Yash Ramayana 100 Crore Opening: બોલિવૂડ અને સાઉથ સિનેમાના સૌથી મોટા પ્રોજેક્ટ્સમાં ગણાતી નમિત મલ્હોત્રાની મોસ્ટ અવેટેડ ફિલ્મ 'રામાયણ - પાર્ટ 1' હવે સિનેમાઘરોમાં રિલીઝ થવા માટે સંપૂર્ણપણે તૈયાર છે. નિર્દેશક નિતેશ તિવારીના નિર્દેશનમાં બની રહેલી આ ફિલ્મને લઈને દર્શકોમાં અત્યારથી જ અભૂતપૂર્વ ઉત્સાહ અને ક્રેઝ જોવા મળી રહ્યો છે. આ ફિલ્મને ખૂબ જ વિશાળ પાયે બોક્સ ઓફિસ પર ઉતારવાની તૈયારીઓ ચાલી રહી છે, જેના કારણે ટ્રેડ એનાલિસ્ટ્સ પણ ચોંકાવનારા આંકડાઓ આપી રહ્યા છે. મનોરંજન જગતના અહેવાલો મુજબ, આ ભવ્ય ફિલ્મ રિલીઝના પહેલા જ દિવસે બોક્સ ઓફિસ પર 100 કરોડ રૂપિયાનું જબરદસ્ત નેટ ઓપનિંગ કરી શકે છે.
સુપરસ્ટાર યશના નામે નોંધાઈ શકે છે શાનદાર ઓપનિંગની હેટ્રિક
જો 'રામાયણ' ફિલ્મ પહેલા દિવસે 100 કરોડ રૂપિયાની કમાણી કરવાનો આ આંકડો પાર કરી લે છે, તો સાઉથના સુપરસ્ટાર યશના નામે એક અનોખો અને મોટો રેકોર્ડ નોંધાઈ જશે. વર્ષ 2022માં આવેલી યશની બ્લોકબસ્ટર ફિલ્મ 'KGF ચેપ્ટર 2' એ બોક્સ ઓફિસ પર ભૂકંપ લાવતા પહેલા જ દિવસે116 કરોડ રૂપિયાનું શાનદાર ઓપનિંગ મેળવ્યું હતું. આ ઉપરાંત, આ વર્ષે રિલીઝ થયેલી યશની અન્ય ફિલ્મ 'ટોક્સિક' એ પણ પહેલા દિવસે 101.11 કરોડ રૂપિયાની કમાણી કરી હતી. જોકે 'ટોક્સિક' ફિલ્મ બાદમાં સિનેમાઘરોમાં લાંબુ નહોતી ચાલી અને ફ્લોપ સાબિત થઈ હતી, પરંતુ ઓપનિંગ ડે પર તેણે શાનદાર કમાણી કરી હતી. આમ, યશની સતત બે ફિલ્મો 100 કરોડથી વધુની ઓપનિંગ નોંધાવી ચૂકી છે અને હવે જો 'રામાયણ' પણ આ સિદ્ધિ મેળવે છે, તો યશના નામે રેકોર્ડબ્રેક હેટ્રિક થઈ જશે.
રણબીર કપૂર, સાંઈ પલ્લવી અને રાવણના રોલમાં યશની ઝાંખી
આ પૌરાણિક ગાથા પર આધારિત ફિલ્મમાં બોલિવૂડ અને સાઉથના દિગ્ગજ કલાકારો એકસાથે મોટા પડદા પર જોવા મળવાના છે. ફિલ્મમાં રણબીર કપૂર મર્યાદા પુરુષોત્તમ ભગવાન રામના રોલમાં નજરે પડશે, જ્યારે સાઉથની લોકપ્રિય અભિનેત્રી સાંઈ પલ્લવી માતા સીતાના પાત્રમાં પ્રાણ પૂરશે. આ ઉપરાંત, ફિલ્મમાં કેજીએફ ફેમ સ્ટાર યશ અત્યંત શક્તિશાળી અને પ્રભાવશાળી એવા રાવણના રોલમાં જોવા મળવાનો છે, જેને લઈને તેના ચાહકોમાં ભારે કુતૂહલ છે. આ ત્રિપુટીની સ્ક્રીન પ્રેઝન્સ ફિલ્મ માટે સૌથી મોટું આકર્ષણ સાબિત થવાની પૂરી સંભાવના છે.
સ્ટારકાસ્ટની ફોજ અને સંગીત જગતનું ઉત્કૃષ્ટ યોગદાન
મુખ્ય કલાકારો ઉપરાંત આ ફિલ્મમાં બોલિવૂડ અને ટેલિવિઝન જગતના અનેક નામાંકિત ચહેરાઓ મહત્વની ભૂમિકાઓમાં જોવા મળશે. ફિલ્મમાં રવિ દુબે લક્ષ્મણના રોલમાં, વિવેક ઓબેરોય, રકુલ પ્રીત સિંહ, લારા દત્તા અને દિગ્ગજ અભિનેતા અરુણ ગોવિલ પણ મહત્વના કિદાર ભજવી રહ્યા છે. ખાસ કરીને, અભિનેતા સની દેઓલ ભગવાન હનુમાનજીના રોલમાં દર્શકોના રુંવાડા ઊભા કરવા માટે તૈયાર છે. ફિલ્મના ડાયલોગ્સ અને વિઝ્યુઅલ્સની સાથે તેનું સંગીત પણ ચર્ચામાં છે, કારણ કે ઓસ્કાર વિજેતા સંગીતકાર એ.આર. રહેમાને આ ફિલ્મનું સંગીત તૈયાર કર્યું છે અને હાલમાં ફિલ્મનું ગીત 'મંગલ રંગ' સોશિયલ મીડિયા પર ભારે લોકપ્રિય થઈ રહ્યું છે.
બે ભાગમાં રિલીઝ થનારું ભવ્ય મહાકાવ્ય અને આગામી સમયપત્રક
આ ભવ્ય ફિલ્મને મેકર્સે બે અલગ-અલગ ભાગમાં વહેંચી છે, જેથી કથાને ન્યાય આપી શકાય. ફિલ્મનો પહેલો ભાગ આ વર્ષે દિવાળીના પાવન અવસર પર સિનેમાઘરોમાં ધમાકેદાર એન્ટ્રી કરવા જઈ રહ્યો છે. જ્યારે ફિલ્મના બીજા ભાગને લઈને એવી ચર્ચા છે કે તે આવતા વર્ષે અથવા તો 2028ની દિવાળી આસપાસ રિલીઝ થઈ શકે છે, જો કે બીજા ભાગની ચોક્કસ રિલીઝ તારીખ અંગે હજુ સુધી નિર્માતાઓ તરફથી કોઈ સત્તાવાર જાહેરાત કરવામાં આવી નથી. દર્શકો અને ફેન્સ માટે આ દિવાળી સિનેમાના ઈતિહાસની સૌથી મોટી દિવાળી સાબિત થવાની પૂરી આશા છે.
