ વર્ગના લોકોને આ યોજનાનો લાભ મળે છે:
ગ્રામીણ વિસ્તારના પરિવારો: ગ્રામીણ વિસ્તારોમાં એવા પરિવારોને પ્રાથમિકતા અપાય છે જેમનું મકાન કાચું હોય અને પરિવારમાં 16 થી 59 વર્ષની વય વચ્ચે કોઈ પુખ્ત સભ્ય ન હોય. આ ઉપરાંત મહિલા મુખ્ય હોય અને પરિવારમાં 16 થી 59 વર્ષનો કોઈ પુખ્ત પુરુષ સભ્ય ન હોય તેવા પરિવારો પણ પાત્રતા યાદીમાં સામેલ થઈ શકે છે.
SC/ST અને ભૂમિહીન મજૂરો: અનુસૂચિત જાતિ (SC) અને અનુસૂચિત જનજાતિ (ST) ના પરિવારો તેમજ ભૂમિહીન મજૂર પરિવારોને નિર્ધારિત માપદંડો મુજબ લાભ મળે છે.
શહેરી વિસ્તારના કામદારો: શહેરી વિસ્તારોમાં ઘરેલું કામદારો, શેરી ફેરિયાઓ (રેહડી-પાથરણાવાળા), બાંધકામ શ્રમિકો, સફાઈ કામદારો, દરજી, મોચી અને રિક્ષા ચાલક જેવી શ્રેણીના કામદારોને સામેલ કરાયા છે.
વરિષ્ઠ નાગરિકો: 70 વર્ષ કે તેથી વધુ વયના નાગરિકો પણ આ યોજનાના લાભ માટે પાત્ર ગણાય છે.








