Vijay Deverakonda Rashmika Mandanna Tirumala Temple Visit: સાઉથ સિનેમાના લોકપ્રિય અને ચર્ચિત કલાકારો રશ્મિકા અને વિજય દેવરકોંડા મંગળવારે વહેલી સવારે આંધ્રપ્રદેશના વિશ્વપ્રસિદ્ધ તિરુમલા વેંકટેશ્વર મંદિર ખાતે ભગવાનના દર્શન કરવા પહોંચ્યા હતા. આ દરમિયાન બંને પરંપરાગત અને સાત્વિક વસ્ત્રોમાં નજરે પડ્યા હતા. વિજય દેવરકોંડા સફેદ રંગના સિલ્ક કુર્તા અને ધોતીમાં દેખાયા હતા, જ્યારે રશ્મિકા પીળા રંગની સુંદર સિલ્ક સાડી સાથે ગુલાબી બ્લાઉઝમાં અત્યંત આકર્ષક લાગી રહી હતી. મંદિર પરિસરમાં બંનેએ સુપ્રભાત સેવા દરમિયાન ભગવાનના ચરણોમાં શીશ નમાવીને આશીર્વાદ લીધા હતા.
દર્શન બાદ ભીડ વધી જતાં વિજય દેવરકોંડાએ પત્નીની સંભાળ લીધી
દર્શનની વિધિ પૂર્ણ થયા બાદ જ્યારે આ જોડી મંદિર પરિસરમાંથી બહાર નીકળી, ત્યારે તેમને જોવા માટે ચાહકો અને પ્રશંસકોની ભારે ભીડ એકત્રિત થઈ ગઈ હતી. સેલ્ફી અને ફોટા પડાવવા માટે લોકો આગળ વધવા લાગ્યા હતા, જેના કારણે થોડી અફરાતફરી જેવું વાતાવરણ સર્જાયું હતું. આ પરિસ્થિતિમાં વિજય દેવરકોંડા એક રક્ષક તરીકે આગળ આવ્યા અને ભીડ વચ્ચે રશ્મિકાને પોતાના સુરક્ષિત ઘેરામાં લઈને ગોલ્ફ કાર્ટ સુધી પહોંચાડ્યા હતા. સોશિયલ મીડિયા પર વાયરલ થઈ રહેલા આ વીડિયોમાં વિજયનું આ રક્ષણાત્મક વલણ ચાહકોનું મન જીતી રહ્યું છે, જ્યારે રશ્મિકાએ પણ હાથ જોડીને અભિવાદન સ્વીકાર્યું હતું.
ચેન્નઈમાં વિજય સાથે મુલાકાત બાદ તિરુપતિ પહોંચ્યા
તિરુમલાની આ યાત્રા પહેલા આ જોડીએ રવિવારે ચેન્નઈની મુલાકાત લીધી હતી અને તમિલનાડુના દિગ્ગજ નેતા તથા અભિનેતા સી. જોસેફ વિજય સાથે ખાસ મુલાકાત કરી હતી. આ બેઠક દરમિયાનના અનુભવો સોશિયલ મીડિયા પર શેર કરતા વિજય દેવરકોંડાએ જણાવ્યું હતું કે, વ્યસ્ત દિનચર્યા છતાં તેમણે ખૂબ જ પ્રેમથી સ્વાગત કર્યું હતું અને જીવન તથા કામ વિશે પોતાના અનુભવો વહેંચ્યા હતા. ચેન્નાઈથી પરત ફર્યા બાદ તરત જ બંનેએ ભગવાનના આશીર્વાદ લેવા માટે તિરુપતિની વાટ પકડી હતી.
16 ઓક્ટોબરે થિયેટર્સમાં રિલીઝ થવા જઈ રહી છે ફિલ્મ 'રાણાબલી'
વર્ક ફ્રન્ટની વાત કરીએ તો, રશ્મિકા અને વિજય દેવરકોંડાની આગામી મોસ્ટ અવેટેડ પિરિયડ એક્શન ડ્રામા ફિલ્મ 'રાણાબાલી' આગામી 16 ઓક્ટોબરે વિશ્વભરના સિનેમાઘરોમાં ધમાકેદાર રિલીઝ થવાની છે. રાહુલ સંકૃત્યાયન દ્વારા નિર્દેશિત આ ફિલ્મ 19મી સદીમાં બ્રિટિશ શાસન અને અકાલની પૃષ્ઠભૂમિ પર આધારિત છે. ફિલ્મમાં હોલીવુડ અભિનેતા આર્નોલ્ડ વોસ્લૂ પણ ખલનાયકની ભૂમિકામાં જોવા મળશે. બોક્સ ઓફિસ પર આ ફિલ્મની ટક્કર રજનીકાંતની 'જેલર-2' સાથે થવાની હોવાથી સિનેમા જગતમાં ભારે ઉત્સુકતા જોવા મળી રહી છે.
