Sonu Sood Nepal Disaster Relief Work: નેપાળમાં આવેલી કુદરતી આપત્તિના કારણે સર્જાયેલા વિનાશના ભયાનક દ્રશ્યો સામે આવ્યા બાદ બોલીવુડ અભિનેતા અને સામાજિક કાર્યકર સોનુ સૂદ પીડિતોની મદદ માટે આગળ આવ્યા છે. સોનુ સૂદ પોતે નેપાળના આપત્તિગ્રસ્ત વિસ્તારોમાં પહોંચ્યા હતા અને સ્થિતિનો તાગ મેળવ્યો હતો. સ્થળ પર પહોંચીને તેમણે જણાવ્યું કે, પોતાની આંખોથી તેણે જે મંઝર જોયો છે તેનાથી અંદાજ લગાવી શકાય છે કે, આ આપત્તિએ લોકોના જીવન પર કેટલો ઊંડો અને ભયાનક પ્રભાવ પાડ્યો છે.
વિશ્વભરના લોકોને આગળ આવવા સોનુ સૂદની અપીલ
આપત્તિગ્રસ્ત વિસ્તારમાંથી વાતચીત કરતાં સોનુ સૂદે ભાવુક અપીલ કરી હતી કે, આ મુશ્કેલ સમયમાં માત્ર નેપાળના સ્થાનિક લોકો જ નહીં પરંતુ, સમગ્ર દુનિયાના ખૂણે-ખૂણેથી લોકોએ આગળ આવીને પીડિતોની મદદ કરવી જોઈએ. તેમણે કહ્યું, "જ્યારે તમે આ આખો મંઝર જુઓ છો ત્યારે ખબર પડે છે કે ઈમ્પેક્ટ કયા લેવલનો આવ્યો હશે. લોકોના ઘરો નષ્ટ થઈ ગયા છે. મારી વિનંતી છે કે, દુનિયાભરમાંથી જે પણ લોકો જ્યાં પણ હોય, આગળ આવે અને આ લોકોને મદદ કરે જેથી આપણે નેપાળને ફરી પોતાના પગ પર ઊભું કરી શકીએ."
આપત્તિના એક અઠવાડિયા પછી પણ ભયાનક અસરો યથાવત
સોનુ સૂદે તે જગ્યાની ગંભીર પરિસ્થિતિ દર્શાવતા કહ્યું કે એક અઠવાડિયા પછી પણ પાણીનો પ્રવાહ અને તબાહીના નિશાન સ્પષ્ટ દેખાઈ રહ્યા છે. પૂરનું પાણી અને કાંપ એટલી ઊંચાઈ સુધી પહોંચી ગયા હતા કે, આખા વિસ્તારો અને મકાનો તેમાં ગરકાવ થઈ ગયા હતા. લોકો પોતાના બચેલા ઘરવખરી અને સ્વજનોને શોધવા મલબાની ઉપર સુધી પહોંચવાનો પ્રયાસ કરી રહ્યા છે. સોનુ સૂદ અને તેમની ટીમ સ્થાનિક લોકોની જરૂરિયાતો સમજીને તેમને તાત્કાલિક રાહત સામગ્રી પહોંચાડવાના પ્રયાસો કરી રહી છે.
1000થી વધુના મોત, 4000 હજુ પણ લાપતા
ચીન-તિબેટ સરહદી વિસ્તારથી શરૂ થયેલા આ વિનાશક પૂર અને ભૂસ્ખલનના કારણે નેપાળના બેત્રાવતી, ત્રિશૂલી અને ઢૂંગે જેવા વિસ્તારો ભારે પ્રભાવિત થયા છે.
આ આપત્તિમાં મૃત્યુઆંક 1000ને પાર પહોંચી ગયો છે.
આશરે 4000 લોકો હજુ પણ લાપતા હોવાના અહેવાલ છે.
સૌથી વધુ નુકસાન ત્રિશૂલી પાવર પ્રોજેક્ટમાં થયું છે, જ્યાં સુરંગોમાં અનેક શ્રમિકો ફસાયેલા છે.
આંતરરાષ્ટ્રીય સ્તરે બચાવ કામગીરી
અત્યારે સ્થિતિ એવી છે કે, બચાવ ટુકડીઓ સામે મલબા ઉપરાંત 'સમય' સામે પણ મોટી લડાઈ છે. ભારત, ચીન, દક્ષિણ કોરિયા, ઓસ્ટ્રેલિયા અને નેપાળી સેનાના કમાન્ડો અને નિષ્ણાતો સુરંગો તથા કાટમાળમાંથી લોકોને જીવંત બહાર કાઢવા માટે રાત-દિવસ એક કરી રહ્યા છે.
નેપાળ આપત્તિ અને સોનુ સૂદ ચેરીટી અંગે વિશેષ માહિતી
સોનુ સૂદ ચેરિટેબલ ટ્રસ્ટ: સોનુ સૂદ પોતાના ટ્રસ્ટ દ્વારા અગાઉ કોવિડ-19 રોગચાળા દરમિયાન અને તુર્કી ભૂકંપ વખતે પણ મોટા પાયે આંતરરાષ્ટ્રીય રાહત સામગ્રી મોકલી ચૂક્યા છે.
ભારત સરકારનું 'ઓપરેશન રાહત/મૈત્રી': ભારતીય વાયુસેના (IAF) અને NDRF ની ટુકડીઓ નેપાળ સરકાર સાથે મળીને માનવતાવાદી સહાય (HADR) પૂરી પાડી રહી છે, જેમાં હેલિકોપ્ટર દ્વારા રેશન કિટ્સ અને મેડિકલ સપ્લાય એરડ્રોપ કરવામાં આવી રહ્યા છે.
હિમાલયન ભૂસ્ખલન અને જળવાયુ પરિવર્તન: તિબેટ અને નેપાળ સરહદે ગ્લેશિયર લેક આઉટબર્સ્ટ ફ્લડ (GLOF) અને અતિવૃષ્ટિના કારણે હિમાલયન નદીઓમાં અચાનક પૂર આવવાના કિસ્સાઓમાં ચિંતાજનક વધારો થયો છે.
