ઊંઘમાંથી જાગ્યા પછી ગરદન અકડાઈ જાય છે? આ સરળ બદલાવ દૂર કરશે તમારી રોજની સમસ્યા

Morning Neck Pain Solutions: ઘણા લોકોને રોજ સવારે ઊંઘમાંથી જાગ્યા બાદ ગરદનમાં ભારેપણું, દુખાવો કે જકડાઈ જવાની સમસ્યા સતાવતી હોય છે. શરૂઆતમાં આ તકલીફને સામાન્ય થાક કે ખાટલાની અસર સમજીને નજરઅંદાજ કરવામાં આવે છે. પરંતુ જો આ સમસ્યા રોજની બની જાય, તો તેની પાછળ તમારું ઓશીકું સીધી રીતે જવાબદાર હોઈ શકે છે. ઊંઘતી વખતે માથા અને ગરદનને પૂરતો તેમજ યોગ્ય ટેકો ન મળે, ત્યારે સ્નાયુઓ પર અનાવશ્યક દબાણ વધે છે, જે સવારના દુખાવાને નોતરે છે.

અયોગ્ય ઓશીકાની ઊંઘ પર થતી અસરો
જો તમે ખૂબ ઊંચું ઓશીકું વાપરતા હોવ, તો સૂતી વખતે ગરદન સતત આગળની તરફ વળેલી રહે છે. તેનાથી વિપરીત, જો ઓશીકું ખૂબ પાતળું કે નરમ હોય, તો તે ગરદનને જરૂરી બેલેન્સ કે સપોર્ટ પૂરું પાડી શકતું નથી. આ બંને સ્થિતિમાં ગરદનના સેન્સિટિવ સ્નાયુઓ ખેંચાઈ જાય છે. વળી, લાંબા સમય સુધી વાપરેલા ઓશીકાનું ફોમ કે રૂ બેસી જાય છે, જેના કારણે રાત્રે કરોડરજ્જુ અને ગરદનની કુદરતી રેખા જોખમાય છે અને રોજ સવારે પીડા ઊભી થાય છે.

તમારી ઊંઘવાની પદ્ધતિ મુજબ પસંદ કરો ઓશીકું
દરેક વ્યક્તિની સૂવાની સ્ટાઇલ અલગ હોય છે, તેથી ઓશીકાની પસંદગી પણ શરીરની જરૂરિયાત મુજબ હોવી જોઈએ. જો તમને પડખું ફરીને સૂવાની આદત હોય, તો થોડું ઊંચું ઓશીકું પસંદ કરવું વધુ હિતાવહ છે જેથી માથું અને કરોડરજ્જુ એક સીધી લાઇનમા જળવાઈ રહે. જ્યારે પીઠના બળે સૂનાર લોકો માટે મધ્યમ ઊંચાઈનું ઓશીકું ઉત્તમ માનવામાં આવે છે. આજકાલ બજારમાં મળતા 'મેમરી ફોમ' (Memory Foam) ઓશીકા પણ માથા અને ગરદનના શેપ મુજબ ગોઠવાઈ જઈને ઉત્તમ આરામ આપે છે.

દિનચર્યા અને આદતોમાં બદલાવ લાવવો છે જરૂરી
માત્ર ઓશીકું બદલી નાખવાથી ગરદનના દુખાવામાં કાયમી રાહત મળતી નથી, પરંતુ તેના માટે દિનચર્યામાં પણ કેટલાક સુધારા કરવા અનિવાર્ય છે. સ્માર્ટફોન કે લેપટોપનો ઉપયોગ કરતી વખતે લાંબા સમય સુધી ગરદન નીચે તરફ નમાવીને બેસવાની આદત ટાળવી જોઈએ. કામ કરતી વખતે વચ્ચે થોડો બ્રેક લઈને ગરદનની હળવી કસરતો કે સ્ટ્રેચિંગ કરવું ખૂબ જ ગુણકારી સાબિત થઈ શકે છે. સમય જતાં જૂના ઓશીકા બદલી નાખવા અને પૂરતી ઊંઘ લેવી પણ એટલી જ જરૂરી છે.

ક્યારે લેવી ડૉક્ટરની સલાહ?
જો યોગ્ય સાઈઝનું ઓશીકું વાપરવા છતાં અને લાઈફસ્ટાઈલ સુધારવા છતાં ગરદનનો દુખાવો મટવાનું નામ ન લેતો હોય, તો તબીબી સલાહ લેવી અનિવાર્ય છે. ખાસ કરીને જો ગરદનના તીવ્ર દુખાવા સાથે હાથમાં અચાનક ઝણઝણાટી ઉપડતી હોય, નબળાઈ અનુભવાતી હોય કે ચક્કર આવવાની સમસ્યા રહેતી હોય, તો તેને સામાન્ય ગણીને અવગણવી નહીં.