Stage-4 cancer Next Generation Sequencing: દાયકાઓથી કેન્સરની સારવાર એટલે આખા શરીર પર વિષમ કીમોથેરાપીનો હુમલો, જેમાં કેન્સરના ઘાતક કોષોની સાથોસાથ શરીરના સ્વસ્થ અને તંદુરસ્ત કોષો પણ બળીને રાખ થઈ જતા હતા. ખાસ કરીને જ્યારે કેન્સર સ્ટેજ-4 એટલે કે એડવાન્સ તબક્કામાં પ્રવેશે ત્યારે મોટાભાગના દર્દીઓ માટે તમામ મેડિકલ વિકલ્પો સમાપ્ત માની લેવામાં આવતા હતા. જોકે, આ નિરાશાજનક સ્થિતિ વચ્ચે 'નેક્સ્ટ જનરેશન સિક્વન્સિંગ' એટલે કે એનજીએસ (NGS) ટેકનોલોજીએ ઓન્કોલોજીની દુનિયામાં ઐતિહાસિક ક્રાંતિ સર્જી છે. આ પદ્ધતિ દર્દીના કેન્સરને કોઈ સામાન્ય રોગ તરીકે જોવાને બદલે તેના ડીએનએમાં છુપાયેલી જનીની ક્ષતિઓને બારીકાઈથી પકડી પાડે છે, જેથી અંધારામાં તીર મારવાને બદલે માત્ર રોગના મૂળ પર જ સીધો પ્રહાર કરવો શક્ય બન્યો છે.
દરેક દર્દીનું કેન્સર અલગ અને સારવાર પણ વ્યક્તિગત
સર ગંગારામ હોસ્પિટલના મેડિકલ ઓન્કોલોજી વિભાગના ચેરમેન ડો. શ્યામ અગ્રવાલના જણાવ્યા અનુસાર, એનજીએસ ટેકનોલોજી ટ્યુમરના ડીએનએનું એટલું ઊંડાણપૂર્વક વિશ્લેષણ કરે છે કે જેનાથી શરીરના કોષો અનિયંત્રિત રીતે કેમ વિભાજિત થઈ રહ્યા છે તેનું ચોક્કસ જનીની કારણ સામે આવી જાય છે. સામાન્ય કેન્સર ટ્રીટમેન્ટમાં તમામ દર્દીઓ પર એકસરખી ફોર્મ્યુલા અજમાવવામાં આવતી હતી, જ્યારે આ પદ્ધતિમાં પ્રત્યેક દર્દીના ટ્યુમરની પ્રોફાઇલ મુજબ તદ્દન અલગ અને પર્સનલાઇઝ્ડ પ્લાન ઘડાય છે. એનજીએસ રિપોર્ટના આધારે નિષ્ણાતો એવી વિશિષ્ટ દવા પસંદ કરે છે જે માત્ર ખામીયુક્ત કેન્સર કોષોનો જ નાશ કરે છે અને સામાન્ય કોષોને સહેજ પણ આંચ આવવા દેતી નથી.
આકરી કીમોથેરાપીના ભયાનક સાઇડ ઇફેક્ટ્સમાંથી મુક્તિનો માર્ગ
આ નવીન વિજ્ઞાનના સહારે હવે ફાર્માસ્યુટિકલ ક્ષેત્રે 50થી વધુ નવી અદ્યતન દવાઓ વિકસાવી લેવામાં આવી છે. આ દવાઓ મુખ્યત્વે સામાન્ય ટેબ્લેટ્સ કે પછી અત્યાધુનિક ઇમ્યુનોથેરાપી સ્વરૂપે ઉપલબ્ધ છે, જેને લેવાથી દર્દીને જૂની કીમોથેરાપી જેવા ગંભીર વાળ ખરવા, અત્યંત નબળાઈ કે આંતરિક અવયવોને નુકસાન જેવી આકરી આડઅસરો વેઠવી પડતી નથી. દર્દીની રોગપ્રતિકારક શક્તિને સતેજ કરીને કેન્સરના મ્યુટેશન પર દવાઓ એટલો અસરકારક સચોટ હુમલો કરે છે કે શરીરની કુદરતી વ્યવસ્થા જળવાઈ રહે છે અને દર્દી તેની સામાન્ય દિનચર્યા સરળતાથી જીવી શકે છે.
સ્ટેજ-4ના દર્દીઓ માટે નવજીવન
જ્યારે કેન્સર છેલ્લા તબક્કામાં પહોંચી જાય અને સામાન્ય ઉપચારો અસહાય સાબિત થાય, ત્યારે નેક્સ્ટ જનરેશન સિક્વન્સિંગ એક ચમત્કારિક સંજીવની બનીને ઊભરે છે. જો NGS રિપોર્ટ દ્વારા એવું કોઈ ચોક્કસ મ્યુટેશન ઓળખાઈ જાય કે જેની દવા બજારમાં ઉપલબ્ધ હોય, તો એડવાન્સ સ્ટેજના દર્દીઓમાં પણ ગાંઠનું કદ ઝડપથી ઘટવા લાગે છે અને શરીરમાં આગળ ફેલાતો કેન્સર અટકી જાય છે. આ પદ્ધતિ માત્ર દર્દીનું આયુષ્ય લંબાવવા પૂરતી સીમિત નથી, પરંતુ પીડારહિત અને ગરિમાપૂર્ણ જીવન આપવાની ખાતરી આપે છે, જે આજના સમયમાં કેન્સર વિરુદ્ધની લડાઈમાં સૌથી મોટી સિદ્ધિ સાબિત થઈ રહી છે.
