Urvashi Rautela lawsuit: બોલિવૂડની ગ્લેમરસ અભિનેત્રી ઉર્વશી રાૈતેલા ફરી એકવાર ચર્ચાના કેન્દ્રમાં આવી ગઈ છે. લોસ એન્જલસ સ્થિત એક આર્ટિફિશિયલ ઇન્ટેલિજન્સ કંપની 'બોલિવૂડ.AI' વિરુદ્ધ ઉર્વશીની ટીમે કાનૂની કાર્યવાહી કરવાની જાહેરાત કરી છે. અભિનેત્રીની ટીમનો ગંભીર આરોપ છે કે સંબંધિત કંપનીએ તેમની કોઈપણ પૂર્વ પરવાનગી કે સંમતિ વગર તેમના નામ, ફોટોગ્રાફ્સ અને વિડીયો ક્લિપ્સનો વ્યાપારી ઉપયોગ કર્યો છે. આ અનધિકૃત ઉપયોગ સામે કાનૂની પગલું ભરતા ટીમ દ્વારા આશરે 7,000 કરોડ રૂપિયાનો દાવો કરવામાં આવ્યો છે.
સમગ્ર વિવાદની શરૂઆત ક્યાંથી થઈ?
આ આખા વિવાદની પૃષ્ઠભૂમિ પર નજર કરીએ તો, થોડા સમય પહેલા 'બોલિવૂડ.AI' દ્વારા ઉર્વશી રૌતેલાનો એક ઇન્ટરવ્યુ લેવામાં આવ્યો હતો. આ વાતચીત દરમિયાન જ્યારે તેમને બોલિવૂડ અને આર્ટિફિશિયલ ઇન્ટેલિજન્સ અંગે વિચારો રજૂ કરવાનું કહેવામાં આવ્યું, ત્યારે એક્ટ્રેસે જવાબ આપ્યો હતો કે બોલિવૂડ હાલમાં AI સામે ઝઝૂમી રહ્યું છે અને તે બોલિવૂડને ખૂબ પ્રેમ કરે છે. આ ઇન્ટરવ્યુ સોશિયલ મીડિયા પર વાયરલ થયા બાદ મામલો વણસ્યો હતો અને ઉર્વશીની ટીમે ઇન્સ્ટાગ્રામ પર સત્તાવાર નિવેદન જારી કરીને કંપનીને ચેતવણી આપી હતી કે, તેઓ પોતાની બ્રાન્ડ જાતે બનાવે પરંતુ પરવાનગી વગર ઉર્વશીના નામનો દુરુપયોગ ન કરે.
AI કંપનીના CEO શીરાજ હસનનો પલટવાર
ઉર્વશીની ટીમ તરફથી કરોડોના દાવાની ધમકી મળ્યા બાદ 'બોલિવૂડ.AI' અને 'હોલીવુડ.AI' ના ફાઉન્ડર અને CEO શીરાજ હસને આ મામલે આકરો જવાબ આપ્યો છે. તેમણે સોશિયલ મીડિયા પર પ્રતિક્રિયા આપતા આ દાવાઓને સદંતર ફગાવી દીધા અને તેને હાસ્યાસ્પદ ગણાવ્યા. શીરાજ હસને સ્પષ્ટ શબ્દોમાં કહ્યું કે, "ઉર્વશી, અમે તમારા મોઢામાં એ શબ્દો નથી મૂક્યા." તેમણે સલાહ આપતા જણાવ્યું કે એક્ટ્રેસે કોઈપણ નિવેદન કે કાનૂની પગલાં લેતા પહેલા મનોરંજન ઉદ્યોગમાં AI ના ભવિષ્ય વિશે પોતાને શિક્ષિત કરવું જોઈએ. તેમણે ઉમેર્યું કે આર્ટિફિશિયલ ઇન્ટેલિજન્સ એ મનોરંજનનું ભવિષ્ય છે, જેમાં ડિજિટલ સ્ટાર્સ ક્યારેય વૃદ્ધ થતા નથી અને 24 કલાક કામ કરી શકે છે.
બોલિવૂડમાં AI અને પર્સનાલિટી રાઈટ્સનો ગંભીર મુદ્દો
આ ઘટના દર્શાવે છે કે આજના ડિજિટલ યુગમાં સેલિબ્રિટીઝના 'પર્સનાલિટી રાઇટ્સ' કેટલા સંવેદનશીલ બની ગયા છે. તાજેતરમાં જ સુપરસ્ટાર સલમાન ખાને પણ રિયાલિટી શો 'બિગ બોસ' દરમિયાન AI ના ખતરનાક દુરુપયોગ અને ડીપફેક વીડિયો પર ભારે રોષ વ્યક્ત કર્યો હતો. તેમણે કહ્યું હતું કે લોકો મનસ્વી રીતે ફેક અવાજ અને વીડિયો બનાવીને છબી ખરાબ કરી રહ્યા છે. અગાઉ અમિતાભ બચ્ચન, અનિલ કપૂર, ઋત્વિક રોશન, અક્ષય કુમાર અને જ্যાકી શ્રોફ સહિતના અનેક દિગ્ગજ કલાકારોએ પોતાની અવાજ, તસવીરો અને નામનો અનધિકૃત ઉપયોગ અટકાવવા માટે અદાલતના દરવાજા ખખડાવ્યા છે અને કાનૂની સુરક્ષા મેળવી છે.
