Low Blood Pressure Symptoms: ઘણીવાર અચાનક ચક્કર આવવા, નબળાઈ લાગવી અથવા આંખો સામે ઝાંખું દેખાવા જેવી સમસ્યા થાય છે. આવા લક્ષણો પાછળનું એક કારણ લો બ્લડ પ્રેશર પણ હોઈ શકે છે. નેશનલ હેલ્થ સર્વિસ (NHS) અનુસાર, સામાન્ય રીતે 90/60 mmHgથી ઓછું બ્લડ પ્રેશર લો બ્લડ પ્રેશર માનવામાં આવે છે. જો, કે દરેક વ્યક્તિમાં લો BPના લક્ષણો જોવા મળે તે જરૂરી નથી.
લો બ્લડ પ્રેશરના મુખ્ય લક્ષણો શું છે?
બ્લડ પ્રેશર ઓછું થઈ જાય ત્યારે શરીરમાં કેટલાક સામાન્ય લક્ષણો જોવા મળી શકે છે. તેમાં ચક્કર આવવા, અસ્વસ્થતા, ઝાંખું દેખાવું, નબળાઈ, મૂંઝવણ અને ક્યારેક બેભાન થવું પણ સામેલ છે. ખાસ કરીને અચાનક ઊભા થતી વખતે ચક્કર આવવા જેવી સમસ્યા થઈ શકે છે.
બ્લડ પ્રેશર કેવી રીતે તપાસવું?
બ્લડ પ્રેશર ફાર્મસી, ક્લિનિક અથવા ઘરે ડિજિટલ બ્લડ પ્રેશર મોનિટરની મદદથી માપી શકાય છે. જો રીડિંગ વારંવાર 90/60 mmHgથી ઓછું આવે અને સાથે ચક્કર, નબળાઈ અથવા બેભાન થવા જેવા લક્ષણો હોય, તો તબીબીની સલાહ લેવી યોગ્ય છે.
લો બ્લડ પ્રેશરની સારવાર કેવી રીતે થાય છે?
લો BPનું કારણ જાણી લીધા બાદ ડૉક્ટર યોગ્ય સારવાર સૂચવી શકે છે. કેટલાક કિસ્સામાં દવાઓ, શરીરમાં રક્ત પરિભ્રમણ સુધારવા માટે સપોર્ટ સ્ટોકિંગ્સ અને જીવનશૈલીમાં જરૂરી ફેરફારોની સલાહ આપવામાં આવી શકે છે. સારવાર હંમેશા લો BPના કારણ અને વ્યક્તિની સ્થિતિ પર આધારિત હોય છે.
BP અચાનક ઘટી જાય તો શું કરવું?
જો અચાનક ચક્કર આવે અથવા BP ઘટી ગયું હોય તેવું લાગે, તો તરત જ ધીમે ધીમે બેસી અથવા સૂઈ જવું અને અચાનક ઊભા થવાનું ટાળવું. પૂરતું પાણી પીવું પણ મદદરૂપ થઈ શકે છે. એકસાથે વધારે ખાવાને બદલે થોડું-થોડું પરંતુ વારંવાર ભોજન લેવાની સલાહ આપવામાં આવે છે. ભોજન બાદ થોડો સમય બેસી રહેવું અથવા આરામ કરવો પણ ફાયદાકારક થઈ શકે છે.
લો BP હોય ત્યારે આ બાબતો ટાળો
લો બ્લડ પ્રેશરની સમસ્યા હોય તો અચાનક ઊભા થવું કે બેસવું, લાંબા સમય સુધી એક જ સ્થિતિમાં ઊભા કે બેસી રહેવું અને અચાનક શરીરની મુદ્રા બદલવાનું ટાળવું જોઈએ. વધુ પડતા દારૂનું સેવન પણ ટાળવું જરૂરી છે.
લો બ્લડ પ્રેશર થવાના કારણો શું છે?
લો BPના અનેક કારણો હોઈ શકે છે. વ્યક્તિની દૈનિક પ્રવૃત્તિઓ, શરીરની સ્થિતિ, કેટલીક દવાઓ અને અન્ય આરોગ્ય સંબંધિત પરિસ્થિતિઓ બ્લડ પ્રેશરને અસર કરી શકે છે. ડાયાબિટીસ જેવી કેટલીક તબીબી સ્થિતિઓ પણ લો BP સાથે જોડાયેલી હોઈ શકે છે. મહિલાઓમાં ગર્ભાવસ્થા દરમિયાન પણ બ્લડ પ્રેશર ઘટી શકે છે.
વારંવાર લક્ષણો દેખાય તો બેદરકારી ન રાખો
ક્યારેક લો બ્લડ પ્રેશર કોઈ લક્ષણ વિના પણ હોઈ શકે છે. પરંતુ જો વારંવાર ચક્કર આવે, ઝાંખું દેખાય, નબળાઈ લાગે અથવા બેભાન થવાની સ્થિતિ બને, તો માત્ર ઘરગથ્થુ ઉપાય પર નિર્ભર રહેવાને બદલે ડૉક્ટરની સલાહ લેવી જરૂરી છે. ખાસ કરીને અચાનક ગંભીર લક્ષણો જણાય તો તાત્કાલિક તબીબી મદદ લેવી જોઈએ. આ માહિતી સામાન્ય માર્ગદર્શન માટે છે. બ્લડ પ્રેશર સંબંધિત સતત અથવા ગંભીર લક્ષણો હોય તો યોગ્ય તબીબી તપાસ કરાવવી જરૂરી છે.
