Ajay Devgn and Amruta Fadnavis Juhu Beach Clean Up: બોલિવૂડ એક્ટર અજય દેવગન હાલમાં પોતાની બહુચર્ચિત અને મોસ્ટ અવેટેડ ફિલ્મ 'દ્રશ્યમ 3' ને લઈને સતત ચર્ચામાં છે. આ ફિલ્મ આગામી 2 ઓક્ટોબરે સિનેમાઘરોમાં રિલીઝ થવા જઈ રહી છે. જોકે, ફિલ્મની રિલીઝ પહેલાં અજય દેવગન એક વિશેષ સામાજિક પહેલ અને સ્વચ્છતા અભિયાનનો ભાગ બન્યા હતા.અજય દેવગને મહારાષ્ટ્રના મુખ્યમંત્રી દેવેન્દ્ર ફડણવીસના પત્ની અને 'દિવ્યાજ ફાઉન્ડેશન'ના સંસ્થાપક અમૃતા ફડણવીસ સાથે મુંબઈના પ્રખ્યાત જુહૂ બીચ પર પહોંચીને સફાઈ અભિયાનમાં સક્રિય યોગદાન આપ્યું હતું.
ગણપતિ વિસર્જન બાદ મુંબઈનો સૌથી મોટો બીચ ક્લીન-અપ ડ્રાઈવ
અજય દેવગન દિવ્યાજ ફાઉન્ડેશનની 'સી શોર શાઈન 2026' પહેલનો ભાગ બન્યા હતા. ગણપતિ વિસર્જન પછી દરિયાકિનારે જમા થતા કચરાને દૂર કરવા માટે તેને મુંબઈનો સૌથી મોટો બીચ સફાઈ કાર્યક્રમ માનવામાં આવી રહ્યો છે. આ આયોજનનો મુખ્ય હેતુ નાગરિકોને એકજૂથ કરીને સ્વચ્છ તટો અને પર્યાવરણ પ્રત્યે જવાબદાર ભવિષ્યનું નિર્માણ કરવાનો છે. સોશિયલ મીડિયા પર સામે આવેલા વિડીયો અને તસવીરોમાં અજય દેવગન સ્વયંસેવકો સાથે મળીને ગણપતિ વિસર્જન બાદ કિનારે એકઠો થયેલો કચરો ઉપાડીને પ્લાસ્ટિક બેગમાં ભરતા જોવા મળી રહ્યા છે. તેમની સાથે અમૃતા ફડણવીસ પણ બીચની સફાઈ કરતી નજરે પડી હતી.
અજય દેવગનની નાગરિકોને અપીલ
"જેમ આપણે સૌ પોતાના ઘરને પ્રેમ કરીએ છીએ અને તેને સાફ રાખીએ છીએ, મને લાગે છે કે આપણે આપણા દેશ, આપણા શહેર અને આપણા સમુદ્રોને પણ એટલો જ પ્રેમ કરીએ છીએ. તો શું આ આપણી પણ જવાબદારી નથી બનતી? જ્યાં સુધી આપણે પોતે જ એ નક્કી નહી કરીએ કે આપણે આપણા શહેર અને દેશને સાફ રાખવો છે, ત્યાં સુધી કંઈ જ નહી બદલાય."
ફેન્સ જોઈ રહ્યા છે 'દ્રશ્યમ 3' ની આતુરતાથી રાહ
અજય દેવગન હાલ પોતાની ફિલ્મ 'દ્રશ્યમ: ધ કન્ક્લુઝન' ના પ્રમોશન અને રિલીઝની તૈયારીઓમાં વ્યસ્ત છે. આ ફિલ્મમાં અજય દેવગનની સાથે જયદીપ અહલાવત, તબ્બુ, શ્રિયા સરન, રજત કપૂર, પ્રકાશ રાજ, ઈશિતા દત્તા અને મૃણાલ જાધવ મહત્વની ભૂમિકામાં જોવા મળશે.
