Major Shift in Ayushman Bharat Scheme:દેશની સૌથી મોટી સ્વાસ્થ્ય વીમા યોજના એવા આયુષ્માન ભારત પ્રધાનમંત્રી જન આરોગ્ય યોજના (PM-JAY) અંતર્ગત કેન્દ્ર સરકાર દ્વારા એક અત્યંત મહત્વપૂર્ણ અને મોટો નિર્ણય લેવાની તૈયારી કરવામાં આવી રહી છે. આગામી 1 ડિસેમ્બરથી દેશભરમાં આ યોજના હેઠળ આવતી કુલ 112 જેટલી બીમારીઓના પેકેજ અને ઓપરેશનો ખાનગી હોસ્પિટલોમાંથી હટાવીને માત્ર સરકારી હોસ્પિટલોમાં જ ઉપલબ્ધ કરાવવાની વ્યુહરચના ઘડવામાં આવી રહી છે. આનાથી સરકારી તિજોરી પરનું ભારણ ઘટશે અને જાહેર આરોગ્ય માળખાને વધુ મજબૂત બનાવી શકાશે.
રાષ્ટ્રીય સ્વાસ્થ્ય ઓથોરિટી (NHA) દ્વારા રાજ્યોને વિશેષ દિશા-નિર્દેશો જારી
રાષ્ટ્રીય સ્વાસ્થ્ય ઓથોરિટી (NHA) દ્વારા અગાઉ 23 જેટલા સારવાર પેકેજો માત્ર સરકારી હોસ્પિટલો માટે જ અનામત રાખવામાં આવ્યા હતા. આ સફળતા બાદ હવે વધુ 89 નવા પેકેજોને પણ સરકારી સંસ્થાઓ માટે આરક્ષિત કરવા માટે તમામ રાજ્યોના સ્વાસ્થ્ય ઓથોરિટીને સત્તાવાર સૂચનાઓ અને માર્ગદર્શિકાઓ મોકલી દેવામાં આવી છે. આ તમામ સુધારેલી યાદી ટ્રાન્ઝેક્શન મેનેજમેન્ટ સિસ્ટમ (TMS) પોર્ટલ પર લાગુ કરવામાં આવશે. જોકે, આ નવા નિયમને પોતાના રાજ્યમાં આખરી સ્વરૂપે લાગુ કરવો કે નહીં તેનો અંતિમ અધિકાર સંપૂર્ણપણે રાજ્ય સરકારોના હાથમાં રાખવામાં આવ્યો છે.
કયા મુખ્ય વિભાગો અને બીમારીઓનો સમાવેશ કરવામાં આવ્યો છે?
આ નવી વ્યવસ્થા અંતર્ગત સ્ત્રીરોગ વિભાગ (ગાયનેકોલોજી), સામાન્ય શસ્ત્રક્રિયા (જનરલ સર્જરી), માનસિક સ્વાસ્થ્ય, જનરલ મેડિસિન, ઓર્થોપેડિક્સ (હાડકાના રોગો), કાન-નાક-ગળા (ENT) તેમજ નેત્ર રોગ વિભાગની અનેક બીમારીઓને આવરી લેવામાં આવી છે. દર્દીઓ માટે હાઈ-રિસ્ક ડિલિવરી, ગંભીર એનિમિયા (લોહીની ઉણપ), પેન્ક્રિયાટાઈટિસ, મેલેરિયા, ચિકનગુનિયા, ડાયરિયા, તેમજ હિસ્ટરેક્ટોમી (ગર્ભાશયનું ઓપરેશન), મોતિયાનું ઓપરેશન અને હાડકાના સામાન્ય ફ્રેક્ચર જેવી સારવારો હવે સરકારી હોસ્પિટલોમાં જ પ્રાથમિકતાના ધોરણે મળશે.
સરકારી સ્વાસ્થ્ય સુવિધાઓને વેગ આપવા અને ખર્ચ નિયંત્રણનો મુખ્ય ઉદ્દેશ્ય
સરકારી હોસ્પિટલોની સુવિધાઓમાં ધરખમ સુધારો કરવાનો છે. અગાઉથી જ આંધ્રપ્રદેશ, ગુજરાત, છત્તીસગઢ, કેરળ, મધ્યપ્રદેશ અને તમિલનાડુ સહિતના અનેક રાજ્યોમાં આ પ્રકારની વ્યવસ્થા આંશિક કે પૂર્ણ સ્વરૂપે અમલમાં છે. આ નવા બદલાવથી લાખો નાગરિકો સરકારી હોસ્પિટલોમાં ઉપલબ્ધ સુવિધાઓથી સીધા લાભાન્વિત થશે અને યોજનાકીય ભંડોળનો વધુ સચોટ ઉપયોગ થઈ શકશે.
