Eye Strain and Screen Time Headaches: જ્યારે પણ આપણને માથું દુખવાની સમસ્યા થાય છે, ત્યારે આપણે તેને સામાન્ય થાક, માનસિક તણાવ કે નસોની નબળાઈ સમજીને અવારનવાર પેઇનકિલર દવાઓ લેવા લાગીએ છીએ. પરંતુ હેલ્થ નિષ્ણાતોના મતે, આ દુખાવા પાછળનું અસલી અને મૂળ કારણ આપણી આંખોની કોઈ તકલીફ હોઈ શકે છે. આપણી આંખો અને ચહેરાના સ્નાયુઓ વચ્ચે ખૂબ જ ગાઢ સંબંધ રહેલો છે. જ્યારે આપણે કલાકો સુધી કોઈ એક જ જગ્યાએ નજર ટાંકીને કામ કરીએ છીએ, ત્યારે આંખોની આસપાસ આવેલા નાજુક સ્નાયુઓ પર અતિશય દબાણ વધે છે. આ વધારાનું પ્રેશર ધીમે-ધીમે વધીને માથાના ભાગ તેમજ ગરદન સુધી તીવ્ર દુખાવા તરીકે ફેલાવા લાગે છે.
આંખોની આ ચાર મુખ્ય સમસ્યાઓથી થાય છે અસહ્ય માથાનો દુખાવો
આંખોની તકલીફને કારણે થતા માથાના દુખાવા પાછળ મુખ્યત્વે ચાર મોટા કારણો જવાબદાર હોઈ શકે છે:
ચશ્માનો નંબર અયોગ્ય હોવો: જો તમારી નજર નબળી હોય અને ચશ્માનો નંબર સાચો ન હોય, તો વસ્તુઓ સ્પષ્ટ જોવા માટે આંખોએ વધારાની મહેનત કરવી પડે છે, જેનાથી મગજ અને માથા પર સતત ભાર રહે છે.
બંને આંખો વચ્ચે તાલમેલનો અભાવ: મોબાઈલ કે લેપટોપ સ્ક્રીન સામે કામ કરતી વખતે બંને આંખોએ એકસાથે એક જ બિંદુ પર ફોકસ કરવું પડે છે. જો આ તાલમેલ યોગ્ય ન બેસે, તો મગજ પર દબાણ વધીને માથામાં તેજ દુખાવો પેદા થાય છે.
ડિજિટલ સ્ક્રીનનો વધુ પડતો ઉપયોગ: લાંબો સમય મોબાઈલ કે કમ્પ્યુટર સામે બેસી રહેવાથી આંખોના પલકારા ઘટી જાય છે, જેનાથી આંખોમાં સૂકાપણું, બળતરા અને સાંજના સમયે ભારે માથાનો દુખાવો શરૂ થાય છે.
આંખોની અંદર પ્રેશર વધવું: આંખોની અંદરનું દબાણ અસામાન્ય રીતે વધવાથી ગ્લુકોમા જેવી ગંભીર બીમારીનું જોખમ રહે છે, જેમાં આંખોની આસપાસ ભયંકર દુખાવો, ઊબકા આવવા અને નજર ધૂંધળી થવા જેવા લક્ષણો દેખાઈ શકે છે.
કેવી રીતે ઓળખશો કે તમારા માથાના દુખાવાનું સાચું કારણ આંખો છે?
ઘણીવાર દર્દીઓ એ નક્કી નથી કરી શકતા કે તેમનો દુખાવો સામાન્ય તણાવનો છે કે આંખોની નબળાઈનો. જો તમને નીચે મુજબના સંકેતો દેખાય, તો સમજી લેવું કે આ સમસ્યા આંખો સાથે જોડાયેલી છે:
બપોર કે સાંજના સમયે દુખાવો વધવો: જો સવારના સમયે તબિયત એકદમ સારી હોય પરંતુ જેમ-જેમ સ્ક્રીન પર કામ કરવાનો સમય વધે તેમ-જેમ દુખાવો તીવ્ર બનતો જાય.
આંખોની આસપાસ દુખાવાની અનુભૂતિ: જો માથાના આગળના ભાગમાં, કપાળ પર, બંને આંખોની બરાબર વચ્ચે કે કાનની આસપાસ અસ્વસ્થતા કે પીડા અનુભવાય.
આરામથી રાહત મળવી: જો તેજ રોશનીથી દૂર ઓછી લાઈટવાળા રૂમમાં આંખો બંધ કરીને થોડીવાર આરામ કરવાથી માથાના દુખાવામાં રાહત જણાતી હોય.
સાવચેતી અને ડોક્ટરની સલાહ શા માટે જરૂરી છે?
જો તમને અવારનવાર કે રોજબરોજ માથાનો દુખાવો સતાવતો હોય, તો ડાક્ટરી સલાહ વગર જાતે જ સતત પેઇનકિલર કે સામાન્ય દવાઓનું સેવન કરવાનું ટાળવું જોઈએ. આ પ્રકારની બેદરકારી ભવિષ્યમાં તમારી દ્રષ્ટિને નુકસાન પહોંચાડી શકે છે. આ સ્થિતિમાં તાત્કાલિક કોઈ અનુભવી આંખોના ડૉક્ટર (ઓપ્ટોમેટ્રિસ્ટ કે ઓપ્થાલમોલોજિસ્ટ) પાસે જઈને આંખોની સંપૂર્ણ તપાસ કરાવી લેવી હિતાવહ છે. સમયસર સાચું કારણ જાણીને યોગ્ય ઉપચાર કરવાથી આ સમસ્યાથી કાયમી છુટકારો મેળવી શકાય છે.
