Premanand Maharaj Biopic: ભારતીય સિનેમામાં આધ્યાત્મિક ગુરુઓ અને સંતોના જીવન પર આધારિત ફિલ્મ બનાવવાનો તબક્કો શરૂ થયો છે. બાબા નીમ કરોલી મહારાજની દિવ્ય જીવનયાત્રા પર આધારિત ફિલ્મ 'હનુમાન અંશ' ને બોક્સ ઓફિસ અને દર્શકો તરફથી મળેલા અપાર પ્રેમ અને અભૂતપૂર્વ પ્રતિસાદ બાદ, હવે વૃંદાવનના પૂજનીય સંત પ્રેમાનંદજી મહારાજના જીવન પર બાયોપિક બનાવવાની જાહેરાત કરવામાં આવી છે. આ આગામી બાયોપિકનું નામ 'રાધા અંશ' નક્કી કરવામાં આવ્યું છે, જે તેમના આધ્યાત્મિક વિચારો, સાધના અને રાધારાણી પ્રત્યેની અનન્ય ભક્તિને લોકો સુધી પહોંચાડવાનું કામ કરશે.
જગદ્ગુરુ હિમાંગી સખીએ જણાવી પોતાની ઈચ્છા
વૈષ્ણવ કિન્નર અખાડાના જગદ્ગુરુ શંકરાચાર્ય હિમાંગી સખીએ સંત પ્રેમાનંદ મહારાજના જીવનચરિત્ર પર આ ફિલ્મ બનાવવાની પોતાની ઈચ્છા સાર્વજનિક કરી છે. તેમણે માધ્યમો સાથેની ખાસ વાતચીતમાં જણાવ્યું હતું કે ફિલ્મ નિર્માતાઓની અનુભવી ટીમ સાથે આ પ્રોજેક્ટ અંગે પ્રાથમિક ચર્ચાઓ પૂર્ણ થઈ ગઈ છે અને ટીમે તેના માટે હકારાત્મક સંમતિ દર્શાવી છે. આ પ્રોજેક્ટને આગળ ધપાવવા માટે ટૂંક સમયમાં જ સંત પ્રેમાનંદ મહારાજ તથા તેમના મુખ્ય શિષ્યોને મળીને આધિકારિક પરવાનગી લેવામાં આવશે. ફિલ્મમાં પાત્રોની પસંદગી પણ સંતના આશ્રમ અને શિષ્યોની સલાહ તેમજ માર્ગદર્શન મુજબ જ કરવામાં આવશે.
'હનુમાન અંશ' ની જ્વલંત સફળતામાંથી મળી પ્રેરણા
આ નવી ફિલ્મ બનાવવાનો મુખ્ય વિચાર 'હનુમાન અંશ' ફિલ્મની વ્યાપક સફળતા અને તેની આધ્યાત્મિક અસર પરથી લેવામાં આવ્યો છે. નીમ કરોલી બાબાના જીવન અને તેમની કલ્યાણકારી યાત્રાને દર્શાવતી આ ફિલ્મે લોકોના હૃદયમાં માનવતા, સેવા અને ભક્તિભાવનો ઊંડો પ્રભાવ પાડ્યો છે. હિમાંગી સખીના જણાવ્યા અનુસાર, જેમ 'હનુમાન અંશ' ફિલ્મ દ્વારા લાખો લોકો નીમ કરોલી બાબાની શિક્ષાઓ સાથે જોડાયા, તેવી જ રીતે 'રાધા અંશ' દ્વારા વિશ્વભરના લોકોને સંત પ્રેમાનંદ મહારાજના શાંતિદાયક સંદેશાઓ અને રાધારાણીના પવિત્ર નામ સાથે જોડી શકાશે. પ્રેમાનંદ મહારાજને સ્વયં રાધારાણીનો જ એક અંશ માનવામાં આવે છે, તેથી જ આ ફિલ્મનું શીર્ષક પણ ખૂબ વિચારપૂર્વક 'રાધા અંશ' રાખવામાં આવ્યું છે.
ફિલ્મના પાત્રો માટે વિરાટ-અનુષ્કાના નામની ચર્ચા
જગદ્ગુરુ હિમાંગી સખીએ પોતાના બાળપણના સંસ્કારો વાગોળતા કહ્યું હતું કે, તેમનું બાળપણ પણ બ્રજની પવિત્ર કુંજ ગલીઓમાં જ વિત્યું છે, જેથી તેમનું મન હંમેશા રાધા-ભાવથી ઓતપ્રોત રહ્યું છે. તેથી પૂજ્ય મહારાજના જીવન પર ફિલ્મ બનાવવું એ માત્ર એક સિનેમેટિક પ્રોજેક્ટ નથી પણ તેમની પોતાની આધ્યાત્મિક ભક્તિનો એક ભાગ છે. સત્તાવાર મંજૂરી મળતાં જ ફિલ્મનું ટીઝર અને પ્રોમો રજૂ કરવાની તૈયારીઓ ચાલી રહી છે. આ સાથે જ ફિલ્મની સ્ટાર કાસ્ટને લઈને સોશિયલ મીડિયા પર ભારતીય ક્રિકેટર વિરાટ કોહલી અને બોલિવૂડ અભિનેત્રી અનુષ્કા શર્માના નામોની ભારે ચર્ચા જાગી છે, કારણ કે બંને પૂજ્ય પ્રેમાનંદ મહારાજના ખૂબ મોટા ભક્ત માનવામાં આવે છે. જોકે, ફિલ્મની કાસ્ટિંગ અંગે નિર્માતાઓ તરફથી હજુ સુધી કોઈ પણ સત્તાવાર જાહેરાત કરવામાં આવી નથી.
બોલિવૂડના અનેક સેલેબ્રિટી બાબાના દર્શન માટે આવે છે
સંત પ્રેમાનંદ જી મહારાજ વૃંદાવનમાં સ્થિત 'શ્રી હિત રાધા કેલી કુંજ' માં રહે છે અને તેમના રાધા નામ સંકીર્તન અને આધ્યાત્મિક સત્સંગ સમગ્ર વિશ્વમાં કરોડો શ્રદ્ધાળુઓ દ્વારા સાંભળવામાં આવે છે. વિરાટ કોહલી, અનુષ્કા શર્મા, પંકજ ત્રિપાઠી જેવી અનેક પ્રખ્યાત હસ્તીઓ પણ અવારનવાર તેમના દર્શન કરવા અને માર્ગદર્શન મેળવવા માટે વૃંદાવન પહોંચે છે. બીજી તરફ, બાબા નીમ કરોલી મહારાજના ઉત્તરાખંડ સ્થિત કૈંચી ધામ આશ્રમની વિશ્વવ્યાપી ખ્યાતિ બાદ તાજેતરમાં રિલીઝ થયેલી ફિલ્મ 'હનુમાન અંશ' દર્શકોમાં ખૂબ જ લોકપ્રિય સાબિત થઈ રહી છે, જેના કારણે સંત આધારિત ફિલ્મો માટે બોલિવૂડ અને પ્રાદેશિક સિનેમામાં નવો રૂઝાન જોવા મળી રહ્યો છે.
