Badshah Emotional Review on Ramayana Movie: બોલિવૂડની અત્યાર સુધીની સૌથી મોંઘી અને મોસ્ટ અવેટેડ પૌરાણિક ફિલ્મ 'રામાયણ' સિનેમાઘરોમાં રિલીઝ થઈ ચૂકી છે. આ નિમિત્તે મુંબઈમાં આયોજિત સ્પેશિયલ પ્રીમિયર સ્ક્રીનિંગ દરમિયાન જાણીતો રેપર અને વિઝનરી સંગીતકાર બાદશાહ ફિલ્મ જોઈને અત્યંત ભાવુક થઈ ગયો હતો. બાળપણથી રામાયણની કથા સાંભળતા આવ્યા હોવા છતાં, આ ફિલ્મના દ્રશ્યોએ તેને અંદરથી ઝંઝોડી મૂક્યો હતો. સ્ક્રીનિંગ બાદ સોશિયલ મીડિયા પર પોતાની ઉત્સુકતા વ્યક્ત કરતા તેણે આ ફિલ્મને ભારતીય સિનેમાની એક અદ્ભુત 'સિનેમેટિક અજાયબી' ગણાવી હતી અને તમામ દર્શકોને મોટા પડદા પર જઈને આ ફિલ્મ માણવાની ખાસ અપીલ કરી હતી.
જટાયુ સીક્વન્સ અને 'ધરતી અંબર' થીમે ઊભા કર્યા રુંવાડા
સ્પેશિયલ રિવ્યૂમાં બાદશાહે ખાસ કરીને ફિલ્મના વિઝ્યુઅલ ઇફેક્ટ્સ અને બેકગ્રાઉન્ડ મ્યુઝિકના ખુલ્લામને વખાણ કર્યા છે. તેણે જણાવ્યું કે રાક્ષસરાજ રાવણ સાથે જટાયુના યુદ્ધવાળો સીન એટલો અદ્ભુત રીતે ડિઝાઈન કરવામાં આવ્યો છે કે તે જોઈને જ રૂવાંડા ઊભા થઈ જાય છે. આ ઉપરાંત, જ્યારે સીન દરમિયાન 'ધરતી અંબર' થીમ બેકગ્રાઉન્ડમાં વાગે છે, ત્યારે તે ક્ષણ સિનેમાઘરમાં એક અલગ જ દિવ્ય અનુભવ ઊભો કરે છે. પ્રોડ્યુસર નમિત મલ્હોત્રાના વિઝનને બિરદાવતા બાદશાહે કહ્યું કે ફિલ્મના દરેક ફ્રેમમાં કરવામાં આવેલી મહેનત સ્પષ્ટપણે દેખાય છે.
ભગવાન રામ તરીકે રણબીર કપૂર અને સાઈ પલ્લવીનો દમદાર અભિનય
ફિલ્મની સ્ટારકાસ્ટના પ્રદર્શન અંગે વાત કરતા બાદશાહે દરેક કલાકારના કામની પ્રશંસા કરી છે. ભગવાન શ્રી રામના પાત્રમાં રણબીર કપૂરની સાદગી અને દિવ્યતા, માતા સીતાના રોલમાં સાઈ પલ્લવીની ભક્તિમય અભિવ્યક્તિ અને લંકેશ રાવણ તરીકે સાઉથ સુપરસ્ટાર યશનો દબદબો પ્રેક્ષકોને મંત્રમુગ્ધ કરી દે તેવો છે. આ ઉપરાંત લક્ષ્મણના રોલમાં રવિ દુબે, લારા દત્તા, અરુણ ગોવિલ અને રકુલ પ્રીત સિંહ જેવા અનુભવી કલાકારોએ પણ પોતપોતાની ભૂમિકામાં જીવ રેડી દીધો છે.
₹4,000 કરોડનું વિશાળ બજેટ અને ઓસ્કાર વિજેતા VFX નો જાદુ
નિતેશ તિવારીના નિર્દેશનમાં બનેલી આ બે ભાગની મેગા માયથોલોજિકલ સીરીઝ આશરે ₹4,000 કરોડના સંયુક્ત બજેટ સાથે તૈયાર કરવામાં આવી છે, જે તેને વિશ્વની સૌથી મોંઘી ફિલ્મોની યાદીમાં સ્થાન અપાવે છે. ફિલ્મમાં વિઝ્યુઅલ ગ્રાન્ડનેસ લાવવા માટે 8 વખત ઓસ્કાર એવોર્ડ જીતી ચૂકેલા સ્ટુડિયો DNEG નો ઉપયોગ કરવામાં આવ્યો છે. 'પ્રાઇમ ફોકસ' ના નમિત મલ્હોત્રા અને યશના 'મોન્સ્ટર માઇન્ડ ક્રિએશન્સ' દ્વારા સંયુક્ત રીતે નિર્મિત આ પ્રોજેક્ટ ભારતીય સિનેમાને ગ્લોબલ લેવલ પર નવી ઊંચાઈએ લઈ જઈ રહ્યો છે.
વિશ્વભરમાં 70,000 સ્ક્રીન્સ પર ગ્રાન્ડ રિલીઝ અને ભવ્ય આયોજન
આંતરરાષ્ટ્રીય સ્તરે પ્રેક્ષકો સુધી પહોંચવા માટે નિર્માતાઓએ વર્લ્ડવાઈડ ડિસ્ટ્રીબ્યુશન માટે જાણીતી 'સોની પિક્ચર્સ' સાથે હાથ મિલાવ્યા છે. આ ફિલ્મને વિશ્વભરમાં રેકોર્ડબ્રેક 70,000 થી વધુ સ્ક્રીન્સ પર એકસાથે હિન્દી, તમિલ, તેલુગુ, કન્નડ અને મલયાલમ એમ પાંચ મુખ્ય ભાષાઓમાં રિલીઝ કરવામાં આવી રહી છે. પ્રથમ ભાગ 5 નવેમ્બર 2026 ના રોજ થિયેટર્સમાં આવી ગયો છે, જ્યારે આ ભવ્ય કહાનીનો બીજો ભાગ દિવાળી 2027 માં થિયેટર્સમાં ધમાકો મચાવશે.
