Swine Flu H1N1 Symptoms Gujarati: દેશના અનેક રાજ્યોમાં સ્વાઈન ફ્લૂના કેસો સામે આવી રહ્યા છે. આવા સમયે તાવ, ઉધરસ, શરદી, માથાનો દુખાવો કે શરીરમાં અસહ્ય દુખાવો થાય ત્યારે ઘણા લોકો તબીબી સલાહ વિના મેડિકલ સ્ટોર પરથી જાતે જ એન્ટિબાયોટિક્સ ખરીદીને ખાવાની ભૂલ કરી બેસે છે. ડૉક્ટરોના જણાવ્યા મુજબ સ્વાઈન ફ્લૂના લક્ષણોમાં ટેસ્ટ કરાવ્યા વિના કે ડૉક્ટરની સલાહ વગર એન્ટિબાયોટિક્સ લેવી સ્વાસ્થ્ય માટે અત્યંત જોખમી સાબિત થઈ શકે છે.
વાયરલ ઈન્ફેક્શનમાં એન્ટિબાયોટિક્સ કેમ નકામી છે?
દિલ્હીના એક સ્પેશિયાલિસ્ટ ડોક્ટરના જણાવ્યા અનુસાર, સ્વાઈન ફ્લૂ એ ઇન્ફ્લુએન્ઝા એ (H1N1) વાયરસથી થતો ચેપ છે, બેક્ટેરિયાથી નહીં. એન્ટિબાયોટિક્સ માત્ર બેક્ટેરિયલ ઈન્ફેક્શન સામે જ કામ કરે છે, વાયરસ સામે નહીં. તેથી વાયરલ ફ્લૂમાં બિનજરૂરી એન્ટિબાયોટિક્સ લેવાથી કોઈ ફાયદો થતો નથી. જો ડૉક્ટરને દર્દીમાં સેકન્ડરી બેક્ટેરિયલ ઈન્ફેક્શનની આશંકા જણાય, તો જ તેઓ જરૂરિયાત મુજબ એન્ટિબાયોટિક આપી શકે છે.
સ્વાઈન ફ્લૂના મુખ્ય લક્ષણો અને યોગ્ય સારવાર
સ્વાઈન ફ્લૂ થાય ત્યારે દર્દીમાં નીચે મુજબના લક્ષણો જોવા મળે છે.
100થી 104 ડિગ્રી સુધીનો તાવ
સૂકી ઉધરસ અને ગળામાં બળતરા કે દુખાવો
નાક બંધ થવું અથવા નાકમાંથી સતત પાણી વહેવું
અસહ્ય માથાનો દુખાવો અને સ્નાયુઓનો દુખાવો
કેટલાક કિસ્સાઓમાં શ્વાસ લેવામાં તકલીફ અને પેટની સમસ્યાઓ
આ લક્ષણો દેખાય ત્યારે ડૉક્ટર દર્દીની સ્થિતિ અને બ્લડ ટેસ્ટના આધારે એન્ટિવાયરલ દવાઓ (જેમ કે Oseltamivir / ટૈમીફ્લૂ) આપવાની ભલામણ કરે છે. યોગ્ય સમયે સારવાર શરૂ કરવાથી બીમારીને ગંભીર સ્વરૂપ ધારણ કરતી અટકાવી શકાય છે.
બિનજરૂરી એન્ટિબાયોટિક્સ લેવાના ગંભીર નુકસાન
વાયરલ ઈન્ફેક્શનમાં વગર વિચારે એન્ટિબાયોટિક્સ લેવાથી શરીરમાં એન્ટિમાઈક્રોબાયલ રેઝિસ્ટન્સ (AMR) ઉભું થાય છે. આનો અર્થ એ છે કે, શરીરના બેક્ટેરિયા તે દવાની સામે પ્રતિકારક શક્તિ કેળવી લે છે, જેના કારણે ભવિષ્યમાં જ્યારે ખરેખર કોઈ બેક્ટેરિયલ ઈન્ફેક્શન થાય ત્યારે આ અગત્યની દવાઓ અસર કરતી બંધ થઈ જાય છે.
કોણે વધુ સાવચેતી રાખવાની જરૂર છે?
ડોક્ટર જણાવે છે કે, સામાન્ય દર્દીઓ થોડા દિવસોમાં સાજા થઈ જાય છે પરંતુ, કેટલાક લોકો માટે સ્વાઈન ફ્લૂ જીવલેણ બની શકે છે.
65 વર્ષથી વધુ વયના વૃદ્ધો
નાના બાળકો અને સગર્ભા મહિલાઓ
ડાયાબિટીસ, અસ્થમા, કેન્સર કે હૃદયરોગ જેવી ગંભીર બીમારી ધરાવતા દર્દીઓ
સ્વાઈન ફ્લૂથી બચવાના ઉપાયો અને ઘરગથ્થુ સાવચેતી
હાથની સ્વચ્છતા: બહારથી આવ્યા પછી અથવા છીંક ખાધા પછી સાબુ અને પાણીથી હાથ સરખી રીતે ધોવા.
માસ્કનો ઉપયોગ: ભીડભાડ વાળી જગ્યાઓએ જતી વખતે માસ્ક પહેરવું જેથી વાયરસ હવામાંથી ન ફેલાય.
પૂરતો આરામ અને પ્રવાહી ખોરાક: ફ્લૂના લક્ષણો જણાય ત્યારે પૂરતી ઊંઘ લેવી, નવશેકું પાણી પીવું અને ઉકાળો કે સૂપ જેવા પ્રવાહી પદાર્થોનું સેવન કરવું.
ઈમ્યુનાઈઝેશન (રસીકરણ): દર વર્ષે આવતી મોસમી ફ્લૂની રસી (Flu Vaccine) લેવાથી સ્વાઈન ફ્લૂ અને અન્ય વાયરલ ફ્લૂ સામે રક્ષણ મેળવી શકાય છે.
