A Fresh Start After Box Office Failure: દિગ્દર્શક રાજકુમાર સંતોષી અને બૉલીવુડ સુપરસ્ટાર સની દેઓલની જોડી લગભગ ત્રણ દાયકા બાદ ફિલ્મ 'બંટવારા 1947' દ્વારા મોટા પડદા પર પાછી ફરી હતી. જોકે મોટી આકાંક્ષાઓ અને મોટા બજેટ વચ્ચે આ ફિલ્મ બોક્સ ઓફિસ પર અપેક્ષા મુજબનું પ્રદર્શન કરવામાં નિષ્ફળ રહી હતી. આમ છતાં આ આઇકોનિક જોડીનો ઉત્સાહ ઓછો થયો નથી. બોક્સ ઓફિસના આંચકા ભૂલીને રાજકુમાર સંતોષીએ સની દેઓલ સાથે પોતાના આગામી ધમાકેદાર પ્રોજેક્ટની સત્તાવાર જાહેરાત કરી દીધી છે.
'ઘાતક ઘૂસ કે મારેગા' ફિલ્મનું એલાન
રાજકુમાર સંતોષીએ તેમની નવી એક્શન ફિલ્મનું નામ 'ઘાતક ઘૂસ કે મારેગા' જાહેર કર્યું છે. 90ના દાયકામાં ઘાયલ, દામિની અને ઘાતક જેવી સુપરહિટ ફિલ્મો આપનારી આ જોડી તરફથી આ નવી ફિલ્મ ચાહકો માટે બહુ મોટો સરપ્રાઇઝ માનવામાં આવે છે. ફિલ્મ પ્રેમીઓમાં લાંબા સમયથી ઘાતકની સિક્વલ બનશે તેવી ચર્ચાઓ ચાલી રહી હતી, પરંતુ આ નિર્દેશકે તમામ અટકળો પર વિરામ મૂકી દીધો છે.
જૂનો અંદાજ પરંતુ નવી વાર્તા
દિગ્દર્શકે સ્પષ્ટતા કરી છે કે આ ફિલ્મ 1996માં આવેલી 'ઘાતક' ફિલ્મની સિક્વલ નથી. પરંતુ સની દેઓલ આ નવી વાર્તામાં ઘાતકના પાત્ર જેવા જ દમદાર અને નીડર અંદાજમાં જોવા મળશે. વાર્તામાં મુખ્ય પાત્ર બનારસનો રહેવાસી છે. સંતોષીના જણાવ્યા મુજબ, આ ફિલ્મમાં ભરપૂર એક્શન, હૃદયસ્પર્શી ઈમોશન્સ અને સની દેઓલના શક્તિશાળી ડાયલોગ્સનો અદ્ભુત સંગમ જોવા મળશે.
અન્ય આગામી પ્રોજેક્ટ્સ પર કામ
રાજકુમાર સંતોષી માત્ર આ એક જ ફિલ્મ સુધી સીમિત નથી, પરંતુ તેઓ સની દેઓલ સાથે અન્ય 2 થી 3 નવી વાર્તાઓ પર પણ વિચારણા કરી રહ્યા છે. જેમાં એક ખાસ એક્શન-ડ્રામા ફિલ્મમાં સની દેઓલ અમેરિકામાં રહેતા એક સરદારની ભૂમિકા ભજવતા નજરે પડશે. આ ઉપરાંત, સંતોષીએ એ પણ સ્પષ્ટ કર્યું છે કે તેઓ વર્ષ 2025ની સની દેઓલની હિટ ફિલ્મ 'જાટ'ની સિક્વલ 'જાટ 2'નું નિર્દેશન નથી કરી રહ્યા, કારણ કે તેઓ ફ્રેન્ચાઇઝી કરતા એક જ ભાગની ફિલ્મો બનાવવામાં વધુ વિશ્વાસ ધરાવે છે.
'અદા અપની અપની' કોમેડી ફિલ્મનું પ્લાનિંગ
એક્શન સિવાય રાજકુમાર સંતોષી દર્શકોને હસાવવા માટે પણ નવી તૈયારી કરી રહ્યા છે. 1994ની તેમની આઇકોનિક કોમેડી ફિલ્મ 'અંદાજ અપના અપના'ની શૈલી પર આધારિત એક નવી કોમેડી ફિલ્મ 'અદા અપની અપની' પણ પાઇપલાઇનમાં છે. જોકે આ ફિલ્મ પણ 'અંદાજ અપના અપના'ની સીધી સિક્વલ નથી. આ ફિલ્મમાં આમિર ખાન અને સલમાન ખાન ફરી જોવા મળશે કે નહીં તે અંગે તેમણે હજુ સસ્પેન્સ જાળવી રાખ્યું છે અને ટૂંક સમયમાં મોટો ખુલાસો કરવાની ખાતરી આપી છે.
