Blood group reveal your personality: A, B, AB કે O... તમારું બ્લડ ગ્રુપ માત્ર લોહીની ઓળખ છે કે તમારા સ્વભાવના રહસ્યો પણ છુપાવે છે? જાપાનમાં વર્ષોથી પ્રચલિત ‘કેત્સુકી ગાટા’ થિયરી અનુસાર અલગ-અલગ બ્લડ ગ્રુપ ધરાવતા લોકોના સ્વભાવમાં ચોક્કસ તફાવતો જોવા મળે છે. O ગ્રુપવાળાને આત્મવિશ્વાસુ અને લીડરશિપવાળા, A ગ્રુપવાળાને શાંત અને પરફેક્શનિસ્ટ, B ગ્રુપવાળાને સ્વતંત્ર વિચારસરણીવાળા અને ક્રિએટિવ, જ્યારે AB ગ્રુપવાળાને રહસ્યમય અને વિરોધાભાસી ગુણો ધરાવતા માનવામાં આવે છે.
નાની-નાની બાબતોનું ધ્યાન રાખનારા માનવામાં આવે છે
આ થિયરી પ્રમાણે O બ્લડ ગ્રુપના લોકો મળતાવડા, મહત્વાકાંક્ષી અને પડકારો સ્વીકારનારા હોય છે, જ્યારે A ગ્રુપના લોકો જવાબદાર, વ્યવસ્થિત, સંવેદનશીલ અને નાની-નાની બાબતોનું ધ્યાન રાખનારા માનવામાં આવે છે. B ગ્રુપના લોકો મુક્ત વિચારસરણીવાળા, ઉત્સાહી અને પોતાની પસંદગીના કામમાં ખૂબ મહેનત કરનારા ગણાય છે. બીજી તરફ AB ગ્રુપને સૌથી અનોખું માનવામાં આવે છે, કારણ કે આવા લોકોમાં એકસાથે વિપરીત ગુણો જોવા મળતા હોવાની માન્યતા છે, ક્યારેક ખૂબ મળતાવડા તો ક્યારેક એકાંતપ્રિય.
જાપાન અને પૂર્વ એશિયામાં આ થિયરી સાંસ્કૃતિક રીતે ખૂબ લોકપ્રિય
પરંતુ અહીં સૌથી મોટો સવાલ એ છે કે શું ખરેખર તમારા બ્લડ ગ્રુપ પરથી તમારી પર્સનાલિટી જાણી શકાય? વિજ્ઞાનનો જવાબ આ માન્યતાથી અલગ છે. જાપાન અને પૂર્વ એશિયામાં આ થિયરી સાંસ્કૃતિક રીતે ખૂબ લોકપ્રિય હોવા છતાં, વૈજ્ઞાનિક સંશોધનમાં બ્લડ ગ્રુપ અને વ્યક્તિત્વ વચ્ચે કોઈ મજબૂત કડી સાબિત થઈ નથી. 2014માં જાપાન અને અમેરિકાના 10,000થી વધુ લોકોના ડેટા પર થયેલા અભ્યાસમાં વ્યક્તિત્વના 68 અલગ-અલગ પરિમાણો તપાસવામાં આવ્યા હતા, પરંતુ બ્લડ ગ્રુપના આધારે કોઈ નોંધપાત્ર તફાવત જોવા મળ્યો નહોતો.
માનવું વૈજ્ઞાનિક રીતે યોગ્ય નથી
એટલે O ગ્રુપ છે એટલે તમે લીડર જ હશો, A છે એટલે પરફેક્શનિસ્ટ જ હશો, B છે એટલે ક્રિએટિવ જ હશો કે AB છે એટલે રહસ્યમય જ હશો એવું માનવું વૈજ્ઞાનિક રીતે યોગ્ય નથી. ‘કેત્સુકી ગાટા’ને એક રસપ્રદ સાંસ્કૃતિક માન્યતા અને મનોરંજક પર્સનાલિટી ટેસ્ટ તરીકે ચોક્કસ માણી શકાય, પરંતુ વ્યક્તિનો સાચો સ્વભાવ, ક્ષમતા કે વ્યક્તિત્વ નક્કી કરવા માટે બ્લડ ગ્રુપ કોઈ વૈજ્ઞાનિક માપદંડ નથી.
