20-Year-Old Surat Extortion Case: સુરત શહેરના બહુચર્ચિત અને લગભગ 20 વર્ષ જૂના પ્રફુલ સાડી ખંડણી કેસમાં કાયદાકીય પ્રક્રિયાએ ફરી એકવાર જોર પકડ્યું છે. બોલિવૂડની જાણીતી અભિનેત્રી શિલ્પા શેટ્ટીના માતા સુનંદા શેટ્ટીએ આ કેસની સુનાવણી દરમિયાન અદાલત સમક્ષ એક મહત્વપૂર્ણ અરજી રજૂ કરી છે. તેમણે પોતાની ઉંમર અને સ્વાસ્થ્યના કારણો રજૂ કરીને કોર્ટની પ્રત્યક્ષ કામગીરીમાંથી કાયમી હાજરીથી મુક્તિ મેળવવા માટે વિનંતી કરી છે. આ હાઇપ્રોફાઇલ કેસમાં સુનંદા શેટ્ટી ઉપરાંત અન્ય મુખ્ય આરોપીઓ પણ સામેલ હોવાથી કાયદાકીય વર્તુળોમાં આ મામલો ભારે ચર્ચાનો વિષય બન્યો છે.
77 વર્ષની ઉંમર અને વૃદ્ધાવસ્થાનું રજૂ કર્યું કારણ
સુનંદા શેટ્ટીના વકીલ દ્વારા અદાલતમાં એવી રજૂઆત કરવામાં આવી હતી કે તેમની અસીલની હાલની ઉંમર 77 વર્ષની છે. વૃદ્ધાવસ્થા અને શારીરિક મર્યાદાઓને કારણે તેમના માટે નિયમિતપણે કોર્ટમાં સશરીર હાજર રહેવું અત્યંત મુશ્કેલ બની રહ્યું છે. આથી માનવતા અને કાયદાકીય જોગવાઈઓના આધારે તેમને કોર્ટમાં કાયમી પ્રત્યક્ષ હાજરીમાંથી મુક્તિ આપવામાં આવે. જોકે, આ કેસમાં જોડાયેલા અન્ય આરોપીઓના વકીલો તરફથી સુનંદા શેટ્ટીની આ મુક્તિ અરજી સામે વિરોધ પણ દર્શાવવામાં આવ્યો હતો.
અન્ય આરોપીઓએ પણ માંગી મુક્તિ
આ સમગ્ર મામલામાં માત્ર સુનંદા શેટ્ટી જ નહીં, પરંતુ કેસના અન્ય આરોપી નંબર-1 દિનેશ નારાયણે પણ હાજરીમાંથી રાહત મેળવવા પ્રયાસ કર્યો છે. દિનેશ નારાયણના વકીલે પોતાના અસીલની 62 વર્ષની ઉંમરનો ઉલ્લેખ કરીને કોર્ટ સમક્ષ હાજરી મુક્તિની માંગ કરી હતી. અદાલતમાં રજૂઆત કરવામાં આવી હતી કે મુદત દરમિયાન આરોપીઓની સતત ગેરહાજરીને કારણે જ કેસની આગળની ટ્રાયલ પ્રક્રિયા અટકી રહી છે. આ પરિસ્થિતિના કારણે આટલા વર્ષો વિતી ગયા છતાં કેસનો અંતિમ ઉકેલ આવી શક્યો નથી.
7 ઓક્ટોબરે તમામ આરોપીઓને કોર્ટમાં હાજર રહેવા કડક આદેશ
તમામ પક્ષોની દલીલો અને રજૂઆતો સાંભળ્યા બાદ અદાલતે આ બાબતને ગંભીરતાથી લીધી છે. કોર્ટે સ્પષ્ટ રુખ અપનાવીને સુનંદા શેટ્ટી, દિનેશ નારાયણ તેમજ અંડરવર્લ્ડ ડોન ફઝલુ રહેમાન સહિતના આરોપીઓને આગામી 7 ઓક્ટોબરના રોજ અદાલત સમક્ષ પ્રત્યક્ષ હાજર રહેવા માટે આદેશ કર્યો છે. 7મી ઓક્ટોબરથી આ બહુચર્ચિત કેસની નિયમિત ટ્રાયલ શરૂ કરવામાં આવશે, જેથી કેસની કાર્યવાહીને ઝડપથી આગળ ધપાવી શકાય.
શું હતો 2 કરોડની ખંડણી અને પ્રફુલ સાડીનો સમગ્ર વિવાદ?
આ કેસનો પાયો આજથી બે દાયકા પહેલાં નખાયો હતો. બોલિવૂડ અભિનેત્રી શિલ્પા શેટ્ટી અને સુરતની જાણીતી 'પ્રફુલ સાડી' કંપની વચ્ચે સાડીઓની જાહેરાત માટે એક મોટો કરાર થયો હતો. આ મોડેલિંગ કરારના ભંગ બાદ બંને પક્ષો વચ્ચે વિવાદ ઊભો થયો હતો. આક્ષેપ છે કે પ્રફુલ સાડીના માલિક પાસેથી 2 કરોડ રૂપિયાની રકમ વસૂલવા માટે કથિત રીતે ખંડણી માંગવામાં આવી હતી. આ મામલે સુરતના ઉમરા પોલીસ સ્ટેશનમાં ગુનો નોંધવામાં આવ્યો હતો, જેમાં અંડરવર્લ્ડના તત્વોના નામ પણ ઊછળ્યા હતા. આ કેસ છેલ્લા 20 વર્ષથી કાયદાકીય લડાઈનો વિષય બન્યો છે.
