Are Cheap Sunglasses Damaging Your Eyes?: આજના આધુનિક યુગમાં સનગ્લાસિસ માત્ર તડકાથી બચવા માટેનું સાધન નથી રહ્યા, પરંતુ તે સ્ટાઇલ અને આઉટફિટનો એક મહત્વપૂર્ણ ભાગ બની ગયા છે. ઉનાળાની ગરમી, આકરો તડકો અને ધૂળ-માટીથી બચવા માટે મોટાભાગના લોકો રસ્તા પર કે સ્થાનિક બજારોમાંથી ₹100 થી ₹150 ની કિંમતમાં મળતા રંગબેરંગી સનગ્લાસિસ ખરીદી લેતા હોય છે. આ સોદો ખિસ્સા માટે તો ખૂબ જ સસ્તો અને ફાયદાકારક લાગે છે, પરંતુ આરોગ્યની દ્રષ્ટિએ તે અત્યંત નુકસાનકારક સાબિત થઈ શકે છે. દેખાવમાં ભલે આ ચશ્મા ખૂબ જ આકર્ષક અને ટ્રેન્ડી લાગે, પરંતુ ગુણવત્તા વગરના આ સનગ્લાસિસ તમારી દ્રષ્ટિ માટે ધીમું ઝેર સાબિત થઈ શકે છે.
સૂર્યના હાનિકારક કિરણો સીધા આંખમાં પ્રવેશે છે
સ્થાનિક બજારમાં મળતા સસ્તા ચશ્મામાં વપરાતા કાચ કે પ્લાસ્ટિક લેન્સ અત્યંત નબળી ગુણવત્તાના હોય છે. સામાન્ય રીતે, જ્યારે આપણે ઘાટા રંગના સનગ્લાસ પહેરીએ છીએ ત્યારે આપણી આંખોની કીકી (Pupil) અંધારાના કારણે મોટી થઈ જતી હોય છે. જો ચશ્મામાં પ્રોપર પ્રોટેક્શન ન હોય, તો મોટી થયેલી કીકીમાંથી સૂર્યના હાનિકારક અલ્ટ્રાવાયોલેટ (UV) કિરણો ખુલ્લી આંખ કરતા પણ વધુ પ્રમાણમાં અંદર પ્રવેશે છે. આ UV પ્રોટેક્શન વગરના સનગ્લાસ પહેરવાથી આંખો પર બમણું જોખમ ઊભું થાય છે.
મોતિયાથી લઈને રેટિના ડૅમેજ સુધીનું ખતરો
જો તમે લાંબા સમય સુધી આવા સસ્તા અને નબળી ગુણવત્તાવાળા સનગ્લાસિસનો ઉપયોગ કરો છો, તો તમારી આંખોમાં અનેક પ્રકારની ગંભીર સમસ્યાઓ ઉદ્ભવી શકે છે. ડૉક્ટરોના મતે, આવા ચશ્માથી આંખોમાં નીચે મુજબની તકલીફો થઈ શકે છે:
મોતિયાબિંદ (Cataract): ઉંમર પહેલા જ આંખોમાં મોતિયાની અસર શરૂ થઈ જવી.
રેટિનાને કાયમી નુકસાન: આંખના પાછળના પડદા (રેટિના)ના કોષો નબળા પડવા અથવા બળી જવા.
ડ્રાય આઈ અને તણાવ: આંખોમાં સતત બળતરા, શુષ્કતા (Dryness) અને આંખો પર અતિશય ખેંચાણ થવું.
ઝાંખી દ્રષ્ટિ અને માથાનો દુખાવો: લેન્સનો પાવર યોગ્ય ન હોવાથી આંખો પર દબાણ આવે છે જેનાથી વારંવાર માથાનો દુખાવો થાય છે.
યોગ્ય સનગ્લાસ ખરીદતી વખતે ધ્યાનમાં રાખવાની 5 સૌથી મહત્વની વાતો
આંખોને સુરક્ષિત રાખવા માટે માત્ર કિંમત નહીં પરંતુ ચશ્માની ગુણવત્તા જોવી ખૂબ જ જરૂરી છે. જ્યારે પણ નવા સનગ્લાસ ખરીદો ત્યારે આ 5 વાતો ખાસ તપાસી લો:
UV 400 પ્રોટેક્શન જરૂરી: સનગ્લાસિસ હંમેશા એવા જ ખરીદો જેમાં 'UV 400' અથવા '100% UV Protection'નું લેબલ હોય. આ લેન્સ સૂર્યના હાનિકારક UVA અને UVB બંને પ્રકારના કિરણોને સંપૂર્ણપણે રોકે છે.
લેન્સનો સાચો રંગ પસંદ કરો: દર વખતે ખૂબ ઘાટા (ડાર્ક) લેન્સ સારા નથી હોતા. આંખો માટે 'ગ્રે' (Grey) અથવા 'બ્રાઉન' (Brown) કલરના લેન્સ સૌથી ઉત્તમ ગણાય છે, કારણ કે તે કુદરતી રંગોને વિકૃત કર્યા વગર પ્રકાશની તીવ્રતા ઘટાડે છે.
ફ્રેમની સાઈઝ અને કવરેજ: નાના લેન્સવાળા ચશ્માથી બાજુમાંથી કે ઉપરથી તડકો આંખોમાં જઈ શકે છે. તેથી મોટી ફ્રેમવાળા ચશ્મા (Wrap-around sunglasses) વધુ સુરક્ષિત રહે છે.
યોગ્ય સાઈઝ અને ફિટિંગ: ચશ્મા નાક અને કાન પર બરાબર સેટ થવા જોઈએ. વધુ પડતા ટાઈટ કે ઢીલા ચશ્મા પહેરવાથી માથાનો દુખાવો કે અસ્વસ્થતા થઈ શકે છે.
પોલરાઈઝ્ડ લેન્સ (Polarized Lenses): જો શક્ય હોય તો પોલરાઈઝ્ડ લેન્સ વાળા સનગ્લાસ પસંદ કરો. આ લેન્સ વાહનોની વિન્ડશિલ્ડ, પાણી કે રસ્તા પરથી પરાવર્તિત થતા તીવ્ર પ્રકાશ (Glaire)ને રોકીને આંખોને ઠંડક આપે છે.
ફેશન સાથે સ્વસ્થ દ્રષ્ટિની પસંદગી કરો
આંખો એ શરીરનું સૌથી નાજુક અને અમૂલ્ય અંગ છે. માત્ર ₹100 કે ₹200 બચાવવાની લાલચમાં સસ્તા અને નકલી સનગ્લાસ ખરીદીને પોતાની દ્રષ્ટિને જોખમમાં મૂકવી ડહાપણભર્યું નથી. જ્યારે પણ આઉટડોર પ્રવૃત્તિઓ માટે સનગ્લાસ ખરીદો ત્યારે જાણીતી બ્રાન્ડ અથવા ઓપ્ટિશિયન પાસેથી જ પ્રમાણિત UV પ્રોટેક્શનવાળા ચશ્મા ખરીદવાનો આગ્રહ રાખો. યોગ્ય ચશ્માની પસંદગી તમારી સ્ટાઈલ વધારવાની સાથે સાથે તમારી આંખોનું પણ આજીવન રક્ષણ કરશે.
