National Film Awards 2026: ભારતીય સિનેમાના સૌથી પ્રતિષ્ઠિત અને ઉચ્ચ સન્માન ગણાતા નેશનલ ફિલ્મ અવોર્ડ્સના ઇતિહાસમાં એક મોટો અને અભૂતપૂર્વ બદલાવ જોવા મળ્યો છે. દાયકાઓથી દેશની રાજધાની નવી દિલ્હીમાં જ આયોજિત થતો આ ભવ્ય સમારોહ આ વખતે પ્રથમવાર દિલ્હીથી બહાર યોજાવા જઈ રહ્યો છે. 72મા નેશનલ ફિલ્મ અવોર્ડ્સ સમારોહનું આયોજન આગામી 22 સપ્ટેમ્બરના રોજ ગુજરાતના નર્મદા જિલ્લામાં આવેલા વિશ્વપ્રસિદ્ધ 'સ્ટેચ્યુ ઓફ યુનિટી' એટલે કે કેવડિયા (એકતા નગર) ખાતે કરવામાં આવશે. આ નિર્ણય સાથે જ બોલિવૂડ અને ભારતીય ફિલ્મ ઉદ્યોગમાં નવી ચર્ચાનો દોર શરૂ થઈ ગયો છે.
ફિલ્મમેકર રાહુલ ધોળકિયા: 'ગુજરાત જ કેમ પસંદ કરાયું?'
પરંપરાગત સ્થળમાં કરવામાં આવેલા આ ફેરફાર સામે શાહરૂખ ખાનની જાણીતી ફિલ્મ 'રઈસ'ના ડિરેક્ટર રાહુલ ધોળકિયાએ સોશિયલ મીડિયા પર ખુલ્લેઆમ પોતાનો વિરોધ અને સવાલો રજૂ કર્યા છે. પોતાની ફિલ્મ 'પાર્ઝાનિયા' માટે રાષ્ટ્રીય પુરસ્કાર જીતી ચૂકેલા ધોળકિયાએ પ્રશ્ન ઉઠાવ્યો છે કે જો વર્ષો જૂની પરંપરા બદલીને આ સમારોહને નવી દિલ્હી બહાર લઈ જવો જ હતો, તો ભારતીય સિનેમામાં મોટું અને સમૃદ્ધ યોગદાન આપનારા અન્ય રાજ્યો જેવા કે મહારાષ્ટ્ર, કેરળ, તામિલનાડુ કે તેલંગાણા (હૈદરાબાદ) ની અવગણના કેમ કરવામાં આવી? તેમણે ગુજરાતના સ્થાનિક સિને હબ અમદાવાદની જગ્યાએ એકતા નગરની પસંદગી સામે પણ સવાલો ઉઠાવ્યા છે.
પ્રવાસન અને સંસ્કૃતિને પ્રોત્સાહન આપવાનો પ્રયાસ
બીજી તરફ, આ નિર્ણયને દેશના વિવિધ સાંસ્કૃતિક અને પ્રવાસન સ્થળોને વૈશ્વિક ઓળખ આપવાની દિશામાં એક મહત્વનું કદમ ગણાવવામાં આવી રહ્યું છે. વડાપ્રધાન નરેન્દ્ર મોદી દ્વારા વર્ષ 2018માં રાષ્ટ્રને સમર્પિત કરવામાં આવેલું સ્ટેચ્યુ ઓફ યુનિટી આજે ભારતનું એક અગ્રણી પ્રવાસન ધામ બની ચૂક્યું છે. આ ભવ્ય સ્મારકની પૃષ્ઠભૂમિમાં દેશભરના શ્રેષ્ઠ કલાકારો અને ફિલ્મસર્જકોને સન્માનિત કરવાથી પ્રદેશમાં ટુરિઝમને મોટો વેગ મળશે. દેશના વિવિધ ભાગોમાં આવા રાષ્ટ્રીય કાર્યક્રમોનું આયોજન કરવાના ભાગરૂપે જ આ નિર્ણય લેવાયો હોવાનું માનવામાં આવે છે.
રાષ્ટ્રપતિ દ્રૌપદી મુર્મુના હસ્તે એવોર્ડ્સનું વિતરણ
22 સપ્ટેમ્બરે યોજાનારા આ ભવ્ય અને ઝાકઝમાળથી ભરેલા કાર્યક્રમમાં દેશના રાષ્ટ્રપતિ શ્રીમતી દ્રૌપદી મુર્મુ પોતાના હસ્તે તમામ વિજેતા કલાકારો અને ટેકનિશિયનોને રાષ્ટ્રીય પુરસ્કારો એનાયત કરશે. આ સમારોહમાં બોલિવૂડ ઉપરાંત સાઉથ અને પ્રાદેશિક સિનેમાના દ્રિગ્ગજો એક જ મંચ પર ઉપસ્થિત રહેશે. કાર્યક્રમની તૈયારીઓ એકતા નગર ખાતે ખૂબ જ જોરશોરથી શરૂ કરી દેવામાં આવી છે અને દેશ-વિદેશના મીડિયાનું ધ્યાન આ ઇવેન્ટ પર કેન્દ્રિત થયું છે.
72મા નેશનલ ફિલ્મ અવોર્ડ્સના મુખ્ય વિજેતાઓ
આ વર્ષના વિજેતાઓની વાત કરીએ તો, આદિત્ય સુહાસ જાંભલે દ્વારા નિર્દેશિત ફિલ્મ 'આર્ટિકલ 370' ને શ્રેષ્ઠ ફીચર ફિલ્મ તરીકે પસંદ કરવામાં આવી છે. આ જ ફિલ્મમાં શાનદાર અભિનય બદલ યામી ગૌતમને બેસ્ટ એક્ટ્રેસનો એવોર્ડ મળ્યો છે. જ્યારે બેસ્ટ એક્ટરનો અવોર્ડ મલયાલમ સુપરસ્ટાર મમ્મુટી અને બોલિવૂડ અભિનેતા કાર્તિક આર્યન વચ્ચે વહેંચવામાં આવ્યો છે. આ સિવાય રણદીપ હુડાને શ્રેષ્ઠ ડેબ્યુ ડિરેક્ટર અને બ્લોકબસ્ટર ફિલ્મ 'કલ્કી 2898 AD' ને શ્રેષ્ઠ મનોરંજન આપતી લોકપ્રિય ફિલ્મ તરીકે સન્માનિત કરવામાં આવી છે.
