Iron Deficiency Symptoms: પૂરતી ઊંઘ લીધા પછી પણ જો તમને દિવસ દરમિયાન સતત થાક, નબળાઈ કે સુસ્તી અનુભવાય છે, તો તેને માત્ર ઊંઘની કમી માનીને અવગણશો નહીં. શરીરમાં આયર્નની ઉણપ હોય ત્યારે પણ આવા લક્ષણો જોવા મળી શકે છે. જો, કે આ લક્ષણો અન્ય સ્વાસ્થ્ય સમસ્યાઓમાં પણ જોવા મળી શકે છે, તેથી માત્ર લક્ષણોના આધારે આયર્નની ઉણપનું નિદાન કરી શકાય નહીં.
પૂરતી ઊંઘ પછી પણ સતત થાક
આયર્ન શરીરમાં હિમોગ્લોબિન બનાવવામાં મહત્વની ભૂમિકા ભજવે છે. હિમોગ્લોબિન શરીરના વિવિધ ભાગો સુધી ઓક્સિજન પહોંચાડવામાં મદદ કરે છે. આયર્નની ઉણપને કારણે થાક, નબળાઈ અને કામ કરવામાં ઊર્જાની કમી જેવી સમસ્યાઓ થઈ શકે છે.
વારંવાર ઠંડી લાગવી
જો સામાન્ય વાતાવરણમાં પણ તમને અન્ય લોકો કરતાં વધુ ઠંડી લાગતી હોય અને તેની સાથે થાક અથવા નબળાઈ અનુભવાતી હોય, તો તેનું કારણ તપાસવું જરૂરી છે. આયર્નની ઉણપ અથવા એનિમિયા સાથે કેટલીક વ્યક્તિઓમાં ઠંડી વધુ લાગવાની ફરિયાદ થઈ શકે છે.સામાન્ય કામ કરતી વખતે શ્વાસ ચઢવો
સીડી ચડવી, થોડું ચાલવું અથવા રોજિંદા સામાન્ય કામ કરતી વખતે શ્વાસ ચઢવો કે થાક લાગવો પણ ધ્યાન આપવા જેવું લક્ષણ છે. આયર્નની ઉણપથી થતો એનિમિયા શરીરમાં ઓક્સિજન પહોંચાડવાની ક્ષમતાને અસર કરી શકે છે.વાળ ખરવાની સમસ્યા
સામાન્ય કરતાં વધુ વાળ ખરતા હોય તો તેનું એક કારણ આયર્નની ઉણપ પણ હોઈ શકે છે. જોકે, વાળ ખરવા પાછળ હોર્મોનલ ફેરફાર, તણાવ, પોષણની અન્ય ઉણપ અને અનેક અન્ય કારણો પણ જવાબદાર હોઈ શકે છે.ત્વચા ફિક્કી દેખાવવી
આયર્નની ઉણપથી થતો એનિમિયા હોય ત્યારે કેટલીક વ્યક્તિઓમાં ત્વચા સામાન્ય કરતાં વધુ ફિક્કી દેખાઈ શકે છે. ખાસ કરીને ચહેરો, હોઠ અથવા આંખોની અંદરની પાંપણનો રંગ બદલાયેલો જણાય તો તબીબી સલાહ લેવી યોગ્ય છે.ધ્યાન કેન્દ્રિત કરવામાં મુશ્કેલી
શરીરમાં આયર્નની ઉણપ સાથે થાક અને નબળાઈ વધવાને કારણે કેટલાક લોકોને ધ્યાન કેન્દ્રિત કરવામાં મુશ્કેલી અથવા કામ દરમિયાન ઊર્જાની કમી અનુભવાઈ શકે છે.
આ લક્ષણો દેખાય તો શું કરવું?
આ તમામ લક્ષણો માત્ર આયર્નની ઉણપને કારણે જ થાય એવું જરૂરી નથી. જો થાક, શ્વાસ લેવામાં તકલીફ, વાળ ખરવા અથવા નબળાઈ જેવી સમસ્યા લાંબા સમય સુધી રહેતી હોય, તો ડૉક્ટરની સલાહ લેવી જોઈએ. જરૂરિયાત મુજબ ડૉક્ટર CBC, હિમોગ્લોબિન અને ફેરીટિન જેવા ટેસ્ટ કરાવીને આયર્નની સ્થિતિ તપાસી શકે છે. ડૉક્ટરની સલાહ વિના આયર્નની દવા કે સપ્લિમેન્ટ શરૂ ન કરવું. વધુ પડતું આયર્ન પણ શરીર માટે નુકસાનકારક બની શકે છે.
